സഹപ്രവര്ത്തകരെല്ലാം ചിന്നിച്ചതറി; അപകടത്തിന്റെ നടുക്കം വിട്ടുമാറാതെ രാജു
വര്ഷങ്ങളായി തന്നോടൊപ്പം ഉണ്ടും ഉറങ്ങിയും പണിയെടുത്തുകൊണ്ടിരിക്കുന്ന സഹപ്രവര്ത്തകന് ഒരൊറ്റ നിമിഷം കൊണ്ട് ചിന്നിച്ചിതറിയ ശരീരഭാഗങ്ങളായി കിടക്കുന്നത് കണ്ട ഞെട്ടലില് നിന്ന് ഇനിയും മുക്തനായിട്ടില്ല മലയാളിയായ രാജു വാസുക്കുട്ടി. തലനാരിഴക്ക് മരണത്തിന്റെ വായില് നിന്ന് നിസ്സാര പരിക്കുകളോടെ രക്ഷപ്പെട്ടതിന് ദൈവത്തോട് ഉളളുരുകി നന്ദി പറയുകയാണിദ്ദേഹം.
ശനിയാഴ്ച രാവിലെ ദുബൈയില് 14 പേരുടെ മരണത്തിനിടയാക്കിയ വാഹനാപകടത്തില് നിന്ന് അത്ഭുതകരമായി രക്ഷപ്പെട്ട പത്തനംതിട്ട കോന്നി സ്വദേശി രാജു വാസുക്കുട്ടി (42) കഴിഞ്ഞതൊന്നും ഓര്ത്തെടുക്കാന് ആഗ്രഹിക്കുന്നില്ല. ജീവിതം തട്ടിയെടുക്കുമായിരുന്ന അപകടം ഒരു ദുസ്വപ്നം പോലെ കണ്ട് ദുബൈ റാശിദ് ആശുപത്രിയില് ചികിത്സയില് കഴിയുകയാണ്. വാഹനത്തില് മലയാളിയായി ഇദ്ദേഹം മാത്രമാണ് ഉണ്ടായിരുന്നത്. ഒരു നിമിഷത്തെ ഡ്രൈവറുടെ അശ്രദ്ധയാണ് 14 പേരുടെ മരണത്തില് കലാശിച്ചത്. ഉമ്മുല് ഖുവൈനിലെ ലേബര് സപൈ്ള സ്ഥാപനത്തിലെ വാഹനമാണ് എമിറേറ്റ്സ് റോഡില് അപകടത്തില് പെട്ടത്. ഏഴ് വര്ഷത്തോളമായി രാജു ഈ കമ്പനിയില് ജോലി ചെയ്യുന്നു. വര്ഷങ്ങളായി രാജുവിനോടൊപ്പം പണിയെടുക്കുന്ന പത്ത് ബീഹാര് സ്വദേശികളും നാല് ബംഗ്ലാദേശ് സ്വദേശികളുമാണ് മരിച്ചത്. പരിക്കേറ്റ് രണ്ട് ബംഗാളികളുടെ നില അതീവ ഗുരുതരമായി തുടരുന്നു. പാക്കിസ്ഥാന് സ്വദേശിയാണ് മിനി ബസ് ഓടിച്ചിരുന്നത്. ഡ്രൈവര് ഉറങ്ങിപ്പോയതാണ് അപകട കാരണമെന്ന് രക്ഷപ്പെട്ടവര് പറയുന്നു. താമസസ്ഥലത്തു നിന്ന് പുലര്ച്ചെ എഴുന്നേറ്റ് പോരുന്നതുകൊണ്ട് തന്നെ മിക്കവരും ഉറക്കത്തിലായിരുന്നു. പൊടുന്നനെയാണ് ഭീകരമായ ശബ്ദവും നിലവിളിയും കേള്ക്കുന്നത്. നിര്ത്തിയിട്ടിരുന്ന ട്രക്കിന് നേരെ ബസ് പാഞ്ഞടുക്കുന്നതു കണ്ട് ഉറങ്ങാതിരുന്ന ചില തൊഴിലാളികള് ഉറക്കെ ശബ്ദമുണ്ടാക്കിയെങ്കിലും ഞൊടിയിടയിലാണ് എല്ലാം സംഭവിച്ചതെന്ന് രാജു വാസുക്കുട്ടി പറഞ്ഞു. ഇടിയുടെ ആഘാതത്തില് മിക്കവരും റോഡിലേക്ക് തെറിച്ചു വീണു. ഭീകര രംഗം കണ്ട് തലകറങ്ങിയ രാജുവിന് പിന്നെ ആശുപത്രിയില് എത്തിയതാണ് ഓര്മ്മയുളളത്. ആറ് മാസം മുമ്പാണ് അവധികഴിഞ്ഞ് നാട്ടില് നിന്നുമെത്തിയത്. അപകട വിവരമറിഞ്ഞ് നാട്ടില് നിന്ന് നിനക്കാത്ത ഫോണ് വിളികളാണ് വരുന്നതെന്ന് രാജു പറഞ്ഞു.
https://www.facebook.com/Malayalivartha