നിരവധി ലോക റെക്കോർഡുകൾ സ്വന്തമാക്കിയ വിസ്മയ നഗരമാണ് ദുബൈ. ലോക ശ്രദ്ധയാകർഷിക്കുന്ന പദ്ധതികളിലൂടേയും മറ്റും ആളുകളെ അമ്പരപ്പിക്കുകയാണ് ഈ നഗരം. റെക്കോർഡുകൾ വാരിക്കൂട്ടുന്ന ദുബൈ ഇപ്പോൾ ഗിന്നസ് വേൾഡ് റെക്കോർഡ് സ്വന്തമാക്കിയിരിക്കുകയാണ്. ഏറ്റവും ഉയരമുള്ള റണ്ണിങ് ട്രാക്ക് ഒരുക്കിയെന്ന റെക്കോർഡ് ആണ് ഇതിലൂടെ ദുബായ്ക്ക് കിട്ടിയിരിക്കുന്നത്. താമസിക്കുന്ന കെട്ടിടത്തിന്റെ മുകളിൽ 157 മീറ്റർ ഉയരത്തിൽ 335 മീറ്റർ നീളത്തിലുള്ള സ്കൈ ട്രാക്കിൽ ഓടാനും നടക്കാനും ഉള്ള സൗകര്യം ഉണ്ട്.

ആഡംബര താമസ കെട്ടിടത്തിന്റെ മേർക്കൂരയാണ് റണ്ണിങ് ട്രാക്ക് ഒരുക്കാൻ വേണ്ടി ഇവർ തെരഞ്ഞെടുത്ത സ്ഥലം. ഇതിന്റെ മുകളിൽ നിന്നാൽ ബുർജ് ഖലീഫ, ദുബായ് ഫ്രെയിം, ഷെയ്ഖ് സായിദ് റോഡ്, സബീൽ പാർക്ക്, അറേബ്യൻ ഗൾഫ്, ഓൾഡ് ദുബായ്, എന്നിവയെല്ലാം കാണാൻ സാധിക്കും.റിയൽ എസ്റ്റേറ്റ് ഡവലപ്‌മെന്റ് ആൻഡ് മാനേജ്‌മെന്റ് കമ്പനികളിലൊന്നായ വാസൽ ആണ് ഈ സംഭവം ഒരുക്കിയത്.

ശാരീരിക ക്ഷമത കൈവരിച്ച് ആരോഗ്യകരമായ ജീവിതം പ്രോത്സാഹിപ്പിക്കുക എന്നതാണ് ഇതിലൂടെ ലക്ഷ്യം വെക്കുന്നതെന്ന് റിയൽ എസ്റ്റേറ്റ് ഡവലപ്‌മെന്റ് ആൻഡ് മാനേജ്‌മെന്റ് കമ്പനിയായ വാസൽ അറിയിച്ചു. ദുബായിക്ക് മറ്റൊരു ഗിന്നസ് വേൾഡ് റെക്കോർഡ് കിരീടം നേടാനായതിൽ സന്തോഷമുണ്ടെന്ന് വാസൽ സിഇഒ ഹെഷാം അൽ ഖാസിം പറഞ്ഞു.

ഫിറ്റ്നസ് ചലഞ്ച് ഉൾപ്പടെയുള്ള പരിപാടികൾ ദുബായ് സംഘിടിപ്പിച്ചിരുന്നു. ദുബായ് കിരീടാവകാശി ഷെയ്ഖ് ഹംദാന്റെ നേതൃത്വത്തിലാണ് ഇത്തരത്തിലുള്ള പരിപാടികൾ ദുബായ് സംഘടിപ്പിച്ചിരുന്നത്. പരിപാടി വലിയ വിജയമായിരുന്നു. ഇതിൻ നിന്നും പ്രചോദനം ഉൾകൊണ്ടാണ് ഇത്തരത്തിലൊരു പദ്ധതിയുമായി തങ്ങൾ മുന്നോട്ടുവന്നതെന്ന് വാസൽ സിഇഒ ഹെഷാം അൽ ഖാസിം പറഞ്ഞു.