റിയാദില് ലിഫ്റ്റ് നന്നാക്കുന്നതിനിടെ അപകടത്തില് പെട്ട് മലയാളിയായ യുവാവിന് ദാരുണാന്ത്യം
റിയാദില് ലിഫ്റ്റിന്റെ കേടുപാടുകള് തീര്ക്കുന്നതിനിടെ അപകടത്തില്പെട്ട് മലയാളി യുവാവ് മരിച്ചു. പാലക്കാട് കാരാകുറിശ്ശി സ്വദേശി പറയന്കുന്നത്ത് പി.കെ. മധു (30) ആണ് റിയാദിലുണ്ടായ അപകടത്തില് ദാരുണമായി മരിച്ചത്.
ലെക്സസ് വാഹനങ്ങളുടെ സൗദി അറേബ്യയിലെ അംഗീകൃത ഡീലറായ അബ്ദുല്ലത്തീഫ് ജമീല് കമ്പനിയുടെ റിയാദ് എക്സിറ്റ് ആറിലെ ഷോറൂം ബില്ഡിങ്ങിലാണ് സംഭവം. ഇവിടത്തെ ലിഫ്റ്റുകളുടെയും എസ്കലേറ്ററുകളുടെയും മെയിന്റനന്സ് കരാറെടുത്ത കമ്പനിയിലെ ടെക്നീഷ്യനാണ് മധു. ബുധനാഴ്ച വൈകീട്ട് അഞ്ചോടെ ലിഫ്റ്റ് നന്നാക്കാനാണ് മധു ഷോറൂമിലെത്തിയത്.
ആള് തിരിച്ചുവരാത്തതിനെ തുടര്ന്ന് പിറ്റേന്ന് രാവിലെ കരാര് കമ്പനിയില്നിന്ന് ആളുകള് ഷോറൂമിലേക്ക് അന്വേഷിച്ചുവരുകയായിരുന്നു. തുടര്ന്ന് ഷോറൂം സെക്യൂരിറ്റി ജീവനക്കാരുടെ സഹായത്തോടെ നടത്തിയ തിരച്ചിലില് കെട്ടിടത്തിന്റെ ഏറ്റവും താഴെ ലിഫ്റ്റിന്റെ വെല്ലില് വീണുകിടക്കുന്ന നിലയിലായിരുന്നു മൃതദേഹം. തലയില് മാത്രമാണ് പരിക്കുള്ളത്.
പൊലീസും ഫയര്ഫോഴ്സുമെത്തിയാണ് മൃതദേഹം പുറത്തെടുത്തത്. ആറു വര്ഷമായി റിയാദില് ജോലി ചെയ്യുന്ന മധു അവിവാഹിതനാണ്. പരേതനായ ശ്രീധരനാണ് പിതാവ്. മാതാവ്: ദേവകി. സഹോദരി: പ്രിയ. ശുമൈസി ആശുപത്രി മോര്ച്ചറിയില് സൂക്ഷിച്ചിരിക്കുന്ന മൃതദേഹം നാട്ടില് എത്തിക്കാനായുള്ള നടപടികള് ആരംഭിച്ചു.
https://www.facebook.com/Malayalivartha