ഭാഗ്യം ഇന്ന് വരും നാളെ വരും എന്നൊക്കെ പറയുന്നത് ശരിയാണെങ്കിലും ഇപ്പോൾ പ്രവാസി മലയാളികൾക്കൊപ്പമാണ് നമ്മുടെ ഭാഗ്യ ദേവത. മഹാസൂസിലും,ബിഗ് ടിക്കറ്റിലുമൊക്കെ നിരവധി പേർ ഭാഗ്യപരീക്ഷിക്കുന്നുണ്ടെന്ന് അറിയാം. എന്നാൽ ഇത്തവണ ഒരു മലയാളി എട്ട് കോടി രൂപ സ്വന്തമാക്കിയത് ദുബായ് ഡ്യൂട്ടി ഫ്രീ മില്ലേനിയം മില്യണയര്‍ നറുക്കെടുപ്പിലാണ്. ദുബായില്‍ ജോലി ചെയ്തുവരുന്ന നമശിവായം ഹരിഹരന്‍ ആണ് 10 ലക്ഷം ഡോളര്‍ (8,31,70,050 രൂപ) ഭാഗ്യസമ്മാനത്തിന് അര്‍ഹനായത്.

ഇന്നലെ (ഒക്‌ടോബര്‍ 25 ബുധനാഴ്ച) നടന്ന ദുബായ് ഡ്യൂട്ടി ഫ്രീ മില്ലേനിയം മില്യണയര്‍ 438ാമത് നറുക്കെടുപ്പിലാണ് 40 കാരനായ ഹരിഹരനെ ഭാഗ്യംതേടിയെത്തിയത്. 2890 നമ്പര്‍ ടിക്കറ്റ് നമ്പറിനാണ് സമ്മാനം ലഭിച്ചത്. 26 വര്‍ഷമായി യുഎഇയില്‍ പ്രവാസ ജീവിതം നയിക്കുന്ന ഇദ്ദേഹം സെര്‍കോ എന്ന സ്വകാര്യ കമ്പനിയില്‍ സീനിയര്‍ ടെക്‌നീഷ്യനായി ജോലി ചെയ്യുകയാണ്. അഞ്ച് സുഹൃത്തുക്കള്‍ക്കൊപ്പമാണ് ഹരിഹരന്‍ ടിക്കറ്റ് എടുത്തത്. സമ്മാനത്തുക ഇവരുമായി പങ്കുവയ്ക്കും. വലിയ തുക സമ്മാനം നേടിയതില്‍ ഞങ്ങള്‍ അനുഗ്രഹീതരാണെന്നും ദുബായ് ഡ്യൂട്ടി ഫ്രീക്ക് നന്ദി അറിയിക്കുന്നുവെന്നും അദ്ദേഹം പറഞ്ഞു.

1999ല്‍ മില്ലേനിയം മില്യണയര്‍ ഷോ ആരംഭിച്ചതിന് ശേഷം 10 ലക്ഷം ഡോളര്‍ സമ്മാനം നേടുന്ന 218ാമത്തെ ഇന്ത്യക്കാരനാണ് ഹരിഹരന്‍. ഇതിന് തൊട്ടുമുമ്പ് നടന്ന മില്യണയര്‍ സീരീസ് 437 നറുക്കെടുപ്പിലും ഇന്ത്യക്കാരനാണ് മില്യനയറായത്. ഷാര്‍ജയില്‍ ഐടി എന്‍ജിനീയറായ ആന്ധ്രാപ്രദേശ് സ്വദേശി കര്‍ണയ്യ മണ്ടോള എട്ട് കോടി 31 ലക്ഷം രൂപയുടെ അവകാശി. എമിറേറ്റ്‌സ് എയര്‍ലൈന്‍സില്‍ സോഫ്റ്റ്‌വെയര്‍ എന്‍ജിനീയറാണ് കര്‍ണയ്യ.