ആഗോള തലത്തില്‍ രാഷ്ടീയ ജാതിമത സാമുദായിക ഭേദമെന്യേ പ്രവാസികളെ ഒരു കുടക്കീഴില്‍ ഒരുമിപ്പിക്കുക, അവകാശസംരക്ഷണത്തിന്നായ് ഒരുമിച്ച്‌ നില്‍ക്കുക എന്നീ ആശയങ്ങളുമായി സ്ഥാപിതമായ കേരള പ്രവാസി വെല്‍ഫെയര്‍ അസ്സോസ്സിയേഷന്‍ (KPWA) ബഹറൈന്‍ ചാപ്റ്റര്‍ വരുന്ന വെള്ളിയാഴ്ച 11 ഓഗസ്റ്റ് 2017നു വൈകീട്ട് 6 മണിക്ക് ബഹറൈന്‍, സല്‍മാനിയയിലെ കലവറ റെസ്റ്റൗറന്റില്‍ പ്രഥമ പൊതുയോഗം സംഘടിപ്പിക്കുന്നു.

കുവൈത്ത്, ഖത്തര്‍, യു.എ.ഇ, സൗദി, ഒമാന്‍ , മലേഷ്യ, മാലിദ്വീപ് എന്നിവിടങ്ങളില്‍ സംഘടന പ്രവാസികള്‍ക്കായ് അസ്സോസ്സിയേഷനുകള്‍ രൂപീകരിച്ചിട്ടുണ്ട് എന്നും നാട്ടില്‍ കാസര്‍ക്കോട്, കണ്ണൂര്‍ , കോഴിക്കോട്, മലപ്പുറം, പാലക്കാട്, തൃശ്ശൂര്‍, തിരുവനന്തപുരം എന്നിവിടങ്ങളില്‍ ജില്ലാ കമ്മറ്റികളും കേരള ചാപ്റ്റര്‍ താത്കാലിക കമ്മറ്റിയും രൂപീകൃതമായിട്ടുണ്ട് എന്നും ഗ്ലൊബല്‍ ഭാരവാഹികള്‍ അറിയിക്കുന്നു.

മലയാളി പ്രവാസികളെയും മുന്‍പ്രവാസികലേയും ഇന്ത്യക്കകത്തുള്ള ആഭ്യന്തര പ്രവാസികളെയും സംഘടിപ്പിക്കാനും പുനരധിവാസ ആസൂത്രണങ്ങള്‍ക്കും പദ്ധതികള്‍ക്കും നോര്‍ക്ക ഇതര പ്രവാസി കാര്യ സര്‍ക്കാര്‍ വകുപ്പുകളുമായി സംയോജിച്ച്‌ വിജയകരമായി മുന്നോട്ട് പോകുവാനും ആണു KPWAയുടെ തീരുമാനമെന്ന് ഇതിനകം തന്നെ പ്രഖ്യാപിക്കപ്പെട്ടിരിക്കുന്നു.

അടയുന്ന പ്രവാസവാതിലുകള്‍ക്കപ്പുറം വ്യാകുലതകളും അരക്ഷിത ചിന്തകളുമായി പ്രവാസി അമ്ബരന്ന് നില്‍ക്കേണ്ട സമയം അതിക്രമിച്ചു എന്ന തിരിച്ചറിവും സര്‍ക്കാര്‍ സംവിധാനത്തെ ആശ്രയിക്കുന്നതോടൊപ്പം നിലനില്‍പ്പിന്നായ് സ്വയം സജ്ജമാകാനും KPWA പ്രവാസികളോട് ആഹ്വാനം ചെയ്യുന്നു. 300 ദിവസങ്ങള്‍ക്കകം തന്നെ 18600 അംഗങ്ങളുമായി ജൈത്രയാത്ര തുടരുന്ന സംഘടന രാഷ്ടീയ-സാമുദായിക ഭേദമെന്യേ നിലനില്‍ക്കും എന്നും പ്രവാസികളുടെ ഒറ്റക്കും കൂട്ടായുമുള്ള സംരംഭങ്ങള്‍, അവകാശങ്ങള്‍ , സഹായങ്ങള്‍ എന്നിവക്ക് പിന്തുണയും നിര്‍ദ്ദേശങ്ങളും നല്‍കി മുന്നോട്ട് പോകും എന്നും സംഘടന യാതൊരു വിധ സാമ്ബത്തിക പദ്ധതികളും ഏറ്റെടുത്തിട്ടില്ല എന്നും ഭാരവാഹികള്‍ അറിയിച്ചു.