വിമാനത്താവളത്തിലേക്ക് പോകുന്നതിനിടെ വാഹനാപകടം, സൗദിയിൽ മലപ്പുറം സ്വദേശി മരിച്ചു
സൗദി അറേബ്യയിൽ ഉണ്ടായ വാഹനാപകടത്തിൽ മലയാളി മരിച്ചു. മലപ്പുറം വളാഞ്ചേരി പൂക്കാട്ടിരി സ്വദേശി മച്ചിങ്ങല് ജാഫര് ആണ് മരിച്ചത്.
48 വയസായിരുന്നു. മറ്റൊരു കാറുമായി കൂട്ടിയിടിച്ചുണ്ടായ അപകടത്തില് രണ്ടുപേര്ക്ക് പരിക്കേറ്റു. ഒരു പാക്കിസ്ഥാന് സ്വദേശിയും സൗദി പൗരനും ഹഖീഖ് ജനറല് ആശുപത്രിയില് ചികിത്സയിലാണ്. ജാഫര് സഹപ്രവര്ത്തകനെ സ്വീകരിക്കാന് വിമാനത്താവളത്തിലേക്ക് കാറുമായി പോകുന്നതിനിടെ അപകടത്തില്പെടുകയായിരുന്നു.
വ്യാഴാഴ്ച വൈകീട്ട് അല്ബാഹ-ഹഖീഖ് റോഡിലായിരുന്നു അപകടം. ജാഫര് ഓടിച്ചിരുന്ന കാര് മറ്റൊരു കാറുമായി കൂട്ടിയിടിക്കുകയായിരുന്നു. സംഭവസ്ഥലത്തുവച്ചുതന്നെ മരണം സംഭവിച്ചു. ജാഫറിന്റെ മൃതദേഹം ഹഖീഖ് ജനറല് ആശുപത്രി മോര്ച്ചറിയിലേക്ക് മാറ്റി. അല് ബാഹയിലെ ഷാമഖ് ആശുപത്രിയില് അറ്റന്ഡറായി ജോലി ചെയ്യുകയായിരുന്നു ജാഫർ.
25 വര്ഷത്തോളമായി പ്രവാസ ജീവിതം നയിക്കുന്ന ജാഫറിന്റെ ഭാര്യ ഷമീറയും അഞ്ച് വയസുള്ള ഇളയ മകളും ഫാമിലി വിസിറ്റ് വിസയില് അല്ബാഹയിലുണ്ട്. തനിമ സാംസ്കാരിക വേദി പ്രവര്ത്തകനാണ്. പരേതനായ ഹസൈനാര്-ഫാത്തിമ ദമ്പതികളുടെ മകനാണ്. മക്കള്: മുഹ്സിന് ജാഫര് (പ്ലസ് വണ് വിദ്യാര്ത്ഥി), മിന്ഹാജ്, മിന്സ ഫാത്തിമ എന്നിവരാണ്.
https://www.facebook.com/Malayalivartha
