ഖത്തറിൽ താമസ വിസയുള്ളവർക്ക് യുഎഇയിലേക്ക് പോകാൻ ഇനി വിസയുടെ ആവശ്യമില്ല. ഖത്തറിൽ താമസ വിസയുള്ളവർക്ക് മാത്രമല്ല ഈ അവസരമുള്ളത് ജിസിസി രാജ്യങ്ങളിൽ നിന്നുള്ളവർക്ക് അവരുടെ പാസ്‌പോർട്ടോ ഐഡികാർഡോ ഉപയോഗിച്ച് യുഎഇയിൽ പ്രവേശിക്കാമെന്നും, വിസയോ സ്പോൺസർഷിപ്പോ ആവശ്യമില്ലെന്നും വിദേശകാര്യ മന്ത്രാലയം അറിയിച്ചു. കൂടാതെ ലോകത്തെ 82 രാജ്യങ്ങളിലുള്ളവർക്ക് യുഎഇയിൽ ഓൺ അറൈവൽ വിസ അനുവദിക്കുമെന്ന് അധികൃതർ വ്യക്തമാക്കി.

ദക്ഷിണ കൊറിയ, സ്പെയിൻ, സ്വീഡൻ, സ്വിറ്റ്സർലൻഡ്, ബഹാമാസ്, നെതർലാൻഡ്സ്, യുകെ, യു.എസ്, ഉക്രെയ്ൻ, ഉറുഗ്വേ, വത്തിക്കാൻ ഉൾപ്പടെ 82രാജ്യങ്ങൾക്കാണ് ഓൺ അറൈവൽ വിസ അനുവദിക്കുന്നത്. ഇവർക്ക് 30 ദിവസത്തെ പ്രവേശന വിസയോ അല്ലെങ്കിൽ 90 ദിവസത്തെ അറൈവൽ വിസയോ ആണ് ലഭിക്കുക. 30 ദിവസത്തെ പ്രവേശന വിസ 10 ദിവസത്തേക്ക് നീട്ടാനും സാധിക്കുന്നതാണ്. അതേസമയം, ഇന്ത്യൻ പാസ്‌പോർട്ടുള്ളവർക്ക് യുഎഇയിൽ പ്രവേശിച്ചാൽ 14 ദിവസത്തെ എൻട്രി വിസയും ലഭിക്കും.

കൂടാതെ, 14 ദിവസത്തേക്ക് കൂടി വിസ നീട്ടാനും അപേക്ഷിക്കാവുന്നതാണ്‌. വിസയെ സംബന്ധിച്ചുള്ള വിവരങ്ങളിൽ കൂടുതൽ വ്യക്തത വേണ്ടവർ ഫെഡറൽ അതോറിറ്റി ഫോർ ഐഡന്റിറ്റി, സിറ്റിസൺഷിപ്പ്, കസ്റ്റംസ്, പോർട്ട് സെക്യൂരിറ്റി എന്നിവയുടെ ഔദ്യോഗിക വെബ്‌സൈറ്റ് പരിശോധിച്ചാൽ മതിയാകും. അല്ലെങ്കിൽ യാത്രക്കാർ അവരുടെ എയർലൈനുകളെ ബന്ധപ്പെട്ട് വിവരങ്ങൾ പരിശോധിക്കാം.

ജിസിസി രാജ്യങ്ങളിലെ പൗരന്മാർക്ക് യുഎഇ സന്ദർശിക്കാൻ വിസയോ സ്പോൺസറോ ആവശ്യമില്ല. യുഎഇലേക്ക് പ്രവേശിക്കുന്ന അതിർഥികളിൽ എത്തുമ്പോൾ ജിസിസി രാജ്യം നൽകിയ പാസ്‌പോർട്ടോ അവരുടെ ഐഡി കാർഡോ ഹാജരാക്കിയാൽ മതിയാകും. വിസ ഇളവ് അല്ലെങ്കിൽ വിസ-ഓൺ-അറൈവൽ വിഭാഗങ്ങളിൽ പെടാത്തവർക്ക് എൻട്രി പെർമിറ്റ് ആവശ്യമാണെന്ന് യുഎഇ ഡിജിറ്റൽ സർക്കാർ വ്യക്തമാക്കി.

സന്ദർശനത്തിന്റെ ഉദ്ദേശ്യത്തെ ആശ്രയിച്ചിരിക്കുന്ന ഈ പെർമിറ്റ് അവർ യുഎഇയിൽ എത്തുന്നതിന് മുമ്പ് ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്‌സ് അഫയേഴ്‌സിൽ നിന്ന് നേടിയിരിക്കണം.അതേസമയം, മന്ത്രാലയത്തിന്റെ ഔദ്യോഗിക വെബ്‌സൈറ്റിലെ ഏറ്റവും പുതിയ വിവരങ്ങൾ അനുസരിച്ച്, 115 രാജ്യങ്ങളിൽ നിന്നുള്ള പൗരന്മാർക്ക് യുഎഇയിൽ പ്രവേശിക്കുന്നതിന് വിസ ആവശ്യമാണ്.

യുഎഇ സന്ദർശിക്കാൻ താൽപ്പര്യമുള്ളവർ രാജ്യത്തിന്റെ ഔദ്യോഗിക വെബ്‌സൈറ്റിലെ ഏറ്റവും പുതിയ വിസ അപ്‌ഡേറ്റുകൾ പരിശോധിക്കാണമെന്ന് വിദേശകാര്യ മന്ത്രാലയം നിർദേശിച്ചിട്ടുണ്ട്. ഏറ്റവും പുതിയ വിസ വിവരങ്ങൾ ലഭിക്കുന്നതിനായി എയർലൈനുകളെ ബന്ധപ്പെടാവുന്നതുമാണ്.