വീസയും ശമ്പളവുമില്ലാതെ ദുബായില് മലയാളികള് ദുരിതത്തില്
കരാമ ആസ്ഥാനമായി പ്രവര്ത്തിക്കുന്ന എന്ജിനീയറിങ് കമ്പനിയിലെ മലയാളികളടക്കം ഇരുനൂറിലേറെ തൊഴിലാളികള് മാസങ്ങളായി ശമ്പളമില്ലാതെയും വീസാ കാലാവധി അവസാനിച്ചതിനാല് നാട്ടിലേക്കു മടങ്ങാനാകാതെയും ദുരിതത്തില്.
മുഹൈസിനയിലെ താമസ സ്ഥലത്തെ വൈദ്യുതി വിച്ഛേദിച്ചിട്ടു രണ്ടു മാസമായി. കുടിവെള്ളം പോലും ഇടയ്ക്കിടെ മുടങ്ങുന്നു. ശമ്പളം ലഭിക്കാത്തതിനാല് സന്നദ്ധ സംഘടനകളുടെ സഹായത്താല് കിട്ടുന്ന ഭക്ഷണം ഒരു നേരമാക്കി. തൊട്ടടുത്തുള്ള മലയാളിയുടെ പലചരക്കുകടയില് കടം കുമിഞ്ഞുകൂടി.
യുഎഇ തൊഴില് മന്ത്രാലയത്തിനു നല്കിയ പരാതിയില് അനുകൂല തീരുമാനമുണ്ടായെങ്കിലും നടപടിയുണ്ടായില്ലെന്ന് തൊഴിലാളികള് പറയുന്നു. ഇന്ത്യന് കോണ്സുലേറ്റിലും ആഭ്യന്തര മന്ത്രി രമേശ് ചെന്നിത്തലയ്ക്കു നേരിട്ടും കഴിഞ്ഞ ദിവസം പരാതി നല്കിയതോടെ സഹായമുണ്ടാകുമെന്നാണ് പ്രതീക്ഷ.
19 വര്ഷം മുന്പ ആരംഭിച്ച കമ്പനി മികച്ച രീതിയില് പ്രവര്ത്തിച്ചു വരികയായിരുന്നു. നാട്ടിലേക്കു പണമയയ്ക്കാത്തതിനാല് മിക്കവരുടെയും കുടുംബം പട്ടിണിയിലാണെന്നു പാവറട്ടി സ്വദേശി പ്രശാന്ത് പറഞ്ഞു.
മാസങ്ങള്ക്കു മുന്പ് കുറച്ചെങ്കിലും ശമ്പളം തന്നിരുന്നുവെങ്കിലും പിന്നീട് പൂര്ണമായും മുടങ്ങിയതായി കണ്ണൂര് ഇരിട്ടി സ്വദേശി സോജന് പറഞ്ഞു. തൊഴിലാളികളില് ഭൂരിഭാഗത്തിന്റെയും വീസ കാലാവധി തീര്ന്നു. ചിലരുടേതു തീര്ന്നിട്ട് അഞ്ചു മാസത്തിലേറെയായി. പുതുക്കി നല്കാന് ഉടമകള് തയാറാകുന്നില്ല. റദ്ദാക്കി നാട്ടിലേക്ക് പോകാന് അനുവദിക്കണമെന്ന ആവശ്യത്തോടും മുഖം തിരിക്കുകയാണെന്നും ഇവര് പരാതിപ്പെടുന്നു. വീസ പുതുക്കാത്തതിനാല് പലരും നാട്ടില് പോയിട്ടു രണ്ടുവര്ഷമായി. മാതാപിതാക്കള് മരിച്ചിട്ടും ഭാര്യയ്ക്കും മക്കള്ക്കും ഗുരുതര അസുഖം വന്നിട്ടും പോകാനാവാത്തവരുമുണ്ടെന്നും മലപ്പുറം മേലാറ്റൂര് സ്വദേശി അബ്ദുല്ല പറഞ്ഞു. നാലു പേര്ക്ക് സൗകര്യമുള്ള കൊച്ചു മുറിയില് പത്തോളം പേരാണ് അന്തിയുറങ്ങുന്നതെന്നു തിരുവനന്തപുരം സ്വദേശി അനില് പറയുന്നു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha