കോട്ടയത്ത്‌ വച്ച്‌ നടന്ന കേരള ഗസറ്റഡ്‌ ഓഫീസേഴ്‌സ്‌ അസോസിയേഷന്റെ സംസ്ഥാന സമ്മേളനത്തിന്റെ ഉദ്‌ഘാടന പ്രസംഗത്തില്‍ മന്ത്രി തിരുവഞ്ചൂര്‍ രാധാകൃഷ്‌ണന്‍ കെ.കെ. ലതിക എംഎല്‍എക്കെതിരെ എന്തിന്‌ പരാമര്‍ശം നടത്തി എന്നതാണ്‌ പലര്‍ക്കും മനസിലാവാത്തത്‌. സാധാരണ തിരുവഞ്ചൂരില്‍ നിന്നും ആരും പ്രതീക്ഷിക്കാത്തതുമാണ്‌. എന്‍ജിഒക്കാരെ അല്‍പം ചൂട്‌ പിടിപ്പിക്കാനായ്‌ ലേശം രാഷ്‌ട്രീയം പറഞ്ഞതാണ്‌ മന്ത്രി പുലിവാല്‌ പിടിച്ചത്‌. ഭര്‍ത്താവ്‌ ജയിലിലായതിനുശേഷം കെ.കെ.ലതികയ്‌ക്ക്‌ സഭയില്‍ ഇരിക്കപ്പൊറുതുയില്ലെന്നാണ്‌ നീണ്ട കരഘോഷത്തിനിടെ മന്ത്രി പറഞ്ഞത്‌. മന്ത്രിയും ആസ്വദിച്ചു, ജനങ്ങളും ആസ്വദിച്ചു. സി.പി.എമ്മും വിവിധ സ്‌ത്രീ സംഘടനകളും നിമിഷ നേരം കൊണ്ട്‌ റെഡി. പ്രസ്ഥാവനകളും പ്രതിഷേധവും തുടര്‍ന്നു. ഇതിനിടയ്‌ക്കെപ്പഴോ മന്ത്രി ഖേദം പ്രകടിപ്പിച്ചത്‌ ആരും കാര്യമാക്കിയില്ലന്ന്‌ മാത്രം.
എല്ലാം പെട്ടന്നവസാനിക്കുമെന്ന്‌ കരുതിയതാണ്‌. എന്നാല്‍ തിരുവഞ്ചൂര്‍ രാധാകൃഷ്‌ണനെതിരെയുള്ള പ്രതിഷേധം കൂടുതല്‍ ശക്തമാക്കാനാണ്‌ സി.പി.എം. ശ്രമം. ടി.പി. വധവുമായി ബന്ധപ്പെട്ട്‌ സി.പി.എമ്മിന്‌ തിരുവഞ്ചൂരിനോട്‌ ശക്തമായ എതിര്‍പ്പുണ്ടായിരുന്നു. അതുകൊണ്ട്‌ തന്നെ കിട്ടിയ അവസരം പാഴാക്കാതിരിക്കാനുള്ള ശ്രമത്തിലാണ്‌. അപകീര്‍ത്തികരമായ മന്ത്രിയുടെ പ്രസംഗത്തിനെതിരെ അവകാശ ലംഘനത്തിന്‌ നടപടിയെടുക്കണമെന്നാവശ്യപ്പെട്ട്‌ സ്‌പീക്കര്‍ക്ക്‌ കത്തും നല്‍കുകയുണ്ടായി. ഇത്‌കൂടാതെ എല്ലാ ജില്ലാകേന്ദ്രത്തിലും വിവിധ പ്രതിഷേധ പരിപാടികളും സംഘടിപ്പിക്കുന്നു.