വിസ നടപടികളിൽ പൊടുന്നനെ മാറ്റം വരുത്തുകയാണ് യുഎഇ. കഴിഞ്ഞ ദിവസമാണ് മൂന്നു മാസ സിംഗിള്‍ എന്‍ട്രി സന്ദര്‍ശന വിസ യുഎഇ വീണ്ടും നിര്‍ത്തിവച്ച വാർത്ത പുറത്തുവന്നത്. ഇപ്പോൾ സന്ദർശനവിസ നിബന്ധനകളിൽ മാറ്റം വരുത്തിയിരിക്കുകയാണ്. 750 ദിര്‍ഹം നിരക്കില്‍ യുഎഇ സന്ദര്‍ശന വിസകള്‍ 30 ദിവസത്തേക്ക് ഒരു തവണ മാത്രം നീട്ടാന്‍ അനുവദിക്കുമെന്ന് ഫെഡറല്‍ അഥോറിറ്റി ഫോര്‍ ഐഡന്റിറ്റി, സിറ്റിസണ്‍ഷിപ്, കസ്റ്റംസ് ആന്‍ഡ് പോര്‍ട്ട് സെക്യൂരിറ്റി അറിയിച്ചു.

30, 60, 90 ദിവസങ്ങളില്‍ ഒന്നോ അതിലധികമോ യാത്രകള്‍ക്കായി യുഎഇയിലുള്ള ഒരു ബന്ധുവിനെയോ സുഹൃത്തിനെയോ സന്ദര്‍ശിക്കാന്‍ വിസയുള്ളവര്‍ക്ക് ഇപ്പോള്‍ 750 ദിര്‍ഹം ഫീസ് മുടക്കി 30 ദിവസത്തേക്ക്
കൂടി നീട്ടാന്‍ അര്‍ഹതയുണ്ട്. ഒറ്റത്തവണ സന്ദര്‍ശക വിസ 30 ദിവസത്തേക്ക് മാത്രം നീട്ടാനുള്ള തീരുമാനം ആഴ്ചകള്‍ക്ക് മുമ്പ് നല്‍കിയതാണെന്നും യുഎഇ കാബിനറ്റ് പുറപ്പെടുവിച്ച തീരുമാനത്തിനനുസൃതമായി ഇത് നടപ്പാക്കുകയാണെന്നും റിപ്പോര്‍ട്ടില്‍ വ്യക്തമാക്കി.‘യുഎഇഐസിപി’ എന്ന സ്മാര്‍ട്ട് ആപ്‌ളിക്കേഷന്‍ വഴി സ്മാര്‍ട്ട് ചാനലുകലൂടെ നിര്‍ദിഷ്ട കാലയളവ് (30 ദിവസം, ഒറ്റത്തവണ മാത്രം) പ്രകാരം വിസ നീട്ടാൻ അനുവദിക്കുന്നു.

യഥാര്‍ത്ഥ എന്‍ട്രി പെര്‍മിറ്റും വ്യക്തിഗത കളര്‍ ഫോട്ടോയും ഇതിന് ആവശ്യമായ രേഖകളില്‍  ഉള്‍പ്പെടുന്നു. അംഗീകൃത മാനദണ്ഡങ്ങള്‍ പ്രകാരം വിസ നീട്ടാന്‍ രാജ്യത്തിനകത്ത് സ്‌പോണ്‍സര്‍ ചെയ്ത വ്യക്തിയുടെ സാന്നിധ്യം ആവശ്യമാണ്. കൂടാതെ, സേവന അപേക്ഷ സമര്‍പ്പിക്കുമ്പോള്‍ പാസ്‌പോര്‍ട്ടിന്റെ സാധുത ആറ് മാസത്തില്‍ കുറവായിരിക്കരുത്. ഇതിനു പുറമെ, ഒരു ബന്ധുവിനെ സന്ദര്‍ശിക്കാനുള്ള വിസ ഫീസിന്റെ മൂല്യം അല്ലെങ്കില്‍ സുഹൃത്തിന് 30 ദിവസത്തെ കാലയളവിലേക്ക് ഒരു തവണ മാത്രം 750 ദിര്‍ഹം എന്നതാണ്.അതില്‍ 500 ദിര്‍ഹം ഇഷ്യുവന്‍സ് ഫീസും അപേക്ഷയ്ക്ക് 100 ദിര്‍ഹമും, 100 ദിര്‍ഹം സ്മാര്‍ട്ട് സര്‍വീസ് ഫീസും ഇന്‍ഷുറന്‍സിനും അഥോറിറ്റിക്കുമായി 50 ദിര്‍ഹമും ഉള്‍പ്പെടുന്നു.

അതേസമയം യുഎഇ കഴിഞ്ഞ വർഷാവസാനം നിർത്തലാക്കിയ 3 മാസ കാലാവധിയുള്ള വിസിറ്റ് വിസ ഈ വർഷം ലിഷർ വീസ എന്ന പേരിൽ പുനരാരംഭിച്ചിരുന്നു. എന്നാൽ ഇപ്പോൾ മാസങ്ങൾ പിന്നിടുമ്പോൾ ഈ വിസ നിർത്തിവെച്ചിരിക്കുകയാണ്.മുപ്പതോ അറുപതോ ദിവസത്തെ സന്ദര്‍ശന വിസ മാത്രമാണ് ഇനി ലഭിക്കുകയെന്ന് ഫെഡറല്‍ അതോറിറ്റി ഫോര്‍ ഐഡന്റിറ്റി, സിറ്റിസണ്‍ഷിപ്പ്, കസ്റ്റംസ് ആന്റ് പോര്‍ട്ട് സെക്യൂരിറ്റി അധികൃതര്‍ സ്ഥിരീകരിച്ചു. എന്നാൽ ദുബൈയില്‍ താമസിക്കുന്നവരുടെ ഫസ്റ്റ് ഡിഗ്രി ബന്ധുക്കളായ സന്ദര്‍ശകര്‍ക്ക് 90 ദിവസത്തെ വിസ നല്‍കുന്നതായി ആമെറിലെ ഒരു കോള്‍ സന്റര്‍ എക്‌സിക്യൂട്ടീവ് സ്ഥിരീകരിച്ചു. താമസക്കാർക്ക് അവരുടെ മാതാപിതാക്കളെയോ ബന്ധുക്കളെയോ മൂന്ന് മാസത്തെ പദ്ധതിയിൽ കൊണ്ടുവരാം.