സൗദിയിൽ മൂന്ന് ദിവസം കഴിയുന്നതോടെ കാലാവസ്ഥ മാറ്റത്തിനുള്ള സാധ്യതയെന്ന് കാലാവസ്ഥ വിദഗ്ധർ. സെപ്റ്റംബറോടെ പ്രസന്നമായ കാലാവസ്ഥയുള്ള ശരത്കാലത്തിന് തുടക്കം കുറിക്കുമെന്ന് പ്രതീക്ഷിക്കുന്നുണ്ടെന്ന് ദേശീയ കാലാവസ്ഥ നിരീക്ഷണ കേന്ദ്രം വക്താവ് അഖീൽ അൽ അഖീൽ പറഞ്ഞു .

ഈ മാസത്തെ അവസാന ആഴ്ചയിൽ കാലാവസ്ഥയ്ക്ക് ഒരു മാറ്റം സംഭവിക്കുന്നത് കണക്കാക്കുന്നുവെന്നും ഇനിവരുന്ന ദിവസങ്ങളിൽ പ്രകടമാകുന്ന കാലാവസ്ഥ വ്യത്യാസം അന്തരീക്ഷ ഊഷ്മാവ് ക്രമേണ കുറയുന്ന ഘട്ടമായിരിക്കുമെന്നും അദ്ദേഹം അഭിപ്രായപ്പെട്ടു.

അടുത്ത കാലത്തായി, മക്ക, മദീന, മറ്റ് തെക്കന്‍ ഭാഗങ്ങള്‍ എന്നിവയുള്‍പ്പെടെയുള്ള പ്രദേശങ്ങളില്‍ മിതമായതോ കനത്തതോ ആയ മഴയും ശക്തമായ കാറ്റും അനുഭവപ്പെടുന്നുണ്ട്. പല ദിവസങ്ങളിലും ശക്തമായ പൊടിക്കാറ്റുണ്ടായിരുന്നു.

സൗദിയിലെ ചില ഭാഗങ്ങളില്‍ കഴിഞ്ഞ ആഴ്ചകളില്‍ താപനില 50 ഡിഗ്രി സെല്‍ഷ്യസ് വരെ ഉയര്‍ന്നിരുന്നു. കിഴക്കന്‍ പ്രവിശ്യയില്‍ കന്നത്ത ചൂട് അനുഭവപ്പെട്ടത്. രാജ്യത്തെ നാല് മേഖലകളില്‍ താപനില 46 മുതല്‍ 50 ഡിഗ്രി സെല്‍ഷ്യസ് വരെ എത്തിയതായി നാഷണല്‍ സെന്റര്‍ ഓഫ് മെറ്റീരിയോളജി (എന്‍സിഎം) അറിയിച്ചിരുന്നു.

കനത്ത വെയിലില്‍ തുറസായ സ്ഥലങ്ങളില്‍ ജോലി ചെയ്യുന്നതിന് കഴിഞ്ഞ ഏതാനും മാസങ്ങളായി നിരോധനമേര്‍പ്പെടുത്തിയിരുന്നു. ഉച്ചവിശ്രമ നിയമം ഗള്‍ഫ് രാജ്യങ്ങളില്‍ നിലവിലുള്ള മാസങ്ങളാണ് കടന്നുപോയത്. യുഎഇയിലെ ചില ഭാഗങ്ങളില്‍ ഈ വര്‍ഷം ഉയര്‍ന്ന താപനില 50 ഡിഗ്രി സെല്‍ഷ്യസ് രേഖപ്പെടുത്തിയിരുന്നു.