വിമാന ഇന്ധന വില വീണ്ടും കൂടിയതായുള്ള വാർത്തയാണ് പുറത്തുവന്നിരിക്കുന്നത്. പ്രവാസികൾ ഉൾപ്പെടെയുള്ള വിമാനയാത്രക്കാർക്ക് യാത്രക്കാരെ പ്രതിസന്ധിയാക്കുന്നതാണ് ഇത്.ഇന്ധന വില കൂട്ടിയ സാഹചര്യത്തിൽ രംഗത്തെത്തിയിരിക്കുകയാണ് ഇന്ത്യന്‍ വിമാനക്കമ്പനിയായ സ്പൈസ് ജെറ്റ്.

15 ശതമാനം നിരക്ക് കൂട്ടാതെ പിടിച്ചുനിൽക്കാനാകില്ലെന്ന് കമ്പനി വ്യക്തമാക്കുന്നത്. നിരക്ക് വർദ്ധന അനിവാര്യമെന്ന നിലപാടിൽ തന്നെയാണ് മറ്റ് വിമാനകമ്പനികളും.എന്നാൽ പ്രത്യക്ഷത്തിൽ സ്പൈസ് ജെറ്റ് അല്ലാതെ മാറ്റ് വിമാന കമ്പനികൾ വിമാന ഇന്ധന വില വില ഉയർത്തിയതിൽ പ്രതികരിച്ചിട്ടില്ല. വിമാന ഇന്ധനത്തിന്റെ  വില വർദ്ധനയും രൂപയുടെ മൂല്യത്തകര്‍ച്ചയും ചൂണ്ടിക്കാട്ടിയാണ് ടിക്കറ്റ് നിരക്കില്‍ വര്‍ദ്ധനവ്  നടപ്പാക്കണമെന്ന സ്‌പേസ് ജെറ്റ് ആവശ്യപ്പെടുന്നത്.

യുഎസ് ഡോളറിനെതിരെ ഇന്ത്യന്‍ രൂപയുടെ മൂല്യം ഇടിയുന്നത് വിമാനക്കമ്പനികളെ ബാധിക്കുന്നുണ്ടെന്നാണ് കമ്പനിയുടെ വിശദീകരണം.''യുഎസ് ഡോളറിനെതിരെ ഇന്ത്യന്‍ രൂപയുടെ മൂല്യം കുറയുന്നത് വിമാനക്കമ്പനികളെ സാരമായി ബാധിക്കുന്നു. കാരണം, ഞങ്ങളുടെ ഗണ്യമായ ചെലവ് മുഴുവന്‍ ഡോളറിലാണ് നടക്കുന്നത്.

വിലയും രൂപയുടെ മൂല്യത്തകര്‍ച്ചയും മുന്‍നിര്‍ത്തി ആഭ്യന്തര വിമാനക്കമ്പനികള്‍ക്ക് യാത്രാനിരക്ക് വര്‍ധിപ്പിക്കുകയല്ലാതെ മറ്റൊരു വഴിയുമില്ല. പ്രവര്‍ത്തനച്ചെലവ് മികച്ച രീതിയില്‍ നിലനിര്‍ത്തുന്നതിന് നിരക്കുകളില്‍ കുറഞ്ഞത് 10-15% വര്‍ദ്ധനവ് ആവശ്യമാണെന്ന് ഞങ്ങള്‍ വിശ്വസിക്കുന്നു.'- സ്പൈസ് ജെറ്റ് ചെയര്‍മാനും മാനേജിംഗ് ഡയറക്ടറുമായ അജയ് സിംഗ് ഒരു പ്രസ്താവനയില്‍ പറഞ്ഞു.

2022ന്റെ തുടക്കം മുതല്‍ വിമാന ഇന്ധനവില ഉയരുകയാണ്. ഓരോ 14 ദിവസം കൂടുമ്പോഴാണ് എണ്ണവിതരണ കമ്പനികള്‍ വിലനിര്‍ണയം നടത്തുന്നത്. ജനുവരി ഒന്നുമുതല്‍ പരിശോധിച്ചാല്‍ വിമാന ഇന്ധനത്തിന്റെ വിലയില്‍ 50 ശതമാനം വര്‍ധനയാണ് രേഖപ്പെടുത്തിയത്.വിമാനം സര്‍വീസ് നടത്തുന്ന ചെലവില്‍ 40 ശതമാനവും വിമാന ഇന്ധനം വാങ്ങുന്നതിന് വരുന്ന വിലയാണ്.

അടുത്തിടെ മാര്‍ച്ച് 16നാണ് വിമാന ഇന്ധനത്തിന്റെ വില കുത്തനെ ഉയര്‍ത്തിയത്. അന്ന് 18.3 ശതമാനത്തിന്റെ വര്‍ധനയാണ് രേഖപ്പെടുത്തിയത്. ഇപ്പോൾ ഇതാ ജൂൺ പകുതിയിൽ തന്നെ വീണ്ടും വിമാന ഇന്ധന വില കൂട്ടിയിരിക്കുകയാണ്. വരുന്ന മാസങ്ങള്‍ പ്രവാസികള്‍ കൂട്ടത്തോടെ നാട്ടില്‍ വരുന്ന സമയമാണ്. ടിക്കറ്റ് നിരക്ക് ഉയരുന്നത് പ്രവാസികള്‍ അടക്കമുള്ളവരുടെ വരവിനെ പ്രതികൂലമായി ബാധിക്കും.