നവീകരണ പദ്ധതികളുടെ ഭാഗമായി എയർ ഇന്ത്യ അടിമുടി മാറുകയാണ്. പുതിയ ലോഗോ, എയർക്രാഫ് ഉദ്യോഗസ്ഥർക്ക് പുതിയ യൂണിഫോം, പുതിയ 470 വിമാനങ്ങൾ വാങ്ങാനുള്ള കരാർ, ആർട്ടിഫിഷ്യൽ ഇന്റലിജൻസ് സംവിധാനങ്ങൾ ഉൾപ്പെടുത്തുന്നതിനായുള്ള ശ്രമങ്ങൾ എല്ലാം എയർ ഇന്ത്യ നടത്തിവരികയാണ്. ടാറ്റാ ഗ്രൂപ്പ് ഏറ്റെടുത്ത ശേഷമുള്ള റീ ബ്രാൻഡിംഗിൻറെ ഭാഗമായാണ് ലോഗോയും നിറങ്ങളും മാറ്റിയത്. മോടി പിടിപ്പിക്കൽ മാത്രമല്ല യാത്രക്കാർക്ക് കൂടുതൽ യാത്രാ അവസരങ്ങൾ നൽകാനുള്ള പ്ലാനും കമ്പനി ഒരുക്കുന്നുണ്ട്.

എയര്‍ ഇന്ത്യയുടെ ഒറ്റ ടിക്കറ്റുമായി ഇനി യൂറോപ്പിലെ വിവിധ നഗരങ്ങള്‍ തടസ്സങ്ങളില്ലാതെ ചുറ്റിക്കണ്ട് ആസ്വദിക്കാം. ഇതേ ടിക്കറ്റ് ഉപയോഗിച്ച് ബസ്, ട്രെയിന്‍ യാത്രയും നടത്താമെന്നതിനാല്‍ എയര്‍പോര്‍ട്ട് സൗകര്യമില്ലാത്ത ചെറു നഗരങ്ങളും ചുറ്റിക്കാണാനാകുമെന്ന പ്രത്യേകതയുമുണ്ട്. ആക്സസ് റെയിലുമായി സഹകരിച്ചുള്ള ഇന്റര്‍മോഡല്‍ ഇന്റര്‍ലൈന്‍ കരാര്‍ വഴിയാണ് യാത്രക്കാര്‍ക്ക് എയര്‍ ഇന്ത്യ ഈ സൗകര്യം ലഭ്യമാക്കുന്നത്. ലഗേജ് അലവന്‍സ് നിലനിറുത്തിക്കൊണ്ട്, 100ലേറെ യൂറോപ്യന്‍ നഗരങ്ങളില്‍ ഈ ടിക്കറ്റുപയോഗിച്ച് യാത്ര ചെയ്യാം.

ഓസ്ട്രിയ, ബെല്‍ജിയം, ജര്‍മ്മനി, ചെക്ക് റിപ്പബ്ലിക്, ഹംഗറി, ഇറ്റലി, യു.കെ എന്നിവിടങ്ങളിലെ നഗരങ്ങളും പട്ടണങ്ങളും അനായാസമായി ബന്ധിപ്പിക്കുന്ന ഒരു ഇന്റര്‍മോഡല്‍ യാത്രാ സൗകര്യമാണിത്. ആംസ്റ്റര്‍ഡാം, ബെമിംഗ്ഹം, ലണ്ടന്‍ ഹീത്രൂ, ലണ്ടന്‍ ഗാറ്റ്വിക്ക്, മിലാന്‍, വിയന്ന എന്നിവിടങ്ങളിലേക്കും ഈ സേവനം നീട്ടിയിട്ടുണ്ട്.

ആക്‌സസ് റെയിലുമായുള്ള പങ്കാളിത്തത്തിലൂടെ എയര്‍ ഇന്ത്യയ്ക്ക് ഭാവിയിലും ഉപഭോക്താക്കള്‍ക്കായി കൂടുതല്‍ ലക്ഷ്യസ്ഥാനങ്ങളും കൂടുതല്‍ സാധ്യതകളും തടസ്സങ്ങളില്ലാത്ത രീതിയില്‍ വാഗ്ദാനം ചെയ്യാന്‍ കഴിയുമെന്ന് എയര്‍ ഇന്ത്യയിലെ ഉന്നത ഉദ്യോഗസ്ഥനായ നിപുണ്‍ അഗര്‍വാള്‍ പറഞ്ഞു. നിലവില്‍ എയര്‍ ഇന്ത്യയുടെ ഈ ടിക്കറ്റുകള്‍ ആഗോളതലത്തില്‍ ട്രാവല്‍ ഏജന്റുമാര്‍ വഴി ബുക്ക് ചെയ്യാന്‍ സാധിക്കും.

ഇന്ത്യയുടെ മുൻനിര എയർലൈൻ എന്ന നിലയിൽ കമ്പനിയിലാകെ മാറ്റം കൊണ്ടുവരാൻ ഒരുങ്ങുകയാണ്. ഇക്കഴിഞ്ഞ ജൂണിൽ, 70 ബില്യൺ ഡോളർ ചെലവഴിച്ച്, 470 പുതിയ വിമാനങ്ങൾ വാങ്ങുന്നതിനുള്ള കരാറിൽ എയർബസുമായും ബോയിംഗുമായും എയർ ഇന്ത്യ ഒപ്പു വെച്ചിരുന്നു. നവംബറിൽ ഈ വിമാനങ്ങളുടെ ഡെലിവറി ആരംഭിക്കും. കമ്പനിയിൽ അടിമുടി മാറ്റങ്ങൾ വരുത്തുന്നതിന്റെ ഭാഗമായി 43 വൈഡ് ബോഡി വിമാനങ്ങളുടെ ഇന്റീരിയർ പൂർണ്ണമായും നവീകരിക്കാനുള്ള പദ്ധതിയും എയർ ഇന്ത്യ ആവിഷ്കരിച്ചിട്ടുണ്ട്.

400 മില്യൺ ഡോളറാണ് ഇതിനായി ചെലവാകുക. അതേസമയം 2023 ഡിസംബർ മുതലാണ് പുതിയ ലോഗോ എയർ ഇന്ത്യ വിമാനങ്ങളിൽ പ്രത്യക്ഷപ്പെടുക. എയർ ഇന്ത്യയുടെ എ350 വിമാനങ്ങളിലാണ് ഈ ലോഗോ ആദ്യം അവതരിപ്പിക്കുക. ചുവപ്പ്, സ്വർണം, പർപ്പിൾ എന്നിങ്ങനെയുള്ള നിറങ്ങൾ ഉൾക്കൊള്ളിച്ചാണ് എയർ ഇന്ത്യ പുതിയ ലോഗോ ഡിസൈൻ ചെയ്തിരിക്കുന്നത്. സ്വർണ നിറത്തിലുള്ള ഫ്രെയിമിനകത്താണ് എയർ ഇന്ത്യ എന്ന് ചുവന്ന, ബോൾഡ് അക്ഷരങ്ങളിൽ എഴുതിയിരിക്കുന്നത്. അനന്തമായ സാധ്യതകളെയാണ് സ്വർണ നിറം പ്രതിനിധാനം ചെയ്യുന്നത് എന്നും കമ്പനി അറിയിച്ചു.