ദുബൈ ഡ്യൂട്ടി ഫ്രീ മില്ലേനിയം മില്യണയര്‍, മഹ്സൂസ്, അബുദാബി ബിഗ് ടിക്കറ്റിലുമൊക്കെ നിരവധി പ്രവാസികളാണ് ഭാഗ്യം പരീക്ഷിക്കുന്നത്. ഇപ്പോൾ പ്രവാസി മലയാളികൾക്കൊപ്പമാണ് ഭാഗ്യദേവത. കാരണം അടുത്തിടെയായി നടക്കുന്ന ഇത്തരം നറുക്കെടുപ്പുകളിൽ വൻ തുകകൾ സമ്മാനമായി ലഭിക്കുന്നതും പ്രവാസികൾക്കാണ്. ഇപ്പോൾ യുഎഇയിലെ എമിറേറ്റ്‌സ് ഡ്രോ നറുക്കെടുപ്പില്‍ പ്രവാസി മലയാളിക്ക് 125,000 ദിര്‍ഹം (28,38,743 രൂപ) സമ്മാനമായി ലഭിച്ചിരിക്കുന്നത്.

സൗദി അറേബ്യയിലെ ദമാമില്‍ താമസിക്കുന്ന മലയാളിയായ ജാക്‌സണ്‍ ജോസഫിനാണ് വന്‍ തുക സമ്മാനം സ്വന്തമാക്കിയത്. ലോജിസ്റ്റിക് മേഖലയിലാണ് ജാക്‌സണ്‍ ജോസഫ് ജോലി ചെയ്യുന്നത്. കഴിഞ്ഞയാഴ്ചയാണ് എമിറേറ്റ്‌സ് ഡ്രോ മെഗാ-7 പ്രൈസ് ലഭിച്ചത്. ഒറ്റനമ്പറിന് ഇദ്ദേഹത്തിന് 100 മില്യണ്‍ ദിര്‍ഹം ഗ്രാന്‍ഡ് പ്രൈസ് നഷ്ടമാവുകയും ചെയ്തു.

സമ്മാനത്തുക എങ്ങനെ വിനിയോഗിക്കണമെന്ന് ഇതുവരെ തീരുമാനമെടുത്തിട്ടില്ലെങ്കിലും ടിക്കറ്റെടുക്കുന്നത് തുടരുമെന്ന കാര്യത്തില്‍ മറ്റൊന്നും ആലോചിക്കാനില്ലെന്ന് ജാക്‌സണ്‍ പറയുന്നു. വിജയവാര്‍ത്ത ഭാര്യയുമായി പങ്കിടാന്‍ വിളിച്ചപ്പോള്‍ അവര്‍ ഇന്ത്യയുടെ ക്രിക്കറ്റ് മല്‍സരം ടിവിയില്‍ കണ്ടുകൊണ്ടിരിക്കുകയായിരുന്നുവെന്നും അവളുടെ കണ്ണില്‍ ഇത് ഇരട്ട വിജയങ്ങളുടെ ദിവസമായിരുന്നുവെന്നും അദ്ദേഹം എമിറേറ്റ്‌സ് ഡ്രോ സംഘാടകരോട് പറഞ്ഞു.

ഫോണ്‍ വിളിച്ചപ്പോള്‍, അവളുടെ ചിന്തകള്‍ ക്രിക്കറ്റ് പിച്ചില്‍ എവിടെയോ ആയിരുന്നു.കടുത്ത ക്രിക്കറ്റ് ആരാധികയായ ഭാര്യയെ സംബന്ധിച്ചിടത്തോളം എന്റെ വിജയവും ഇന്ത്യയുടെ കളിയും ഒരേ ആവേശകരമായ തലത്തിലായിരുന്നുവെന്നും ജാക്ണ്‍ പറഞ്ഞു.

അതേസമയം ഡ്യൂട്ടി ഫ്രീ മില്ലേനിയം മില്യണയര്‍ 438ാമത് നറുക്കെടുപ്പിൽ ഒരു മലയാളിയാണ് എട്ട് കോടി രൂപ സ്വന്തമാക്കിയത്. ദുബായില്‍ ജോലി ചെയ്തുവരുന്ന നമശിവായം ഹരിഹരന്‍ ആണ് 10 ലക്ഷം ഡോളര്‍ (8,31,70,050 രൂപ) ഭാഗ്യസമ്മാനത്തിന് അര്‍ഹനായത്. ഒക്‌ടോബര്‍ 25ന് നടന്ന ദുബായ് ഡ്യൂട്ടി ഫ്രീ മില്ലേനിയം മില്യണയര്‍ 438ാമത് നറുക്കെടുപ്പിലാണ് 40 കാരനായ ഹരിഹരനെ ഭാഗ്യം തേടിയെത്തിയത്. 2890 നമ്പര്‍ ടിക്കറ്റ് നമ്പറിനാണ് സമ്മാനം ലഭിച്ചത്.

26 വര്‍ഷമായി യുഎഇയില്‍ പ്രവാസ ജീവിതം നയിക്കുന്ന ഇദ്ദേഹം സെര്‍കോ എന്ന സ്വകാര്യ കമ്പനിയില്‍ സീനിയര്‍ ടെക്‌നീഷ്യനായി ജോലി ചെയ്യുകയാണ്. അഞ്ച് സുഹൃത്തുക്കള്‍ക്കൊപ്പമാണ് ഹരിഹരന്‍ ടിക്കറ്റ് എടുത്തത്. സമ്മാനത്തുക ഇവരുമായി പങ്കുവയ്ക്കും. വലിയ തുക സമ്മാനം നേടിയതില്‍ ഞങ്ങള്‍ അനുഗ്രഹീതരാണെന്നും ദുബായ് ഡ്യൂട്ടി ഫ്രീക്ക് നന്ദി അറിയിക്കുന്നുവെന്നും അദ്ദേഹം പറഞ്ഞു. 1999ല്‍ മില്ലേനിയം മില്യണയര്‍ ഷോ ആരംഭിച്ചതിന് ശേഷം 10 ലക്ഷം ഡോളര്‍ സമ്മാനം നേടുന്ന 218ാമത്തെ ഇന്ത്യക്കാരനാണ് ഹരിഹരന്‍.