പ്രവാസികൾക്ക് ഇപ്പോൾ കുറഞ്ഞ നിരക്കിൽ നാട്ടിലേക്ക് യാത്രചെയ്യാൻ പറ്റിയ അവസരമാണ്. മിക്ക വിമാനക്കമ്പനികളും ഇപ്പോൾ ഓഫർ നിരക്കിൽ ടിക്കറ്റുകൾ ലഭ്യമാക്കിയിട്ടുണ്ട്. ഇപ്പോൾ സൗദിയിലെ പ്രവാസികൾക്കായി 3000 രൂപ മുതൽ ടിക്കറ്റുകൾ ലഭ്യമാക്കിയിരിക്കുകയാണ് കുവൈറ്റ് ആസ്ഥാനമായി പ്രവർത്തിക്കുന്ന ജസീറ എയർവെയ്സ്. ഇന്ത്യയിലേക്ക് യാത്ര ചെയ്യുന്നവർക്ക് ഈ വിമാനപ്പമ്പനി വൻ ഓഫറാണ് പ്രഖ്യാപിച്ചിരിക്കുന്നത്. 169 റിയാൽ മുതലാണ് ടിക്കറ്റ് നിരക്ക്.

മൂന്നു ദിവസത്തിനുള്ളിൽ ടിക്കറ്റ് എടുക്കുന്നവർക്കാണ് ഈ ഇളവ് ലഭിക്കുക. ജിദ്ദ, ഹായിൽ, റിയാദ് എന്നിവിടങ്ങളിൽ നിന്ന് കൊച്ചിയിലേക്ക് 349 റിയാലും, ഖസീം,ദമ്മാം, മദീന എന്നിവിടങ്ങളിൽ നിന്ന് 299 റിയാലുമാണ് ടിക്കറ്റ് നിരക്ക്.കേരളത്തിൽ കൊച്ചിയിലേക്ക് മാത്രമാണ് ജസീറ എയർവെയ്സിന് സർവീസുള്ളത്. കൊച്ചി വിമാനത്താവളത്തെ ആശ്രയിക്കുന്ന പ്രവാസികൾക്ക് ഈ അവസരം പരമാവധി പ്രയോജനപ്പെടുത്താം.

കൊച്ചിക്ക് പുറമെ ഇന്ത്യയിൽ മുംബൈ, ദൽഹി, ബംഗളൂരു, ചെന്നൈ, ഹൈദരാബാദ് എന്നിവിടങ്ങിലേക്ക് ജസീറ എയർവേയ്സ് സർവീസ് നടത്തുന്നുണ്ട്. ജിദ്ദയിൽനിന്ന് മുംബൈയിലേക്ക് 199 റിയാലും ബംഗളൂരുവിലേക്ക് 299 റിയാലും ഹൈദരാബാദിലേക്ക് 249 റിയാലുമാണ് നിരക്ക്. എന്നാൽ റിയാദിൽനിന്ന് ചെന്നൈയിലേക്ക് 299, ഹൈദരാബാദിലേക്ക് 229, മുംബൈ, ദൽഹി എന്നിവിടങ്ങളിലേക്ക് 169, ബംഗളൂരു 299 എന്നിങ്ങിനെയാണ് ഈടാക്കുന്നത്.

കൂടാതെ ദമാമിൽ നിന്നു ചെന്നൈയിലേക്കും ഹൈദരാബാദിലേക്കും 299 റിയാലാണ്. അൽ ഖസീം, ഹായിൽ, മദീന എന്നിവിടങ്ങളിൽ നിന്നും ഇന്ത്യയിലെ വിവിധ വിവാനത്താവളങ്ങളിലേക്കും ടിക്കറ്റിന് ഓഫർ പ്രഖ്യാപിച്ചിട്ടുണ്ട്.അതേസമയം വിവിധ നഗരങ്ങളിലേക്ക് കുറഞ്ഞ നിരക്കില്‍ ടിക്കറ്റുകള്‍ നല്‍കുന്ന ഹോളിഡേ സെയിൽ ഇത്തിഹാദ് എയര്‍വേയ്‌സും പ്രഖ്യാപിച്ചിട്ടുണ്ട്.സെപ്റ്റംബര്‍ 10 വരെ ബുക്ക് ചെയ്യുന്നവര്‍ക്കാണ് ഹോളിഡേ സെയില്‍ ഓഫറിന്റെ ഭാഗമായി കുറഞ്ഞ നിരക്കില്‍ ടിക്കറ്റ് ലഭിക്കുക.

സെപ്റ്റംബര്‍ 11 മുതല്‍ 2024 മാര്‍ച്ച് 24 വരെ യാത്ര ചെയ്യാനുള്ള ടിക്കറ്റുകളാണ് അവധിക്കാല ഓഫറിന്റെ പരിധിയില്‍ വരികയെന്ന് കമ്പനി അറിയിപ്പില്‍ പറയുന്നു. ഇക്കണോമി ക്ലാസില്‍ വിവിധ നഗരങ്ങളിലേക്ക് അബുദാബിയില്‍ നിന്ന് 895 ദിര്‍ഹം മുതലാണ് ടിക്കറ്റ് നിരക്കുകള്‍ ആരംഭിക്കുന്നത്. അടുത്ത വർഷം ജനുവരി മുതൽ തിരുവനന്തപുരത്ത് നിന്ന് അബുദാബിയിലേക്ക്‌ എത്തിഹാദ് ആഴ്ചയിൽ അഞ്ച് സർവീസ് നടത്തും. ഇതിലൂടെ നേരത്തേ തിരുവനന്തപുരത്തുനിന്നുണ്ടായിരുന്ന സർവീസ് പുനരാരംഭിക്കുകയാണ് ഇത്തിഹാദ്. തിരുവനന്തപുരത്തേക്കും കോഴിക്കോട്ടേക്കുമുള്ള പ്രതിദിന സര്‍വീസുകള്‍ പുനരാരംഭിക്കാനും കൊച്ചിയിലേക്ക് എട്ട് അധിക സര്‍വീസുകള്‍ ആരംഭിക്കാനുമാണ് ഇത്തിഹാദ് എയര്‍വേയ്‌സ് തീരുമാനിച്ചിരുക്കുന്നത്.

ജനുവരി ഒന്നുമുതലാണ് കോഴിക്കോട്ടേക്കും പ്രതിദിന സര്‍വീസുകള്‍ പുനരാരംഭിക്കുക. തിരുവനന്തപുരത്തേക്ക് പുലര്‍ച്ചെ 2.20നും കോഴിക്കോടേക്ക് ഉച്ചയ്ക്ക് 1.40നുമാണ് അബുദാബിയില്‍ നിന്ന് പുറപ്പെടുക. ഇവിടെ നിന്ന് കൊച്ചിയിലേക്കുള്ള എട്ട് അധിക സര്‍വീസുകള്‍ നവംബര്‍ മുതലാണ്. കോവിഡ് കാലത്ത് നിര്‍ത്തിവച്ച ചില സെക്ടറുകളിലേക്ക് അബുദാബി തന്നെ ആസ്ഥാനമായുള്ള ബജറ്റ് എയര്‍ലൈനായ എയര്‍ അറേബ്യ സര്‍വീസ് തുടങ്ങിയിരുന്നു. ഇത്തിഹാദ് കൂടി സര്‍വീസ് വര്‍ധിപ്പിച്ചതിനാല്‍ ഈ സെക്ടറില്‍ നിരക്കു കുറഞ്ഞേക്കും.