ശ്രേയ മുത്തു പാതി മലയാളി പാതി തമഴ് 15ാം വയസ്സില്‍ തന്നെ അത്ഭുതങ്ങള്‍ സൃഷ്ടിക്കുകയാണ് അവള്‍. തന്റെ പ്രായത്തിലുള്ള മറ്റു കുട്ടികള്‍ ഹൈസ്‌ക്കൂളിലേക്ക് പഠിക്കാന്‍ പോകുമ്പോള്‍ ഈ പതിനഞ്ചുകാരിയായ കോളജിലേക്കാണ് പോകുന്നത്. അത് എങ്ങനെ സംഭവിച്ചു എന്നല്ലെ, പഠനത്തില്‍ മിടുക്കിയായതുതന്നെയാണ് കാരണം. ആറാം ഗ്രേഡ് മുതല്‍ ഡബിള്‍ പ്രെമോഷന്‍ ലഭിച്ചാണ് ഈ മിടുക്കി ഇവിടെവരെ ചെറുപ്രായത്തില്‍തന്നെ എത്തിയത്. 15 വയസ്സ് പൂര്‍ത്തിയായപ്പോഴേക്കും ശ്രേയ മുത്തു ഗ്രാജുവേഷനിലേക്ക് കടന്നു. ബിരുദത്തിനൊപ്പം മെഡിക്കല്‍ വിദ്യാഭ്യാസം കൂടി നേടിയാണ് ശ്രയ വീണ്ടും അദ്ഭുതം സൃഷ്ടിക്കുന്നത്. 

ഓഗസ്റ്റിലാണ് ഗ്രാന്‍ഡ് കാനിയന്‍ യൂണിവേഴ്‌സിറ്റിയിലല്‍ ശ്രേയയുടെ ക്ലാസുകള്‍ ആരംഭിക്കുന്നത്. മൂന്നു വര്‍ഷത്തെ ബിരുദ പഠനം കഴിഞ്ഞാല്‍ മെഡിക്കല്‍ സ്‌കൂളില്‍ ഇപ്പോഴെ ഒരു സീറ്റ് ഉറപ്പിച്ചാണ് പാതിമലയാളിയായ ശ്രേയയുടെ മുന്നേറ്റം. കാസാ ഗ്രാന്‍ഡേയിലെ അരിസോണ സ്റ്റേറ്റ് യൂണിവേഴ്‌സിറ്റി പ്രെപ്രേറ്ററി അക്കാദമിയിലെ വിദ്യാര്‍ഥിയായിരുന്നു ശ്രേയ. ഭാവിയില്‍ ഒരു സര്‍ജനോ, ത്വക്ക് രോഗ വിദഗ്ധയോ ആകാനാണ് അവളുടെ ആഗ്രഹം. എവിടെയെല്ലാം പഠിച്ചാലും ഒടുവില്‍ കാസാ ഗ്രാന്‍ഡേയില്‍ തന്നെ തിരികെ വന്ന് ജനങ്ങളെ സേവിക്കണമെന്നാണ് അവളുടെ ആഗ്രഹവും ഉയരങ്ങളിലേക്ക് കുതിക്കുന്ന ശ്രേയയുടെ മാതൃക അവളുടെ രക്ഷിതാക്കള്‍ തന്നെയാണ്. കൊല്ലം കിടങ്ങല്‍ സ്വദേശി ഡോ. കവിത ജഗദീശനാണ് മാതാവ്. പിതാവ് ഡോ. ജെറാള്‍ഡ് മുത്തു തമിഴ്‌നാട് ചെന്നെ സ്വദേശിയും. വര്‍ഷങ്ങളായി ഇരുവരും കാസാ ഗ്രാന്‍ഡേയില്‍ പ്രാക്ടീസ് ചെയ്യുന്നു. രക്ഷിതാക്കളെ കണ്ടു വളര്‍ന്ന ശ്രേയയുടെ എക്കാലത്തെയും ലക്ഷ്യം ഡോക്ടര്‍ ആവുകതന്നെയായിരുന്നു. ശ്രേയയുടെ സഹോദരനും ഡോക്ടര്‍ സ്വപ്നവുമായി മുന്നോട്ടു പോകുന്നുണ്ട്. കഴിഞ്ഞ വര്‍ഷം രക്ഷിതാക്കള്‍ പ്രാക്ടീസ് ചെയ്യുന്ന ഒയാസിസ് ഹെല്‍ത്ത് സെന്ററില്‍ ശ്രേയയും പോയിരുന്നു. അവിടെ വച്ച് രോഗികളുമായി ഇടപെടുകയും ചെറിയ സഹായങ്ങള്‍ ചെയ്യുകയും ചെയ്തു. 'ഡോക്ടര്‍മാരുടെ ഓഫീസിലാണ് ഞാന്‍ വളര്‍ന്നത്, രോഗികളുമായുള്ള ഇടപെടല്‍ പണ്ടുമുതലേ ശീലമാണ്. ഡോക്ടറാകുമ്പോള്‍ ഇക്കാര്യങ്ങള്‍ എന്നെ വലിയ രീതിയില്‍ സഹായിക്കുമെന്നാണ് കരുതുന്നതെന്നും' ശ്രേയ പറയുന്നുണ്ട്. 

മെഡിക്കല്‍ വിദ്യാഭ്യാസം നേരത്തെ ലഭിക്കുന്നതിന് നിരവധി കോഴ്‌സുകള്‍ക്ക് ശ്രേയ അപേക്ഷ നല്‍കിയിരുന്നു. ഡിഗ്രിക്ക് ശേഷം വേഗത്തില്‍ മെഡിക്കല്‍ വിദ്യാഭ്യാസം ലഭിക്കുന്നതിനായിരുന്നു ശ്രമം. എട്ടെണ്ണത്തില്‍ അപേക്ഷ നല്‍കിയ വിദ്യാര്‍ഥിനിക്ക് ഏഴെണ്ണത്തിലും അഡ്മിഷന്‍ ലഭിച്ചു. ഇപ്പോള്‍ ഡിഗ്രിയോടൊപ്പം മെഡിസിനും പഠിക്കാന്‍ സാധിക്കുന്ന കോഴ്‌സാണ് തിരഞ്ഞെടുത്തത്. നിരവധി കാരണങ്ങള്‍ കൊണ്ട് ജിസിയുവിന്റെ കോഴ്‌സാണ് ശ്രേയ തിരഞ്ഞെടുത്തത്. വരുന്ന ഓഗസ്റ്റില്‍ 16 വയസ്സാകുന്ന ഈ വിദ്യാര്‍ഥിനി തുടര്‍പഠനത്തിനായി തിരിക്കും. ജിസിയുവിലെ ശ്രേയയുടെ പ്രവേശനം പൂര്‍ണമായും മാര്‍ക്ക് അടിസ്ഥാനത്തില്‍ ആയിരുന്നു. കൂടാതെ, 1000 ഡോളറിന്റെ സ്‌കോളര്‍ഷിപ്പും ഈ മിടുക്കിക്ക് ലഭിച്ചു. വിവിധ സ്ഥാപനങ്ങളുടെയും വ്യക്തികളുടെയും പേരിലുള്ള നിരവധി സ്‌കോളര്‍ഷിപ്പുകളും ശ്രേയയെ തേടിയെത്തുനുണ്ട്‌.