കോണ്‍ഗ്രസിൽ നിന്നും രാജി വച്ച ശേഷം പി.സി. ചാക്കോ എന്‍സിപിയില്‍ ചേര്‍ന്നിരുന്നു. ഇപ്പോൾ ഇതാ അദ്ദേഹത്തിന് അനുഭാവം പ്രകടിപ്പിച്ച് എറണാകുളം ഡിസിസിയില്‍ കൂട്ട രാജി . ഡിസിസി ജനറല്‍ സെക്രട്ടറി ബിജു ആബേല്‍ ജേക്കബാണു കോണ്‍ഗ്രസില്‍ നിന്നു രാജിവെച്ചത്.

രാജിക്കത്ത് കെ.പി.സി.സി പ്രസിഡന്റിനും ഡി.സി.സി പ്രസിഡന്‍റിനും കൈമാറിയതായി അദ്ദേഹം അറിയിക്കുകയുണ്ടായി. എന്‍സിപി യില്‍ ചേര്‍ന്ന ദേശീയ നേതാവ് പി.സി. ചാക്കോ വ്യാഴാഴ്ച കേരളത്തില്‍ തിരിച്ചെത്തുവാൻ ഒരുങ്ങുകയാണ് .

രാവിലെ പതിനൊന്നിന് അദ്ദേഹത്തിന് നെടുമ്പാശേരി വിമാനത്താവളത്തില്‍ സ്വീകരണെമൊരുക്കിയിരുന്നു. സംസ്ഥാനത്തിന്റെ വിവിധ ഭാഗങ്ങളില്‍ നിന്നുള്ള എന്‍സിപി നേതാക്കളും അംഗങ്ങളും എല്‍ഡിഎഫ് പ്രവര്‍ത്തകരും സ്വീകരണത്തിനെത്തുവാൻ ഒരുങ്ങുകയാണ്.

മാത്രമല്ല കൊങ്ങാട് മണ്ഡലത്തില്‍ മുഖ്യമന്ത്രി പിണറായി വിജയന്റെ സാന്നിധ്യത്തില്‍ നടക്കുന്ന യോഗത്തിൽ പി.സി .ചാക്കോയുടെ ആദ്യ എല്‍ഡിഎഫ് തെരഞ്ഞെടുപ്പ് പ്രചരണ പരിപാടി നടക്കുവാനിരിക്കുകയാണ് . തുടര്‍ന്ന് കേരളത്തിലെ പതിനാലു ജില്ലകളിലും എല്‍ഡിഎഫിനു വേണ്ടി പ്രചരണം നടത്തുവാൻ ഒരുങ്ങുകയാണ് അദ്ദേഹം.

അതേ സമയം തന്റെ രാജി പലര്‍ക്കും കോണ്‍ഗ്രസ് വിടാന്‍ പ്രേരണയാകുമെന്നും തകരുന്ന പളുങ്ക് പാത്രം പോലെയാണ് കോണ്‍ഗ്രസെന്നും കെ സുധാകരന് കോണ്‍ഗ്രസില്‍ തുടര്‍ന്ന് പ്രവര്‍ത്തിക്കാന്‍ താല്‍പര്യമില്ലെന്ന് തന്നോട് പറഞ്ഞുവെന്നും പിസി ചാക്കോ വെളിപ്പെടുത്തിയിരുന്നു .

എന്നാൽ അദ്ദേഹത്തിന് മറുപടി കെ.സുധാകരന്‍ നൽകിയിരുന്നു. കോണ്‍ഗ്രസില്‍ അതൃപ്​തിയുണ്ടെന്ന്​ താൻ ഒരിക്കലും പി.സി ​ചാക്കോയോട്​ പറഞ്ഞിട്ടില്ലെന്ന് അദ്ദേഹം പറഞ്ഞു.​ പാര്‍ട്ടിക്കകത്തെ പ്രശ്​നങ്ങള്‍ സംസാരിച്ചിട്ടുണ്ട്​. എന്നാൽ താൻ ഒരിക്കലും കോണ്‍ഗ്രസ്​ വിടുമെന്ന്​ പറഞ്ഞിട്ടില്ല. പി.സി ചാക്കോക്ക്​ ഇപ്പോള്‍ മറുപടി പറയുന്നില്ലെന്നും സുധാകരന്‍ പറഞ്ഞിരുന്നു.