പയ്യന്നൂരിൽ പാർട്ടി ഫണ്ട് നഷ്ടപെട്ടില്ലെന്ന് വ്യക്തമാക്കുന്ന വരവ് ചെലവ് കണക്കുമായി സിപിഎം ഏരിയ കമ്മിറ്റി രംഗത്ത്. പയ്യന്നൂര്‍ സിപിഎം ഫണ്ട് തിരിമറിയില്‍ പുതിയ കണക്കുകളാണ് സിപിഎം അവതരിപ്പിച്ചത്. ലോക്കൽ, ബ്രാഞ്ച് തലങ്ങളിൽ അവതരിപ്പിക്കാനുള്ള കണക്കിനും പയ്യന്നൂർ ഏരിയ കമ്മിറ്റി അംഗീകാരം കൊടുത്തിരിക്കുകയാണ്.

ആരോപണം നേരിട്ടവർകുറച്ച് കണക്കുകൾ മുന്നോട്ട് വച്ചിരുന്നു അതിനാണ് അംഗീകാരം കൊടുത്തത് . ധനദുർവിനിയോഗം നടന്നെന്ന് കുഞ്ഞികൃഷ്ണൻ കണ്ടെത്തിയിരുന്നു. എന്നാൽ ആ കണക്കുകൾ സിപിഎം ജില്ല നേതൃത്വം ഇത് വരെ അംഗീകരിച്ചിട്ടില്ല. ജൂലൈ 1, 2 തീയതികളിൽ പയ്യന്നൂർ ഏരിയക്ക് കീഴിലെ ലോക്കൽ കമ്മിറ്റികളിൽ വരവ് ചിലവ് കണക്ക് റിപ്പോർട്ട് ചെയ്യുവാനിരിക്കുകയാണ്.

പയ്യന്നൂരിൽ പാർട്ടി ഫണ്ടുകളിൽ ഒരു കോടിയോളം രൂപയുടെ തിരിമറിയാണ് നടന്നത്. തെളിവടക്കം പരാതി ജില്ലാ കമ്മിറ്റിക്ക് കൊടുത്തിരുന്നു. ടി ഐ മധുസൂധനന് പുറമെ ഏരിയ കമ്മറ്റി അംഗങ്ങളായ ടി വിശ്വനാധൻ, കെ കെ ഗംഗാധരൻ, ഓഫീസ് സെക്രട്ടറി കരിവെള്ളൂർ കരുണാകരൻ, മുൻ ഏരിയ സെക്രട്ടറി കെ പി മധു തുടങ്ങിയവർക്കെതിരെയും പരാതിയുണ്ടായിരുന്നു.

2021 ലെ നിയമസഭ തെരഞ്ഞെടുപ്പ് ഫണ്ട്, പാർട്ടി ഏരിയ കമ്മറ്റി ഓഫീസ് കെട്ടിടനിർമ്മാണ ഫണ്ട്, ധനരാജ് രക്തസാക്ഷി സഹായ ഫണ്ട് എന്നിവയിലെ പണം തിരിമറി നടത്തി എന്നാണ് ആരോപണം. ഒരു കോടിയിലേറെ രൂപ വ്യാജ രസീത് ഉണ്ടാക്കി നേതാക്കൾ പണം തട്ടിയെടുത്തെന്നും ജില്ലാ കമ്മറ്റിക്ക് പരാതി കിട്ടി . അന്വേഷണത്തിന് ശേഷം ആരോപണവിധേനായ പയ്യന്നൂർ എംഎൽഎ, ടി ഐ മധുസൂധനനെ പാർട്ടി തരംതാഴ്ത്തുകയും പരാതി ഉന്നയിച്ച ഏരിയ സെക്രട്ടറി വി.കുഞ്ഞികൃഷ്ണനെ മാറ്റി .