സൗദിയില്‍ തൊഴില്‍കേന്ദ്രങ്ങളില്‍ കര്‍ശന പരിശോധന
അനധികൃതമായി രാജ്യത്ത് തങ്ങുന്ന വിദേശതൊഴിലാളികളെ പിടികൂടാന്‍ വീടുകളിലെ തെരച്ചിലടക്കം മൂന്നുഘട്ടങ്ങളുള്ള കര്‍ശന പരിശോധനയ്ക്ക് സൗദി അറേബ്യ ഒരുങ്ങുന്നു. തൊഴില്‍നിയമം ലംഘിച്ച് കഴിയുന്നവരെ രാജ്യത്തുനിന്ന് പുറത്താക്കുകയാണ് ലക്ഷ്യം. വിപുലമായ സംവിധാനങ്ങളോടെ ആഭ്യന്തര, തൊഴില്‍ മന്ത്രാലയങ്ങള്‍ സംയുക്തമായാണ് പരിശോധന.
പൊതുസ്ഥലങ്ങളിലും നിരത്തുകളിലും തടിച്ചുകൂടുന്ന അനധികൃതരെ കണ്ടെത്തുന്നതാണ് ആദ്യഘട്ട പരിശോധനയെന്ന് ഹൈവേ പട്രോള്‍ സുരക്ഷാവിഭാഗം കമാന്‍ഡര്‍ മേജര്‍ ജനറല്‍ ഖാലിദ് അല്‍ ഖഹ്താനി അറിയിച്ചു. പ്രധാന നിരത്തുകളിലും ഹൈവേകളിലും ആദ്യഘട്ടത്തില്‍ പരിശോധന നടക്കും. കമ്പനികള്‍, കടകള്‍, കച്ചവടസ്ഥാപനങ്ങള്‍, വ്യവസായശാലകള്‍ എന്നിവ കേന്ദ്രീകരിച്ചാകും രണ്ടാംഘട്ട പരിശോധന. തൊഴില്‍മന്ത്രാലയത്തിന്റെ നിബന്ധനയനുസരിച്ചുള്ള ഇഖാമ, സ്‌പോണ്‍സര്‍ഷിപ് വ്യവസ്ഥ എന്നിവ പ്രവാസിതൊഴിലാളി പാലിക്കുന്നുണ്ടെന്ന് ഉറപ്പുവരുത്തും. മൂന്നാംഘട്ടത്തില്‍ വീടുകളും താമസസ്ഥലങ്ങളും കേന്ദ്രീകരിച്ചായിരിക്കും പരിശോധന. നിയമവിരുദ്ധര്‍ ഒളിച്ചുകഴിയുന്ന നഗരത്തിനുപുറത്തുള്ള വിദൂരപ്രദേശങ്ങളിലെ താമസസ്ഥലങ്ങള്‍, ഇസ്തിറാഹകള്‍ എന്നിവയിലെ പരിശോധനകള്‍ ഇതില്‍ ഉള്‍പ്പെടും. ദിവസക്കൂലിക്കാരായി രാജ്യത്ത് കഴിയുന്നവരില്‍ വലിയൊരു ഭാഗവും നിയമാനുസൃതമോ ഇഖാമ, സ്‌പോണ്‍സര്‍ഷിപ് വ്യവസ്ഥ പാലിച്ചോ അല്ല ജോലിചെയ്യുന്നതെന്ന് അധികൃതര്‍ വ്യക്തമാക്കുന്നു. സുരക്ഷാവിഭാഗങ്ങളുടെ സഹകരണത്തോടെ നടക്കുന്ന റെയ്ഡില്‍ മക്ക മേഖലയില്‍ ദിവസവും ശരാശരി 400-500 പേര്‍ നിയമലംഘനത്തിന് പിടിയിലാകുന്നുണ്ട്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
