വിസിറ്റ് വിസക്കാർ ധൈര്യമായി സൗദിയിലേക്ക് കയറിപ്പോന്നോളീ..., എല്ലാവിധ വിസിറ്റ് വിസകളും ആറുമാസം വരെ ഓണ്‍ലൈനില്‍ പുതുക്കാമെന്ന് സൗദി ജവാസാത്ത് ഡയറക്ടറേറ്റ്
സൗദിയിലേക്ക് വരുന്നവരെ ഇരുകൈയ്യും നീട്ടിയാണ് അധികൃതർ സ്വീകരിക്കുന്നത്. രാജ്യത്തേക്ക് ആളുകളെ ആകർഷിക്കുന്നതിന്റെ ഭാഗമായി വിസിറ്റ് വിസക്കാർക്ക് കൂടുതൽ ഇളവുകളാണ് അധികൃകർ മുന്നോട്ടുവയ്ക്കുന്നത്. ജോലി തേടിയെത്തുന്നവരും കുടുബാംങ്ങളെ സന്ദർശിക്കാനായും, അതുപോലെ തീർത്ഥാടന വിനോദ സഞ്ചാര കേന്ദ്രങ്ങൾ സന്ദർശിക്കാനുമാണ് എത്തുന്നത്. ഇപ്പോൾ രാജ്യത്ത് വിസിറ്റ് വിസയിൽ തുടരുന്നവർക്ക് സന്തോഷ വാർത്ത എത്തിയിരിക്കുകയാണ്.
180 ദിവസം വരെ അതായത് ആറുമാസം വരെ രാജ്യത്തിന് പുറത്തുപോകാതെയും ജവാസാത്ത് ഓഫിസ് സന്ദര്‍ശിക്കാതെയും എല്ലാവിധ സന്ദര്‍ശക വിസകളും ഓണ്‍ലൈനില്‍ പുതുക്കാമെന്ന് സൗദി ജവാസാത്ത് ഡയറക്ടറേറ്റ് അറിയിച്ചു. സിംഗിള്‍ എന്‍ട്രിയും മള്‍ട്ടിപ്ള്‍ എന്‍ട്രിയും ആറു മാസം വരെ ഓണ്‍ലൈനില്‍ പുതുക്കാന്‍ ഇനി മുതല്‍ സാധിക്കും. ബിസിനസ്, ഫാമിലി, വ്യക്തിഗത സന്ദര്‍ശക വിസകളെല്ലാം അബ്ശിര്‍, മുഖീം പ്ലാറ്റ്‌ഫോമുകള്‍ വഴി പുതുക്കാവുന്നതാണ്.പുതുക്കുന്നതിനുള്ള ഫീസ് ഘടനയില്‍ മാറ്റമൊന്നും വരുത്തിയിട്ടില്ല.
സിംഗിള്‍ എന്‍ട്രി വിസിറ്റ് വിസകള്‍ എല്ലാ മാസവും പുതുക്കേണ്ടതുണ്ട്.100 റിയാലാണ് ഇതിനുള്ള ഫീസ്. വിസ കാലാവധി അവസാനിക്കുന്നതിന് ഏഴ് ദിവസം മുമ്പ് ഇത് സംബന്ധിച്ച് ജവാസാത്തില്‍ നിന്ന് സന്ദേശമെത്തും. ഇതിന് ശേഷം കാലാവധി തീരുന്നതിന് മുമ്പ് പുതുക്കുകയാണ് വേണ്ടത്. പുതുക്കാന്‍ സന്ദര്‍ശകന് മെഡിക്കല്‍ ഇന്‍ഷുറന്‍സ് ആവശ്യമാണ്. മള്‍ട്ടിപ്ള്‍ എന്‍ട്രി ഓരോ 90 ദിവസത്തിനുള്ളിലുമാണ് പുതുക്കേണ്ടത്. ഈ വിസ പുതുക്കാന്‍ മൂന്നു മാസത്തേക്ക് ഹെല്‍ത്ത് ഇന്‍ഷുറന്‍സ് ഉണ്ടായിരിക്കണമെന്ന് നിര്‍ബന്ധമുണ്ട്.
180 ദിവസം വരെ ഓണ്‍ലൈനില്‍ പുതുക്കാന്‍ ഇപ്പോള്‍ അവസരമുണ്ട്. നേരത്തെ ഓരോ 90 ദിവസം അവസാനിക്കുന്നതിന് മുമ്പ് സൗദി അറേബ്യക്ക് പുറത്ത് പോയി തിരിച്ചുവരേണ്ടിയിരുന്നു. ഇനി ഇത് 180 ദിവസത്തിന് ശേഷം മാത്രം മതിയാവും. ചില സമയങ്ങളില്‍ മള്‍ട്ടിപ്ള്‍ എന്‍ട്രി വിസകള്‍ ഓണ്‍ലൈന്‍ വഴി പുതുക്കാന്‍ സാധിക്കില്ലെന്നും അത്തരം സന്ദര്‍ഭങ്ങളില്‍ തവാസുല്‍ വഴി അപേക്ഷ നല്‍കണമെന്നും ജവാസാത്ത് ആവശ്യപ്പെട്ടു.
ഇലക്ട്രോണിക് സേവനങ്ങള്‍ക്കായുള്ള ആഭ്യന്തര മന്ത്രാലയത്തിന്റെ അബ്ഷിര്‍ പ്ലാറ്റ്‌ഫോമിൽ പ്രവേശിച്ച് അബ്ഷിര്‍ ഇന്‍ഡിവിജ്വല്‍, അബ്ഷിര്‍ ബിസിനസ് ഓപ്ഷനിലൂടെ നടപടികള്‍ പൂര്‍ത്തിയാക്കാം. അബ്ഷിര്‍ പ്ലാറ്റ്‌ഫോമില്‍ അപേക്ഷ സമര്‍പ്പിച്ചാല്‍ ഓണ്‍ലൈനായി പുതുക്കിനല്‍കാന്‍ സാധിക്കാത്തപക്ഷം ഇതുസംബന്ധിച്ച് അപേക്ഷകനെ മെസ്സേജ് വഴി ജവാസാത്ത് അറിയിക്കും. മുഖീം ഇലക്ട്രോണിക് പോര്‍ട്ടല്‍ വഴിയും വിസിറ്റ് വിസ പുതുക്കാവുന്നതാണ്.
https://www.facebook.com/Malayalivartha
