സൗദി അറേബ്യ വർഗീയതയും മതതീവ്രവാദവും വെച്ചു പൊറുപ്പിക്കില്ല. ഇത്തരം ചിന്തകളുമായി സൗദിയിൽ എത്തുന്നവർക്ക് ഇനി കഷ്ടകാലം...മത തീവ്രവാദമായി ബന്ധപ്പെട്ട എന്തെങ്കിലും ഒരു നടപടി ആരിൽ നിന്നെങ്കിലും ഉണ്ടായതായി സംശയം തോന്നിയാൽ ഉടൻ 990 എന്ന നമ്പർ ഡയൽ ചെയ്യുകയേ വേണ്ടൂ...പൊലീസെത്തി അത്തരം ആളുകളെ പൊക്കും. സൗദിയിൽ കുറ്റവാളികൾക്കുള്ള അതേ ശിക്ഷ തന്നെ ഈ വർഗീയവാദികൾക്കും തീവ്രവാദികൾക്കും പൊലീസ് നൽകും

പോലീസ് സഹായം തേടുന്നതിന് സ്വദേശികൾക്ക് മാത്രമല്ല വിദേശികൾക്കും അവസരമുണ്ട് ..പലതരം കുറ്റവാളികൾ, തീവ്രവാദികൾ, വർഗീയവാദികൾ എന്നിവരെ കുറിച്ച് വിവരം നൽകാൻ വിദേശികളും സൗദികളും 990 എന്ന നമ്പറിൽ വിളിച്ചാൽ മതിയെന്ന് കഴിഞ്ഞ ദിവസമാണ് രാജ്യസുരക്ഷാ വിഭാഗം അറിയിച്ചത്..ഇത്തരം പ്രവർത്തനങ്ങൾ ഉണ്ടെന്ന് സംശയിക്കുന്ന സ്ഥലങ്ങളെ കുറിച്ച് ആർക്കും വിളിച്ചറിയിക്കാവുന്നതാണ്. 24 മണിക്കൂറും പ്രവർത്തിക്കുന്ന സെൻറർ വിവരം നൽകുന്നവരുടെ പേരുവിവരങ്ങൾ രഹസ്യമാക്കി സൂക്ഷിക്കും. ശേഷം കിട്ടിയ വിവരം ബന്ധപ്പെട്ട വകുപ്പുകളിലേക്ക് അയച്ച് സ്ഥിരീകരിക്കും.

ഇനി സൗദിക്കകത്തു നിന്ന് മാത്രമല്ല വിദേശത്ത് നിന്നും ബന്ധപ്പെട്ട വകുപ്പുകളിലേക്ക് വിളിക്കാവുന്നതാണ്. സൗദിക്കകത്ത് നിന്ന് വിവരം അറിയിക്കുന്നവർ 990 എന്ന നമ്പറും വിദേശത്ത് നിന്നാണെങ്കിൽ 00966112455922 നമ്പറും ആണ് ഉപയോഗിക്കേണ്ടതാണ്.

ഇന്ത്യയിലെ പൗരത്വ ഭേദഗതി നിയമം, പൗരത്വ രജിസ്റ്റർ എന്നീ വിഷയങ്ങളുടെ ചുവട് പിടിച്ച് സൗദിയിലുള്ള ഇന്ത്യൻ പ്രവാസികളിൽ ചിലർ മത വിദ്വേഷം പ്രചരിപ്പിക്കുന്ന സോഷ്യൽ മീഡിയ പോസ്റ്റുകളിട്ടതിനെ തുടർന്നാണ് ഈ നടപടി

ഇത്തരം പോസ്റ്റിട്ട ജുബൈലിലെ ഒരു കമ്പനി ജീവനക്കാരനായ കർണാടക സ്വദേശിയായ യുവാവിനെ പൊലീസ് അറസ്റ്റ് ചെയ്തതായി റിപ്പോർട്ടുകളുണ്ട് . എന്നാൽ അറസ്റ്റ് സംബന്ധിച്ച സ്ഥിരീകരണം സൗദി അധികൃതരുടെ ഭാഗത്ത് നിന്ന് ലഭിച്ചിട്ടില്ലെന്ന് പിന്നീട് ഇന്ത്യൻ എംബസി അറിയിക്കുകയും ചെയ്തിരുന്നു.

പരസ്പരം വിദ്വേഷം പ്രചരിപ്പിക്കുന്ന പോസ്റ്റുകൾ പൗരത്വ ഭേദഗതി നിയമത്തെ അനുകൂലിക്കുന്നവരുടെയും എതിർക്കുന്നവരുടെയും ഭാഗത്ത് നിന്നുണ്ടായി കൊണ്ടിരിക്കുന്ന സാഹചര്യത്തിൽ അത്തരം പോസ്റ്റുകളും പരാമർശങ്ങളും ഉണ്ടാകാതെ നോക്കുന്നതിനുള്ള നടപടിയുടെ ഭാഗമായാണ് പൊതുജനങ്ങൾക്ക് 990 ന്റെ സേവനം ലഭ്യമാക്കുന്നത് .