എന്താ ഈ യാത്രക്കാരൊക്കെ വിമാനത്തിൽ ഇങ്ങനെ പെരുമാറുന്നത്. യാത്രക്കാരുടേയും ജീവനക്കാരുടേയും സുരക്ഷയെ ബാധിക്കുന്ന തരത്തിൽ എന്തെല്ലാം പ്രവർത്തികളാണ് ചില യാത്രക്കാർ വിമാനത്തിൽ കാട്ടിക്കൂട്ടുന്നത്. ഇപ്പോൾ മസ്‌കറ്റില്‍ നിന്ന് പുറപ്പെട്ട വിമാനത്തിൽ ആണ് അത്തരത്തിലൊരു സംഭവം ഉണ്ടായത്. യാത്രയ്ക്കിടെ വിമാനത്തിന്റെ ടോയ്‌ലറ്റിൽ ഇരുന്ന് പുകവലിച്ച ഇന്ത്യക്കാരനാ യുവാവിനെ പിടികൂടി.

വിമാനത്തിന്റെ ടോയ്‌ലറ്റിൽ നിന്ന് പുറത്തേക്ക് പുക വരുന്നത് കണ്ട വിമാന ജീവനക്കാർ ആദ്യമൊന്ന് പരിഭ്രാന്തരായി തുടർന്ന് ഇതിൽ ആരൊ ഉണ്ടെന്ന് ഉറപ്പിച്ചു. ടോയ്ലറ്റില്‍ നിന്നിറങ്ങിയ ഉടന്‍ വിമാനത്തിലെ ജീവനക്കാര്‍ യുവാവിനെ പിടികൂടുകയായിരുന്നു. മസ്‌കറ്റില്‍ നിന്ന് മുംബൈയിലേക്ക് പുറപ്പെട്ട വിമാനത്തിലാണ് സംഭവം. പിന്നീട് വിമാനം മുംബൈയിൽ ലാൻഡ് ചെയ്തയുടൻ ഇയാളെ സഹര്‍ പോലീസിന് കൈമാറുകയായിരുന്നു. ബെംഗളൂരു സ്വദേശിയായ കബീര്‍ സെയ്ഫ് റിസവി എന്ന 27കാരനാണ് പിടിയിലായത്.

ഇയാളില്‍ നിന്ന് ലൈറ്റര്‍, സിഗരറ്റ് പാക്കറ്റ്, കേടുപാട് സംഭവിച്ച ഓക്‌സിജന്‍ കിറ്റ് എന്നിവ പിടികൂടി. ഐപിസി 336 വകുപ്പ് ചുമത്തിയാണ് അറസ്റ്റ്. മറ്റുള്ളവരുടെ ജീവന്‍ അപകടപ്പെടുത്താന്‍ ശ്രമിച്ചെന്നതാണ് കുറ്റം. ഈ വര്‍ഷം ഇതുവരെ പുകവലി സംബന്ധമായ 13 കേസുകളാണെടുത്തത്. ഈ വര്‍ഷം ജൂലൈയില്‍ ജിദ്ദ-മുംബൈ വിമാനത്തില്‍ പുകവലിച്ച ഒരാളെ പിടികൂടിയിരുന്നു. വിമാനത്തിൽ പുകവലിക്കുന്നത് സഹയാത്രക്കാർക്ക് അപകടമുണ്ടാക്കുമെന്നതിനാലും വിമാനത്തിന് തീപിടിക്കാൻ സാധ്യതയുണ്ട് എന്നതുകൊണ്ടുമാണ് കർശന നിയന്ത്രണം ഏർപ്പെടുത്തുന്നത്.