സൗദിയുടെ പലഭാഗങ്ങളിലും ശക്തമായ മഴയാണ് കഴിഞ്ഞ ദിവസം പെയ്തത്. മദീനയിൽ കഴിഞ്ഞ ദിവസമുണ്ടായത് ശക്തമായ മഴയും കാറ്റുമാണ്. പൊതുജനങ്ങളുടെ സുരക്ഷ കണക്കിലെടുത്ത് മേഖലയിൽ റെഡ് അലേർട്ടും പ്രഖ്യാപിച്ചിരുന്നു. മഴ ശക്തമായതോടെ വെള്ളത്തിന്റെ കുത്തൊഴുക്കാണ് പല സ്ഥലങ്ങളിലും. ശനിയാഴ്ച ഉച്ചക്ക് ഒരു മണിയോടെയാണ് മഴ ആരംഭിച്ചത്.

രാത്രി 9 വരെ ശക്തമായ മഴക്ക് സാധ്യതയുണ്ടെന്ന് കാലാവസ്ഥ നിരീക്ഷണ കേന്ദ്രം അറിയിച്ചിരുന്നു. പല സ്ഥലങ്ങളിലും റോഡുകളിൽ വെള്ളം കയറി. ഗതാഗതം തടസപ്പെട്ടു. താഴ്ന്ന പ്രദേശങ്ങളിലും വെള്ളക്കെട്ടുകളിലേക്കും പോകരുതെന്ന് അധികൃതർ മുന്നറിയിപ്പ് നൽകി. മദീന ഉൾപ്പെടെ ചില പ്രദേശങ്ങളിൽ ഇന്ന് മഴ പെയ്യുമെന്ന് നേരത്തെ കാലാവസ്ഥ നിരീക്ഷണ വിഭാഗം മുന്നറിയിപ്പ് നൽകിയിരുന്നു.

അതേസമയം യുഎഇയിൽ കാലാവസ്ഥ ഇന്ന് ഭാഗികമായി മേഘാവൃതമായിരിക്കുമെന്ന് നാഷണൽ സെന്റർ ഓഫ് മെറ്റീയോറോളജി അറിയിച്ചു. കിഴക്കൻ തീരത്ത് മഴക്ക് സാധ്യതയുണ്ട്. കിഴക്കൻ തീരത്ത് താഴ്ന്ന മേഘങ്ങൾ പ്രത്യക്ഷപ്പെടും. ഉച്ചയോടെ മഴ കിഴക്കോട്ടും തെക്കോട്ടും എത്താനുള്ള സാധ്യതയുള്ളതായും എൻ.സി.എം അറിയിച്ചു. മഴ കുറവുള്ള സമയങ്ങളിൽ ചൂട് ഉയർന്ന് തന്നെ നിൽക്കും. പകൽ സമയത്ത് നേരിയതോ മിതമായതോ തെക്കുകിഴക്ക് നിന്ന് വടക്കുകിഴക്ക് ഭാഗത്തേയ്ക്ക് കാറ്റ് വീശുമെന്നും നാഷണൽ സെന്റർ ഓഫ് മെറ്റീരിയോളജി വ്യക്തമാക്കി.