ഡൽഹി നായർ എന്ന വിവാദ പരാമർശം ശശി തരൂരിനെ കുറിച്ച് പറഞ്ഞത് തിരുത്തിയതിനു ശേഷം വീണ്ടും അദ്ദേഹത്തെക്കുറിച്ച് വാചാലനായി രംഗത്ത് വന്നിരിക്കുകയാണ് ജി സുകുമാരൻ നായർ. തരൂരിനെ പെരുന്നയിലേക്ക് ക്ഷണിച്ചത് ഡല്‍ഹി നായര്‍ എന്ന് വിളിച്ച തെറ്റ് തിരുത്താനാണെന്നും അദ്ദേഹം പറഞ്ഞു. തരൂരിനെ വിളിച്ചതില്‍ നായര്‍മാരായ മറ്റ് കോണ്‍ഗ്രസുകാര്‍ക്ക് വിഷമം ഉണ്ടായി. ശശി തരൂർ തറവാടി നായർ ആണ്. പ്രധാനമന്ത്രി ആകാന്‍ യോഗ്യതയുള്ളയാളാണ് ശശിതരൂരെന്നും സുകുമാരന്‍ നായര്‍ സ്വകാര്യ മാധ്യമത്തിനു നൽകിയ അഭിമുഖത്തിൽ പറയുകയുണ്ടായി.

എന്നാൽ അദ്ദേഹത്തെ പ്രധാനമന്ത്രിയാക്കാൻ 'കൂടെയുള്ളവര്‍ സമ്മതിക്കില്ലെങ്കില്‍ എന്ത് ചെയ്യാൻ സാധിക്കുമെന്നാണ് ജി സുകുമാരൻ നായർ ചോദിക്കുന്നത്. അധോഗതി എന്നല്ലാതെ എന്ത് പറയും . തരൂര്‍ ഉള്ളത് കൊണ്ട് ചിലര്‍ക്ക് പെരുന്നയില്‍ വരാന്‍ ആഗ്രഹം ഇല്ലായിരിന്നുവെന്നും ജി സുകുമാരൻ നായർ പറഞ്ഞു. അത് അവരുടെ അല്‍പ്പത്തരമായിട്ടാണ് കണക്കാക്കുന്നതെന്നും അദ്ദേഹം വ്യക്തമാക്കി. ഒരു നായര്‍ക്ക് മറ്റൊരു നായരെ കണ്ട് കൂടാ എന്നത് മന്നത്തിന്‍റെ കാലം മുതല്‍ കേട്ടിട്ടുണ്ടെന്നും അദ്ദേഹം തുറന്നടിച്ചു.