ഏതൊരു നിയമം കൊണ്ടുവന്നാൽ അത് അനുസരിക്കാൻ അവിടുത്തെ സ്വദേശികൾ മാത്രമല്ല പ്രവാസികളും ബാധ്യസ്ഥരാണ്. ട്രാഫിക്ക് നിയമങ്ങൾ കർശനമായി നടപ്പിലാക്കുന്ന യുഎഇയിൽ ഇത് ലംഘിക്കുന്നവർക്ക് കനത്ത പിഴയാണ് ചുമത്തുന്നത്. അതിൽ ഒരു വിട്ടുവീഴ്ച്ചയും അധികൃതരുടെ ഭാഗത്ത് നിന്ന് ഉണ്ടാകില്ല. ഇപ്പോൾ യുഎഇ പോലീസിന് മുന്നിൽ അഭ്യാസ പ്രകടനം നടത്തിയ ഇരുപതുകാരനെ അറസ്റ്റ് ചെയ്യുകയും വാഹനം പിടിച്ചെടുത്ത് 11 ലക്ഷം രൂപ പിഴ ചുമത്തുകയും ചെയ്തു.

കഴിഞ്ഞ വ്യാഴാഴ്ചയാണ് സംഭവം. പോലീസ് പട്രോളിങ് സംഘത്തിന് മുമ്പില്‍ വച്ച് പ്രതി വാഹനാഭ്യാസം നടത്തുന്നതിന്റെ വീഡിയോ റാസല്‍ ഖൈമ പോലീസ് സമൂഹ മാധ്യമത്തില്‍ പങ്കുവച്ചു. അപകടകരമായി വാഹനമോടിച്ചതിനു പുറമേ രാജ്യത്തെ പോലീസ് സേനയോടും ട്രാഫിക് നിയമങ്ങളോടും അനാദരവ് കാണിക്കുന്ന നടപടിയാണ് പ്രതിയില്‍ നിന്ന് ഉണ്ടായത്.

റാസല്‍ഖൈമ പോലീസ് അന്വേഷണം നടത്തി ഡ്രൈവറെ തിരിച്ചറിയുകയും പ്രതിയെ കണ്ടെത്തി കസ്റ്റഡിയിലെടുക്കുകയുമായിരുന്നു. പ്രതി നിലവില്‍ നിയമനടപടി നേരിടുകയാണെന്നും റാസല്‍ഖൈമ പോലീസ് അറിയിച്ചു. പോലീസ് ഉദ്യോഗസ്ഥരെ അനാദരിക്കുന്നത് കടുത്ത ശിക്ഷ ലഭിക്കുന്ന നിയമലംഘനമാണെന്ന് റാസല്‍ഖൈമ പോലീസിലെ ട്രാഫിക് ആന്‍ഡ് പട്രോള്‍ ഡിപ്പാര്‍ട്ട്‌മെന്റ് ഡയറക്ടര്‍ കേണല്‍ ഡോ. മുഹമ്മദ് അല്‍ ബഹാര്‍ മുന്നറിയിപ്പ് നല്‍കി.

അതേസമയം നേരത്തെ ദുബൈയിൽ മോട്ടോർ ബൈക്കിൽ അപകടമുണ്ടാക്കുംവിധം അഭ്യാസം പ്രക‌ടനം നടത്തിയ മൂന്ന് യുവതികളുടെ ദൃശ്യങ്ങൾ ഓൺലൈനിൽ വൈറലയാതോടെ ഇവരെ അറസ്റ്റ് ചെയ്തിരുന്നു. ബൈക്കിന് മുകളിൽ കയറിനിന്നും ഹാൻഡിൽ ഉപയോഗിക്കാതെയുമൊക്കെയുള്ള ഈ അഭ്യാസപ്രകടനമാണ് യുവതികളുടെ അറസ്റ്റിലേക്ക് നയിച്ചത്. ദൃശ്യങ്ങൾ വൈറലായതോടെ പൊലീസ് എല്ലാവരെയും തേടിപിടിച്ച് അറസ്റ്റ് രേഖപ്പെടുത്തി. തിരിച്ചറിയാതിരിക്കാൻ സഹായിക്കുമെന്ന് കരുതി ബൈക്കിന്റെ നമ്പർ പ്ലേറ്റ് ഒടിച്ചിരുന്നെങ്കിലും പൊലീസ് മൂവരെയും കണ്ടെത്തുകയായിരുന്നു.

അറസ്റ്റിലായ യുവതികളെ ചോദ്യം ചെയ്യുകയും അപകടകരമാംവിധം വാഹനമോടിച്ചതായി സമ്മതിക്കുകയും ചെയ്തതായി പൊലീസ് അറിയിച്ചു. ജീവൻ അപകടപ്പെടുത്തുന്ന വിധത്തിൽ വാഹനമോടിക്കുന്നത് ഉൾപ്പെടെ ഒട്ടേറെ ട്രാഫിക് നിയമലംഘനങ്ങൾക്കാണ് കേസെടുത്തത്. 2,000 ദിർഹം പിഴയും ഡ്രൈവിങ് ലൈസൻസിൽ 23 ട്രാഫിക് ബ്ലാക്ക് പോയിന്റുകളും ചുമത്തി. ഒപ്പം മോട്ടോർ സൈക്കിളുകൾ രണ്ട് മാസത്തേക്ക് പൊലിസ് കണ്ടുകെട്ടുകയും ചെയ്തു. യുഎഇ ട്രാഫിക് നിയമമനുസരിച്ച് പിടിച്ചെടുത്ത വാഹനം വീണ്ടെടുക്കുന്നതിന് ഏകദേശം 50,000 ദിർഹം ചെലവ് വരും.