ധര്‍മ്മടത്ത് കോൺഗ്രസ് സ്ഥാനാർത്ഥിയെ പ്രഖ്യാപിച്ചു. സി.രഘുനാഥിനെ യു.ഡി.എഫ് സ്ഥാനാര്‍ഥിയായി എ.ഐ.സി.സി ഔദ്യോഗികമായി പ്രഖ്യാപിച്ച് കഴിഞ്ഞു. വൈകിട്ട് ധര്‍മ്മടത്ത് യു.ഡി.എഫ് കണ്‍വെന്‍ഷന്‍ നടക്കും. ധര്‍മ്മടത്ത് മത്സരിക്കാനില്ലെന്ന് കെ.സുധാകരൻ ഇന്നലെ പറഞ്ഞിരുന്നു.

ഈ പ്രഖ്യാപനത്തിന് പിന്നാലെ സി.രഘുനാഥ് ഇന്നലെ യു.ഡി.എഫ് സ്ഥാനാര്‍ഥിയായി നാമനിര്‍ദ്ദേശ പത്രിക സമര്‍പ്പിച്ചിരുന്നു. ഈ സ്ഥാനാർത്ഥിത്വത്തെ സംബന്ധിച്ച്‌ പാര്‍ട്ടിയുടെ ഔദ്യോഗിക പ്രഖ്യാപനം വൈകിയതാണ് അഭ്യൂഹങ്ങളിലേക്ക് നയിക്കപ്പെട്ടത്.

മാത്രമല്ല ധര്‍മ്മടത്ത് യു.ഡി.എഫ് സ്ഥാനാര്‍ഥി നാമനിര്‍ദ്ദേശ പത്രിക നല്‍കിയതിനെക്കുറിച്ച്‌ അറിയില്ലെന്ന കെ.പി.സി.സി പ്രസിഡന്‍റിന്‍റെ പ്രസ്താവനയും കൂടുതല്‍ ആശയക്കുഴപ്പം സൃഷ്ടിക്കുകയും ചെയ്തു.

എന്നാല്‍ സ്ഥാനാര്‍ഥിക്ക് ചിഹ്നം അനുവദിക്കുന്നതിനുളള കെ.പി.സി.സി പ്രസിഡന്‍റിന്‍റെ കത്ത് ഇന്നലെ തന്നെ ലഭിച്ചിരുന്നതായും മുല്ലപ്പളളിയുടെ പ്രസ്താവനയെക്കുറിച്ച്‌ അറിയില്ലെന്നും സ്ഥാനാര്‍ഥി സി.രഘുനാഥ് വ്യക്തമാക്കി.

പിന്നാലെ രഘുനാഥിനെ സ്ഥാനാര്‍ഥിയായി പ്രഖ്യാപിച്ചുകൊണ്ടുളള എ.ഐ.സി.സിയുടെ അറിയിപ്പ് പുറത്തുവരികയും ചെയ്തു . ഇന്ന് വൈകിട്ട് യു.ഡി.എഫ് ധര്‍മ്മടം നിയോജക മണ്ഡലം കണ്‍വെന്‍ഷനും വിളിച്ച്‌ ചേര്‍ത്തിട്ടുണ്ട്. ഉമ്മന്‍ചാണ്ടിയും കെ.സുധാകരനുമടക്കമുളള നേതാക്കള്‍ കണ്‍വെന്‍ഷനില്‍ പങ്കെടുക്കുവാൻ ഒരുങ്ങുകയാണ്.