പ്രവാസ ലോകത്ത് വീണ്ടും ഭാഗ്യം മലയാളികളെ തേടിയെത്തി. ചൊവ്വാഴ്ച നടന്ന ദുബൈ ഡ്യൂട്ടി ഫ്രീ നറുക്കെടുപ്പില്‍ ഏഴ് കോടി രൂപ സമ്മാനഭാഗ്യം കൈവന്നത് സുഹൃത്തുക്കളായ രണ്ട് പ്രവാസി മലയാളികള്‍ക്കാണ്. തിരുവനന്തപുരം സ്വദേശിയായ കമലാസനന്‍ നാടാര്‍ വാസുവും(56), സുഹൃത്തായ പ്രസാദും ചേര്‍ന്ന് വാങ്ങിയ ടിക്കറ്റിനാണ് 10 ലക്ഷം ഡോളറിന്റെ (ഏഴ് കോടിയിലധികം ഇന്ത്യന്‍ രൂപ) സമ്മാനമാണ് ലഭിച്ചത്. അതോടൊപ്പം തന്നെ 10 ലക്ഷം ഡോളറിന്റെ സമ്മാനം കസാഖിസ്ഥാന്‍ പൗരനായ ഖുസൈന്‍ യറംഷവിനും ലഭിച്ചു.

അതേസമയം ഒരു സ്റ്റീല്‍ ഫാബ്രിക്കേഷന്‍ കമ്ബനിയുടെ ഉടമയാണ് കമലാസനന്‍. സ്ഥാപനത്തിലെ വിതരണക്കാര്‍ക്ക് കടങ്ങള്‍ കൊടുത്തുതീര്‍ക്കാനുള്ളതിനാല്‍ കൃത്യസമയത്തുതന്നെയാണ് ഭാഗ്യം തന്റെ കൈകളിലെത്തിയതെന്നും കടം വീട്ടിക്കഴിഞ്ഞ് ബാക്കിയുള്ള പണം ഭാവിയിലേക്ക് കരുതിവെയ്ക്കാനാവുമെന്നുമാണ് അദ്ദേഹം വ്യക്തമാക്കിയത്. സെപ്തംബറില്‍ നാട്ടിലേക്ക് പോകുന്നതിനിടെ ദുബൈ വിമാനത്താവളത്തില്‍ വെച്ചാണ് ടിക്കറ്റ് എടുത്തത് തന്നെ. തന്റെ ജീവിതത്തിലെ ഭാഗ്യങ്ങളെല്ലാം അരികിലെത്തിയത് സെപ്തംബറിലായിരുന്നെന്നും അദ്ദേഹം വ്യക്തമാക്കിയിരുന്നു.