പ്രവാസികൾ കാത്തിരുന്ന വാർത്ത, ഫാമിലി വിസകള് വീണ്ടും അനുവദിക്കാനുള്ള തീരുമാനത്തിൽ കുവൈത്ത്, 2024 ന്റെ തുടക്കത്തില് തന്നെ കുടുംബ-ആശ്രിത വിസകള് അനുവദിക്കാൻ നീക്കം...!!!
നിശ്ചിത തൊഴിലുകള് ചെയ്യുന്നവര് ഒഴികെയുള്ള പ്രവാസികള്ക്ക് ഫാമിലി വിസ നിർത്തിവെച്ചിരിക്കുന്നത് തുടരുന്ന കുവൈത്ത് തീരുമാനത്തിൽ നിന്ന് അൽപ്പം അയഞ്ഞിരിക്കുകയാണ്. ഫാമിലി വിസകള് വീണ്ടും അനുവദിക്കാനുള്ള തീരുമാനത്തിൽ എത്തിച്ചേർന്നിരിക്കുകയാണ്. കുവൈറ്റ്. 2024 ന്റെ തുടക്കത്തില് തന്നെ 'ആര്ട്ടിക്കിള് 22' വിസകള് അഥവാ കുടുംബ-ആശ്രിത വിസകള് അനുവദിക്കാനാണ് കുവൈറ്റ് ആഭ്യന്തര മന്ത്രാലയത്തിന്റെ തീരുമാനം.
ആഭ്യന്തര മന്ത്രാലയത്തിലെ ഉന്നത വൃത്തങ്ങളെ ഉദ്ധരിച്ച് പ്രാദേശിക അറബി ദിനപ്പത്രമായ അല് അന്ബ ആണ് ഇക്കാര്യം റിപ്പോര്ട്ട് ചെയ്തിരിക്കുന്നത്. എന്നാൽ നിയന്ത്രണങ്ങള്ക്ക് വിധേയമായി ഫാമിലി വിസ അനുവദിക്കാനാണ് മന്ത്രാലയം ആലോചിക്കുന്നതെന്നാണ് റിപ്പോര്ട്ടില് പറയുന്നത്. കുവൈറ്റിലേക്ക് കുടുംബങ്ങളെ കൊണ്ടുവരാന് യോഗ്യതയുള്ള പ്രവാസി വിഭാഗങ്ങള്ക്കുള്ള വ്യവസ്ഥകളും മാനദണ്ഡങ്ങളും നിശ്ചയിക്കാന് മന്ത്രാലയം ഒരു കമ്മിറ്റിയെ ചുമതലപ്പെടുത്തുമെന്നും റിപ്പോര്ട്ടില് പറയുന്നു.
വിവിധ ഘടകങ്ങളെ അടിസ്ഥാനമാക്കിയാണ് യോഗ്യതയ്ക്കുള്ള മാനദണ്ഡം നിർണ്ണയിക്കുന്നത്. ഇതുസംബന്ധിച്ച വിശദാംശങ്ങൾ ഇതുവരെ ലഭ്യമായിട്ടില്ല. നിശ്ചിത തൊഴിലുകള് ചെയ്യുന്നവര്ക്കാണ് വിസ അനുവദിക്കുന്നതിന് ആദ്യം അവസരം നൽകുന്നത്. ആദ്യ ഘട്ടത്തില് ഡോക്ടര്മാര്, യൂണിവേഴ്സിറ്റി പ്രൊഫസര്മാര്, കൗണ്സലര്മാര് എന്നിവരുള്പ്പെടെയുള്ള പ്രത്യേക വിഭാഗത്തിലുള്ള പ്രവാസികള്ക്ക് മാത്രമായി ആദ്യം ഇത് പരിമിതപ്പെടുത്തുമെന്നാണ് ഉന്നത വൃത്തങ്ങള് നല്കുന്ന സൂചന.
നേരത്തെ രാജ്യത്തെ ജനസംഖ്യയില് പ്രവാസികളുടെ എണ്ണം നിയന്ത്രിക്കുന്നതിന്റെ ഭാഗമായി കുടുംബ വിസകള്ക്ക് കുവൈറ്റ് നിയന്ത്രണം ഏര്പ്പെടുത്തിയിരുന്നു. നിലവില് സ്വദേശികളെക്കാള് കൂടുതല് പ്രവാസി ജനസംഖ്യയുള്ള കുവൈറ്റില് പ്രവാസി ജനസംഖ്യ നിയന്ത്രിക്കുന്നതിനായി പ്രഥമ ഉപപ്രധാനമന്ത്രിയും ആഭ്യന്തര മന്ത്രിയുമായ ശെയ്ഖ് തലാല് അല് ഖാലിദിന്റെ നേതൃത്വത്തില് പുതിയ ജനസംഖ്യാ തന്ത്രം നടപ്പിലാക്കുന്നതിന്റെ ഭാഗമായായിരുന്നു നടപടി.
എന്നാല്, ഇതിന്റെ അടിസ്ഥാനത്തില് തന്നെയാണ് പുതിയ ഫാമിലി വിസയ്ക്ക് അധികൃതര് പച്ചക്കൊടി കാട്ടുന്നതെന്നും അല് അന്ബാ റിപ്പോര്ട്ടില് പറയുന്നു. രാജ്യത്ത് ആകെയുള്ള 46 ലക്ഷം ജനങ്ങളില് 34 ലക്ഷവും പ്രവാസികളാണ്. 70 ശതമാനം വിദേശികളെന്ന ജനസംഖ്യാപരമായ ഈ അസന്തുലിതാവസ്ഥ കുറച്ചുകൊണ്ടുവരാനും ഈ വിസ നിർത്തിവെച്ച കുവൈത്തിന്റെ നടപടിയെ വിലയിരുത്താം.
പ്രവാസികളുടെ എണ്ണം നിയന്ത്രിക്കുന്നതിന്റെ ഭാഗമായി, ഫാമിലി വിസ സ്പോണ്സര് ചെയ്യുന്നവര്ക്ക് ഉണ്ടായിരിക്കേണ്ട കുറഞ്ഞ ശമ്പളം 500 കുവൈറ്റ് ദിനാറില്നിന്ന് 800 ദിനാറായി ഉയര്ത്തുന്ന കാര്യവും മന്ത്രാലയത്തിന് കീഴിലുള്ള നിയമവകുപ്പിന്റെ പരിഗണനയിലാണെന്നും റിപ്പോര്ട്ടുണ്ട്.
https://www.facebook.com/Malayalivartha
