ഭൂരിപക്ഷം നഷ്ടമായ നാരാണയസ്വാമി സര്‍ക്കാര്‍ സ്ഥാനമൊഴിഞ്ഞതിന് പിന്നാലെ പുതുച്ചേരിയും നിയമസഭാ തെരഞ്ഞെടുപ്പിനെ ഇപ്പോൾ നേരിടുകയാണ്.

കേരളത്തോടൊപ്പം ഏപ്രില്‍ ആറിനാണ് പുതുച്ചേരി നിയമസഭാ തെരഞ്ഞെടുപ്പും നടക്കുന്നത്. സര്‍ക്കാര്‍ താഴെ വീണ് ആഴ്ചകള്‍ക്ക് ശേഷം തന്‍റെ സര്‍ക്കാരിനെ ബിജെപി താഴ ഇറക്കാന്‍ നടത്തിയ ഗൂഢാലോചനയെക്കുറിച്ച് വി. നാരാണയ സ്വാമി വെളിപ്പെടുത്തി.

അഞ്ച് വര്‍ഷം സര്‍ക്കാരിനെ‌ തകരാതെ താന്‍ ചേർത്ത് പിടിച്ച് നിര്‍ത്തിയെന്ന് നാരായണസ്വാമി പറഞ്ഞു. സര്‍ക്കാരിന്‍റെ കാലാവധി തീരാന്‍ 10 ദിവസങ്ങള്‍ ബാക്കിനില്‍ക്കെയാണ് കോണ്‍ഗ്രസ് എംഎല്‍എമാരെ കേന്ദ്ര നേതൃത്വത്തിന്‍റെ ഇടപടലോടെ ബിജെപി ചാടിച്ചതെന്നും 2016 മുതല്‍ ബിജെപി ഇതിനായി നിരന്തരം അഹോരാത്രം പരിശ്രമിച്ചു കൊണ്ടിരിക്കുകയായിരുന്നുവെന്നും നാരായണ സ്വാമി കുറ്റപ്പെടുത്തി.

തന്‍റെ മന്ത്രിസഭയിലെ അംഗമായ ആറുമുഖം നമശിവായം ബിജെപിയുമായി അടുപ്പത്തിലായിരുന്നു. പാര്‍ട്ടി പ്രവര്‍ത്തനങ്ങളില്‍ നിന്നും ഇദ്ദേഹം അകലം പാലിച്ചിരുന്നു. അതിന് ശേഷം അദ്ദേഹത്തോട് അടുപ്പമുള്ള മറ്റൊരു എം‌എൽ‌എയും ബിജെപിയിലേക്ക് കളം മാറ്റി ചവിട്ടി.

എംഎല്‍എമാര്‍ക്ക് റിയൽ എസ്റ്റേറ്റ് ബിസിനസ്സ് ഉള്ളതിനാൽ എൻ‌ഫോഴ്സ്മെൻറ് ഡയറക്ടറേറ്റ്, ഇൻ‌കം ടാക്സ് എന്നിവ ഉപയോഗിച്ച് ബിജെപി അവരെ വലവീശിപ്പിടിച്ചെന്ന് നാരായണ സ്വാമി പറഞ്ഞു. തനിക്കെതിരായ ഐ-ടി കേസ് അവസാനിപ്പിക്കുമെന്ന് ഉറപ്പ് ലഭിച്ചതോടെയാണ് മറ്റൊരു എം‌എൽ‌എ ജോൺ കുമാര്‍ ബിജെപിയിലേക്ക് പോയത്.

ഡി‌എം‌കെയിൽ നിന്നുള്ള മറ്റൊരു എം‌എൽ‌എയും പിന്നാലെ രാജിവച്ചു, കാരണം അദ്ദേഹത്തിനും റിയൽ എസ്റ്റേറ്റ് ബന്ധമുണ്ട്. കോണ്‍ഗ്രസ് സർക്കാരിനെ അട്ടിമറിക്കാൻ ബിജെപി കേന്ദ്രത്തിലുള്ള അധികാരത്തെയും പണത്തെയും ഉപയോഗിച്ചെന്നും നാരായണ സ്വാമി ആരോപിക്കുന്നു.

