സുരേഷ് ഗോപി ഇന്നലെ പറഞ്ഞത് വെറുമൊരു നാക്ക് പിഴയല്ലെന്ന് മുഖ്യമന്ത്രി പിണറായി വിജയന്‍. ഗുരുവായൂരില്‍ ലീഗ് സ്ഥാനാര്‍ഥി കെഎന്‍എ ഖാദര്‍ വിജയിക്കണമെന്നും തലശ്ശേരിയില്‍ എല്‍ഡിഎഫ് സ്ഥാനാര്‍ഥി എ എന്‍ ഷംസീര്‍ തോല്‍ക്കണമെന്നും ബിജെപി സ്ഥാനാര്‍ഥി സുരേഷ് ഗോപിപറഞ്ഞിരുന്നു.

എന്നാൽ ഇത് വെറുമൊരു നാക്ക് പിഴയല്ലെന്ന് മുഖ്യമന്ത്രി പറഞ്ഞിരിക്കുകയാണ് . ഇത് ബിജെപിയും കോണ്‍ഗ്രസും ലീഗും യുഡിഎഫും തമ്മിലുള്ള ഡീലിന്റെ വെളിപ്പെടുത്തലാണെന്നും കണ്ണൂരില്‍ വാര്‍ത്താസമ്മേളനത്തില്‍ മുഖ്യമന്ത്രി പ്രതികരിച്ചു .

എന്നാല്‍ മുസ്ലീം ലീഗ് സ്ഥാനാര്‍ഥിയായ കെഎന്‍എ ഖാദര്‍ ജയിച്ചുവരണമെന്ന് ബിജെപി പരസ്യമായി പറയുന്നത് ലീഗിന്റെയോ കോണ്‍ഗ്രസിന്റേയോ യുഡിഎഫിന്റേയോ ഗുണത്തിനാണെന്ന് കരുതേണ്ടെന്നും മുഖ്യമന്ത്രി പ്രതികരിക്കുകയുണ്ടായി.

ഇരുത്തം വന്ന രാഷ്ട്രീയക്കാരനല്ല സുരേഷ്ഗോപി പക്ഷേ ബിജെപിയുടെ പ്രധാനിയാണ്. പരസ്യമായി ഇത്തരം രഹസ്യങ്ങള്‍ വിളിച്ചു പറയാന്‍ മറ്റ് ബിജെപി നേതാക്കള്‍ തയ്യാറാകുന്നുണ്ടാവില്ല. അത്രത്തോളം ജാഗ്രത പാലിക്കാന്‍ ഇദ്ദേഹത്തിന് കഴിഞ്ഞില്ല. തെരഞ്ഞെടുപ്പില്‍ ബിജെപി സ്വീകരിക്കുന്ന നില അങ്ങോട്ട് തുറന്നുപറഞ്ഞു.

നേരത്തെ ഒ രാജഗോപാല്‍ പറഞ്ഞത് പ്രാദേശികമായി ഇത്തരം നീക്കുപോക്കുകള്‍ ഉണ്ടെന്നും അതിന്റെ ഗുണം ബിജെപിക്കാണ് എന്നുമാണ്. ഒരു ഡീല്‍ ഉറപ്പിക്കുമ്പോള്‍ ബിജെപി അവരുടെ ഗുണം ഉറപ്പാക്കുന്നുണ്ട് . നേമം അതിന് തെളിവാണെന്നും അദ്ദേഹം വിവരിച്ചു.

ഇപ്പോള്‍ ലീഗിന് നല്ല സ്വാധീനമുള്ള ഒരു മണ്ഡലത്തില്‍ അവര്‍ കച്ചവടമുറപ്പിച്ചു കഴിഞ്ഞു എന്നാണ് ഇത് സൂചിപ്പിക്കുന്നത്. ബിജെപിക്ക് നല്ല വോട്ടുള്ള മണ്ഡലത്തില്‍ ജയിപ്പിക്കാമെന്ന കരാര്‍ ലീഗും കോണ്‍ഗ്രസും യുഡിഎഫും ഈ തെരഞ്ഞെടുപ്പില്‍ ഏറ്റെടുത്തിരിക്കുന്നു.

ബിജെപി സ്ഥാനാര്‍ഥിത്വം തള്ളിപോയ ഗുരുവായൂര്‍ , തലശേരി, ദേവികുളം മണ്ഡലങ്ങളില്‍ മാത്രമല്ല, മറ്റ് മണ്ഡലങ്ങളിലും ഈ പ്രത്യുപകാരം നടക്കും.

ബിജെപി വോട്ടര്‍മാര്‍ക്ക്കൂടി സ്വീകാര്യനാകണം എന്ന നിലയിയാണ് ഗുരുവായുരിലെ ലീഗ് സ്ഥാനാര്‍ഥി കെഎന്‍എ ഖാദര്‍. പൗരത്വ നിയമ ഭേദഗതി കേരളം നടപ്പാക്കില്ലെന്ന് ഉറപ്പാക്കി കേരള നിയമസഭ പ്രമേയം പാസാക്കിയതാണ്.

അതിനെ സഭയില്‍ അനുകൂലിച്ച ആളുമാണ് കെഎന്‍എ ഖാദര്‍. എന്നാലിപ്പോര്‍ പൗരത്വ നിയമ ഭേദഗതിയുടെ ഭാഗമായി ജനങ്ങള്‍ ഫോറം പൂരിപ്പിച്ച്‌ നല്‍കേണ്ടതിന് എല്ലാ സഹായവും ലീഗ് ചെയ്യും എന്ന് പരസ്യമായി പറയുകയാണ്.

തങ്ങളുടെ തന്നെ നിലപാടിനെ തള്ളി ബിജെപി നിലപാടിനെ പരസ്യമായി ഖാദര്‍ സ്വീകരിക്കുന്നു. കുറച്ച്‌ വോട്ട് കിട്ടുന്നതിന് ഏതറ്റം വരയും പോകുന്നതിന് ലീഗും കോണ്‍ഗ്രസും തയ്യാറാകുകയാണ്.