ദീര്‍ഘകാലമായി പ്രവാസിയായിരുന്നവർക്ക് അറബ് പൗരത്വം. ഗൾഫ് രാഷ്ട്രമായ ഒമാൻ ആണ് പ്രവാസികൾക്ക് ഇത്തരമൊരു അവസരം ഒരുക്കിയത്. ദീര്‍ഘകാലമായി ഒമാനില്‍ കഴിയുന്നത് ഉള്‍പ്പെടെയുള്ള യോഗ്യതകള്‍ നേടിയ പ്രവാസികള്‍ക്ക് രാജ്യം പൗരത്വം നല്‍കിയത്. ലഭിച്ച പൗരത്വ അപേക്ഷകളില്‍ അര്‍ഹരായവര്‍ക്ക് അനുമതി നല്‍കി സുല്‍ത്താന്‍ ഹൈതം ബിന്‍ താരിഖ് ഉത്തരവ് പുറപ്പെടുവിച്ചു. ഈ നടപടി പ്രവാസികളെ സംബന്ധിച്ച് വലിയ സന്തോഷം നൽകുന്ന വാർത്തയാണ്.

അപേക്ഷകരില്‍ നിന്ന് തെരഞ്ഞെടുക്കപ്പെടുന്നവര്‍ക്ക് ഒമാന്‍ പൗരത്വം അനുവദിക്കാറുണ്ട്. ഈ വര്‍ഷത്തെ രാജ ഉത്തരവ് നമ്പര്‍ 83 പ്രകാരം 201 പ്രവാസികള്‍ക്കാണ് പൗരത്വം ലഭിച്ചിരിക്കുന്നത്. പ്രവാസ ജീവിതം മാത്രമല്ല പ്രവാസികൾക്ക് പൗരത്വത്തിന് വേണ്ടിയുള്ള മാനദണ്ധം. അറബി ഭാഷാ പരീക്ഷ പാസാകണം എന്നത് ഉള്‍പ്പെടെ നിശ്ചിത മാനദണ്ഡങ്ങള്‍ പാലിക്കുന്നവര്‍ക്കാണ് പൗരത്വ അപേക്ഷ നല്‍കാനാവുക.

ഗുരുതരമായ രോഗങ്ങളില്ലെന്ന് ഉറപ്പാക്കുന്ന ആരോഗ്യ പരിശോധനയും വിജയിക്കണം. അപേക്ഷകന്റെ പേരില്‍ കേസുകള്‍ ഉണ്ടായിരിക്കരുത്. രാജ്യത്ത് ദീര്‍ഘകാലമായി താമസിക്കുകയാണെന്ന് തെളിയിക്കുന്ന രേഖകളുമുണ്ടെങ്കില്‍ നിശ്ചിത ഫീസടച്ച് അപേക്ഷ നല്‍കാവുന്നതാണ്.

അതേസമയം വിദേശികള്‍ക്കു കൂടി പൗരത്വം നല്‍കുന്നതിനുള്ള വകുപ്പുകള്‍ എഴുതിച്ചേര്‍ത്ത് സൗദി പൗരത്വ നിയമത്തില്‍ ഭേദഗതി വരുത്തിക്കൊണ്ടുള്ള രാജകീയ ഉത്തരവ് ഈ വർഷം പുറത്തിറങ്ങിയിരുന്നു. നിയമത്തിലെ എട്ടാം നമ്പര്‍ ആര്‍ട്ടിക്കിളില്‍ വരുത്തിയ ഭേദഗതിയാണ് ഇതില്‍ പ്രധാനം. നേരത്തേ പൗരത്വവുമായി ബന്ധപ്പെട്ട കാര്യങ്ങളില്‍ തീരുമാനം കൈക്കൊള്ളാനുള്ള അധികാരം ആഭ്യന്തര മന്ത്രിക്കായിരുന്നു.

എന്നാല്‍ ആഭ്യന്തര മന്ത്രിയുടെ ശുപാര്‍ശയുടെ അടിസ്ഥാനത്തില്‍ പൗരത്വ വിഷയങ്ങളില്‍ തീരുമാനം എടുക്കാനുള്ള അധികാരം പ്രധാനമന്ത്രിക്ക് നല്‍കിക്കൊണ്ടുള്ളതാണ് പുതിയ നിയമ ഭേദഗതി. വ്യവസ്ഥകള്‍ക്ക് വിധേയമായി നിലവില്‍ വിദേശികളായി പരിഗണിക്കപ്പെടുന്നവര്‍ക്ക് പൗരത്വം നല്‍കാന്‍ പുതിയ നിയമഭേദഗതി അനുവാദം നല്‍കുന്നുണ്ട്.

വിദേശിയായ പിതാവിനും സൗദി മാതാവിനും സൗദി അറേബ്യയ്ക്കകത്ത് വച്ച് ജനിച്ച മക്കള്‍ക്ക് ആഭ്യന്തര മന്ത്രിയുടെ ശുപാര്‍ശ പ്രകാരം സൗദി പൗരത്വം നല്‍കാന്‍ പ്രധാനമന്ത്രിക്ക് അധികാരം ഉണ്ടായിരിക്കും. 18 വയസ്സ് തികയുമ്പോഴാണ് ഇവര്‍ക്ക് പൗരത്വത്തിന് അപേക്ഷ നല്‍കാനാവുക.