നിയമസഭാ തിരഞ്ഞെടുപ്പിനുള്ള സ്ഥാനാര്‍ഥികളുടെ പട്ടിക തയ്യാറാക്കാനുള്ള നെട്ടോട്ടത്തിലാണ് എല്ലാ പാർട്ടികളും. അതേ സമയം കോണ്‍ഗ്രസ് സ്ഥാനാര്‍ഥികളുടെ പട്ടിക ഉടന്‍ പുറത്ത് വരും. തോറ്റാലും ജയിച്ചാലും അഞ്ചു തവണ മത്സരിച്ചവര്‍ മാറി നില്‍ക്കണമെന്നൊരു മാനദണ്ഡം മുന്നോട്ട് വച്ചിരുന്നു. ഇത് കര്‍ശനമായി പാലിക്കുമെന്നാണ് ലഭ്യമാകുന്ന വിവരം.

ഉമ്മന്‍ചാണ്ടിക്ക് മാത്രമാകും ഇക്കാര്യത്തില്‍ ഇളവ് നല്‍കുകയെന്നും മറ്റുള്ള എല്ലാ നേതാക്കള്‍ക്കും നിബന്ധന ബാധകമാകുമെന്നും ‌ മുതിര്‍ന്ന നേതാവ് പി.സി.ചാക്കോ അറിയിക്കുകയുണ്ടായി. ഇതോടെ കെ.സി.ജോസഫ് അടക്കമുള്ളവര്‍ നില്‍ക്കേണ്ടി വരുമെന്ന കാര്യത്തിൽ സംശയമില്ല .

യുഡിഎഫ് സീറ്റ് വിഭജന ചര്‍ച്ച ഇന്നത്തോടെ അവസാനിക്കുവാനിരിക്കുകയാണ്. കേരള കോണ്‍ഗ്രസ് ജോസഫ് വിഭാഗത്തിന്റെ സീറ്റുകള്‍ മാത്രമാണ് നിലവില്‍ അന്തിമമാക്കാനുള്ളൂ. 20 ശതമാനം വനിതാ സ്ഥാനാര്‍ത്ഥികള്‍ ഉണ്ടാവണം. 40 വയസ്സില്‍ താഴെയുള്ളവരായിരിക്കണം 50 ശതമാനം സ്ഥാനാര്‍ത്ഥികളെന്നതും ഹൈക്കമാന്‍ഡ് നൽകിയിരിക്കുന്ന നിര്‍ദേശം .

പൂഞ്ഞാറോ കാഞ്ഞിരപ്പള്ളിയോ വിട്ടുനല്‍കാമെന്നും പകരം സീറ്റ് വേണ്ടെന്നും ജോസഫ് വിഭാഗം വ്യക്തമാക്കുകയും ചെയ്തു . വൈകീട്ട് ചേരുന്ന യുഡിഎഫ് യോഗത്തോടെ സീറ്റ് വിഭജനം പൂര്‍ത്തിയാക്കാനാണ് ശ്രമം. പൂഞ്ഞാറോ- കാഞ്ഞിരപ്പള്ളിയോ വേണമെന്ന കോണ്‍ഗ്രസ് ആവശ്യം ജോസഫ് അംഗീകരിച്ചു. സീറ്റ് നല്‍കിയാല്‍ പകരം മറ്റെവിടെയെങ്കിലും സീറ്റ് എന്ന നിലപാടില്‍ നിന്നും ജോസഫ് പിന്നോട്ട് പോയി.

രണ്ടിലേത് വേണമെന്ന് കോണ്‍ഗ്രസ്സിന് തീരുമാനിക്കാമെന്നാണ് ജോസഫ് പക്ഷത്തിന്റെ ഒത്ത് തീര്‍പ്പ് നിര്‍ദ്ദേശം. അതേ സമയം തന്നെ യുഡിഎഫ് വഞ്ചിച്ചുവെന്ന് ആരോപിക്കുന്ന പൂഞ്ഞാർ എംഎൽഎ യുഡിഎഫിനെ തറ പറ്റിക്കുകയാണ് തന്റെ മുഖ്യലക്ഷ്യമെന്നും വ്യക്തമാക്കുകയുണ്ടായി.