മലയാളികള്ക്ക് നേരെ വീണ്ടും ആക്രമണം
രണ്ട് മലയാളികള് ദാരുണമായി കൊലചെയ്യപ്പെട്ടതിന്റെ നടുക്കം മാറും മുമ്പ് വീണ്ടും മലയാളിക്കെതിരെ ആക്രമണം. പട്ടാപ്പകല് മലയാളി യുവാവിനെ ആക്രമിച്ച് പരിക്കേല്പ്പിച്ച് പണവും ലാപ്ടോപ്പുകളും വാഹനവും 2000 ദിനാറിന്റെ സാധനങ്ങളും മുന്നംഗ കൊളള സംഘം കവര്ന്നു.
തൃശൂര് സ്വദേശി മിര്ഷാദിന്റെ ഉടമസ്ഥതയിലുളള സുഖോ സര്വീസസ് കമ്പനി ജീവനക്കാരന് കോഴിക്കോട് കൊയിലാണ്ടി സ്വദേശി ഷൈജുവാണ് ആക്രമിക്കപ്പെട്ടത്. മുഖത്ത് സാരമായി പരിക്കേറ്റ് ഇയാള് ഫര്വാനിയ ആശുപത്രിയില് ചികിത്സയിലാണ്. പ്രമുഖ ഓണ്ലൈന് ഷോപ്പിങ് സ്ഥാപനമായ സൂഖ് ഡോട്ട് കോമില് നിന്ന് സാധനങ്ങള് ഡെലിവറി ചെയ്യുന്ന കരാറെടുത്ത സ്ഥാപനമാണ് സുഖോ സര്വീസസ് കമ്പനി. സുഖ് ഡോട്ട്കോമില് നിന്ന് പര്ച്ചേസ് ചെയ്ത രണ്ട് ലോപ്ടോപ്പുകള് കൈമാറാനാണ് ഞായറാഴ്ച ഉച്ചക്ക് 12 മണിയോടെ ഷൈജു കമ്പനിയുടെ വാഹനത്തില് ഫര്വാനിയ ക്രൗണ് പ്ളാസക്ക് പിറകിലുളള കെട്ടിടത്തില് എത്തിയത്. ഒമ്പതാമത്തെ നിലയിലെ അപ്പാര്ട്ട്മെന്റിന്റെ മേല്വിലാസാമാണ് നല്കിയിരുന്നത്. ഇതനുസരിച്ച് ലിഫ്റ്റില് ഒമ്പതാം നിലയില് ഷൈജു ഇറങ്ങിയതും മുഖംമറച്ച മൂന്ന് ഡിസ്താഷധാരികള് ആക്രമിക്കുകയായിരുന്നു. ഭാരമുളള സാധനംകൊണ്ട് മുഖത്ത് ഇടിച്ച ആക്രമികള് മര്ദ്ദിച്ചവശനാക്കിയതോടെ ഷൈജുവിന് ബോധം നഷ്ടമായി.
കുറച്ച് നേരം കഴിഞ്ഞ് ബോധം വീണപ്പോഴേക്കും ഷൈജുവിന്റെ കൈവശമുണ്ടായിരുന്ന രണ്ട് ലാപ്ടോപ്പുകളും പഴ്സും വാഹനത്തിന്റെ താക്കോലും നഷ്ടമായിരുന്നു. താഴെയെത്തി നോക്കിയപ്പോള് വാഹനവും കാണാനുണ്ടായിരുന്നില്ല. ഫര്വാനിയ പോലീസ് സ്റ്റേഷനില് പരാതി നല്കിയിട്ടുണ്ട്.
https://www.facebook.com/Malayalivartha