മുഖ്യമന്ത്രി തങ്ങളെ പാര്‍ട്ടിയില്‍ ഒതുക്കാന്‍ ശ്രമിച്ചുവെന്ന് രാജിവെച്ച കോണ്‍ഗ്രസ് എംഎല്‍എമാര്‍ ആരോപിച്ചിരുന്നു. ഈ ആരോപണം നാരായണ സ്വാമി നിഷേധിച്ചു. അവരെ പാര്‍ട്ടിയില്‍ ഒതുക്കുന്നു എന്ന് പരാതി ഉണ്ടായിരുന്നെങ്കില്‍ എന്തുകൊണ്ട് നേരത്തെ പ്രതകരിച്ചില്ല.

സര്‍ക്കാര്‍ കാലാവധി അവസാനിക്കുന്നതിന്‍റെ തൊട്ടു മുമ്പ് എന്തിന് ബിജെപിയിലേക്ക് പോയി, നേരത്തെ പോകാമായിരുന്നില്ലേ. ഇതൊരു തന്ത്രമാണ്. ബിജെപിയിലേക്ക് പോയതിന് അവര്‍ പല വിശദീകരണവും നല്‍കുന്നുണ്ട്, എന്നാല്‍ പോണ്ടിച്ചേരിയിലെ ജനങ്ങള്‍ക്ക് എല്ലാം മനസിലാകുമെന്നും നാരായണസ്വാമി കൂട്ടിച്ചേർത്തു.

കഴിഞ്ഞ ആഴ്ചയാണ് നാരായണ സ്വാമി സര്‍ക്കാര്‍ നിലം പതിച്ചത്. അഞ്ച് കോൺഗ്രസ് എം.എൽ.എമാരും ഒരു ഡി.എം.കെ എം.എൽ.എയും രാജിവെച്ചതോടെയാണ് സർക്കാറിന് ഭൂരിപക്ഷം നഷ്ടമായത്.

ബി.ജെ.പി നേതാക്കള്‍ പണമടങ്ങിയ ബാഗുമായി പുതുച്ചേരിയില്‍ ക്യാമ്പ് ചെയ്ത് എംഎല്‍എമാരെ വിലക്ക് വാങ്ങുകയായിരുന്നുവെന്നാണ് ഇപ്പോഴും അദ്ദേഹം വിശ്വസിക്കുന്നത്. അതോടെ കോണ്‍ഗ്രസ് സര്‍ക്കാരിന് ഭൂരിപക്ഷം നഷ്ടപ്പെട്ടതായി സ്പീക്കർ പ്രഖ്യാപിച്ചു.

വിശ്വാസ വോട്ടെടുപ്പിന് മുമ്പായി വി.നാരായണസ്വാമിയും ഭരണപക്ഷ എംഎല്‍എമാരും സഭയില്‍ നിന്ന് ഇറങ്ങിപോയി. തുടര്‍ന്ന് വിശ്വാസം നേടിയെടുക്കുന്നതില്‍ സര്‍ക്കാര്‍ പരാജയപ്പെട്ടെന്ന് സ്പീക്കര്‍ അറിയിച്ചു.

പിന്നീട് അദ്ദേഹം ഗവര്‍ണറെ കണ്ട് രാജിക്കത്ത് സമർപ്പിച്ചു. തിരഞ്ഞെടുപ്പിന് രണ്ട് മാസം മാത്രം ബാക്കി നില്‍ക്കെയാണ് പുതുച്ചേരിയില്‍ സര്‍ക്കാര്‍ താഴെവീണത്.

കേന്ദ്ര സര്‍ക്കാരിനെതിരെയും മുന്‍ ഗവര്‍ണര്‍ കിരണ്‍ബേദിക്കെതിരെയും വിശ്വാസവോട്ടെടുപ്പിന് മുമ്പായി വി.നാരായണസ്വാമി രൂക്ഷവിമര്‍ശനം നടത്തിയിരുന്നു. കിരണ്‍ബേദിയെ വച്ച് കേന്ദ്ര സര്‍ക്കാര്‍ രാഷ്ട്രീയം കളിച്ചുവെന്നും പുതുച്ചേരിക്ക് വരേണ്ട ഫണ്ട് തടഞ്ഞുവച്ച് ഗൂഢാലോചന നടത്തിയെന്നും നാരായണസ്വാമി വാദിച്ചു.