റോഡ് മുറിച്ചുകടക്കവേ മൂന്നു മാസം മുമ്പ് സന്ദര്‍ശക വിസയിലെത്തിയ പ്രവാസി മലയാളി യുഎഇയിൽ വാഹനമിടിച്ച് മരിച്ചു. കണ്ണൂര്‍ കണ്ണാടിപ്പറമ്പ് സ്വദേശി പ്രകാശന്‍ അരയാമ്പത്ത് (55) ആണ് മരിച്ചത്. ചൊവ്വാഴ്ച റോഡ് മുറിച്ചുകടക്കവേ ദുബൈ കരാമ സെന്ററിന് സമീപമാണ് അപകടമുണ്ടായത്. തല്‍ക്ഷണം മരണം സംഭവിച്ചു. നിയമനടപടികള്‍ പൂര്‍ത്തിയാക്കിയ ശേഷം മൃതദേഹം നാട്ടിലെത്തിച്ച് സംസ്‌കരിക്കും.

പ്രകാശന്‍ നേരത്തെ 15 വര്‍ഷത്തോളം അബുദാബിയില്‍ ജോലിചെയ്തിരുന്നു. പുതുതായി നിര്‍മിച്ച വീട്ടില്‍ ഗൃഹപ്രവേശം നടത്തിയാണ് വിസിറ്റ് വിസയില്‍ ദുബായിലെത്തിയത്. പരേതനായ ഗോവിന്ദന്റേയും ഗൗരിയുടെയും മകനാണ്. ഭാര്യ: ഷീബ. മക്കള്‍: അഭിരാമി, പ്രദീപ്. സഹോദരങ്ങള്‍: പ്രദീപന്‍, ഷാജി, സരസ്വതി, പ്രസന്ന.