എമിറേറ്റ്സ് എയർലൈൻസ് ദുബായിൽ നിന്ന് 9 നഗരങ്ങളിലേക്ക് വിമാന സർവീസുകൾ ആരംഭിച്ചു. കൊവിഡ് വ്യാപനത്തിന്‍റെ പശ്ചാത്തലത്തിൽ ശക്തമായ സുരക്ഷാ മാർഗങ്ങളാണ് എയർലൈൻസ് സ്വീകരിച്ചിരിക്കുന്നത്. പിപിഇ കിറ്റുകൾ ഉൾപ്പെടെയുള്ളവ ഉറപ്പ് വരുത്തിയതിനുശേഷമാണ് വിമാന സർവീസുകളെന്ന് അധകൃതർ അറിയിച്ചു.

ലണ്ടൻ ഹീത്രോ, ഫ്രാങ്ക്ഫർട്ട്, പാരിസ്, മിലാൻ, മഡ്രിഡ്, ഷിക്കാഗോ, ടൊറന്റോ, സിഡ്നി, മെൽബൺ എന്നീ നഗരങ്ങളിലേക്കാണ് ആദ്യഘത്തിൽ സർവീസുകൾ ആരംഭിച്ചത്. യുകെയിൽ നിന്ന് ഓസ്ട്രേലിയയിലേക്കുള്ള യാത്രികർക്ക് കണക്ഷൻ സൗകര്യവും എയർലൈൻ വാഗ്ദാനം ചെയ്തിട്ടുണ്ട്.

അതതു രാജ്യങ്ങൾ നിഷ്കർഷിക്കുന്ന സുരക്ഷാ മാനദണ്ഡങ്ങൾക്കനുസരിച്ചായിരിക്കും യാത്രക്കാരെ അനുവദിക്കുകയെന്ന് കമ്പനി നേരത്തെ വവ്യക്തമാക്കിയിരുന്നു. യാത്രികർ വിമാന യാത്രയുടെ 4 മണിക്കൂർ മുമ്പ് തന്നെ എയർപോർട്ടിലെത്തണമെന്നും കമ്പനി വ്യക്തമാക്കിയിട്ടുണ്ട്.

http://emirates.com എന്ന വെബ്സൈറ്റിലാണ് വിമാന യാത്രയ്ക്കുള്ള ടിക്കറ്റുകൾ ബുക്ക് ചെയ്യേണ്ടത്. എയർപ്പോർട്ടിലെത്തുന്ന യാത്രക്കാരെ തെർമൽ സ്കാനിങ്ങിലൂടെ താപനില പരിശോധിച്ച ശേഷമാണ് അകത്തേക്ക് പ്രവേശിപ്പിക്കുക. മാസ്കും ഗ്ലൗസും നിർബന്ധമാണ്. ഓരോ യാത്രയ്ക്ക് ശേഷവും വിമാനത്താവളവും പരിസരവും അണുവിമുക്തമാക്കുന്നുമുണ്ട്. എമിറേറ്റ്സ് ജീവനക്കാർക്കുള്ള പിപിഇ കിറ്റുകൾ അധികൃതർ തന്നെയാണ് നൽകുന്നത്.