യുഎഇയിൽ വീട്ടുവാടക ഇനത്തിൽ പ്രവാസികൾക്ക് ഇനി പോക്കറ്റ് ചോരാതെ നോക്കാം. പ്രവാസികൾക്ക് കനത്ത തിരിച്ച‌ടിയയായി രാജ്യത്ത് വിവിധയിടങ്ങളിൽ വാടക നിരക്ക് വർദ്ധിപ്പിച്ചിരുന്നു. വാടക നിരക്ക് കുത്തനെ കൂടുന്ന സാഹചര്യത്തിൽ, പ്രവാസികൾക്ക് താങ്ങാവുന്ന വാടകയ്ക്ക് വീടെടുക്കാൻ സാധിക്കുന്ന ചില മേഖലകളുണ്ട്. അതിൽ മുന്നിൽ നിൽക്കുന്നത് ദെയ്റ ആണ്. എമിറേറ്റിലെ സജീവ വ്യാപാര മേഖലയാണ് ദെയ്റ.

ഇതു കൂടാതെ ഇന്റർനാഷനൽ സിറ്റി, സത്വ, റെംറാം, ദുബായ് സൗത്ത്, ദുബായ് പ്രൊഡക്‌ഷൻ സിറ്റി എന്നിവയാണ് താരതമ്യേന വാടക കുറഞ്ഞ മറ്റു മേഖലകൾ. ഗതാഗതക്കുരുക്കും വീതി കുറഞ്ഞ റോഡുകളും പഴയ കെട്ടിടങ്ങളുമാണ് ഇവിടെ അധികവും. വാടക നിരക്ക് കുറയുന്നതിന്റെ ഒരു കാരണമിതാണ്.ദെയ്റയിലെ പുതിയ കെട്ടിടങ്ങളിൽ സ്റ്റുഡിയോ ഫ്ലാറ്റിന് ശരാശരി വാടക നിരക്ക് 28,000 ദിർഹം ആണ്.

ഒരു ഹാൾ ഉൾക്കൊള്ളുന്ന വൺ ബെഡ് റൂം ഫ്ലാറ്റിന് 46,000, ഹാളും രണ്ട് കിടപ്പുമുറികളുമടങ്ങിയ ഫ്ലാറ്റിന് 65,000, മൂന്ന് കിടപ്പുമുറി ഫ്ലാറ്റിന് പ്രതിവർഷ വാടക 95,000. ഇന്റർനാഷനൽ സിറ്റിയിൽ സ്റ്റുഡിയോ ഫ്ലാറ്റിന്റെ ഇടത്തരം വാടക 23,000, വൺ ബെഡ് റൂം ഫ്ലാറ്റിന് 33,000 ദിർഹം. 48,000 ദിർഹത്തിന് 2 ബെഡ് റൂം ഫ്ലാറ്റും ലഭിക്കും.

എന്നാൽ, ഒരു ലക്ഷം ദിർഹം വരെയാണ് 3 ബെഡ് റൂം ഫ്ലാറ്റിന്റെ വാടക. സത്വയിൽ ഒരു സ്റ്റുഡിയോ ഫ്ലാറ്റ് ലഭിക്കാൻ അരലക്ഷം ദിർഹമാകും. ഒരു ബെഡ് റൂം ഫ്ലാറ്റിന് ശരാശരി 70,000, രണ്ടുബെഡ് റൂം ഫ്ലാറ്റിന് 90,000 ദിർഹവുമാകും. 3 ബെഡ് റൂമിന് 1.49 ലക്ഷം വരെയാണ് വാർഷിക വാടക. ഖിസൈസിൽ പുതിയ കെട്ടിടങ്ങളിൽ 29,000 ദിർഹത്തിന് സ്റ്റുഡിയോ ഫ്ലാറ്റുണ്ട്. വൺ ബെഡ് റൂം ഫ്ലാറ്റ് 39,000, ടു ബെഡ് റൂം ഫ്ലാറ്റിന് 48,000, 3 ബെഡ് റൂം ഫ്ലാറ്റിന് 60,000 ദിർഹം എന്നിങ്ങനെയാണ് വാടക നിരക്ക്. താമസം മാറാൻ തണുപ്പുകാലമാണ് പലരും തിരഞ്ഞെടുക്കുന്നത്. ആധുനിക സൗകര്യങ്ങളുള്ള പുതിയ കെട്ടിടങ്ങളിലേക്ക് താമസം മാറുന്നവരും കൂടുതലാണ്.ജിംനേഷ്യം, നീന്തൽക്കുളം, പാർക്ക് എന്നിവയുള്ള കെട്ടിടങ്ങൾക്കാണ് ഡിമാൻഡ്.

ദുബൈ, ഷാർജയുൾപ്പെടെയുള്ള എമിറേറ്റുകളിൾ വാടക നിരക്ക് ഉയർത്തിയിട്ടുണ്ട്. കഴിഞ്ഞ വർഷത്തെ അപേക്ഷിച്ച് 27.2 ശതമാനമാണ് വാടകയിനത്തിലുണ്ടായ വർദ്ധന. പ്രമുഖ റിയൽ എസ്റ്റേറ്റ് മൂല്യനിർണയ ഏജൻസിയായ വാല്യൂസ്ട്രാറ്റിന്റെ റിപ്പോർട്ടിലാണ് ഈ കണക്കുകൾ. വില്ലകളുടെ വാടകയിൽ 38.7 ശതമാനം വർദ്ധനവുണ്ടായി. അപ്പാർട്ട്‌മെന്റിന്റെ വാടക 19.1 ശതമാനവും വർദ്ധിച്ചു. സ്റ്റുഡിയോ അപ്പാർട്ട്‌മെന്റുകൾക്ക് പോലും പ്രതിവർഷം ശരാശരി വാടക 51,000 ദിർഹമായി ഉയർത്തി, ഒരു കിടപ്പുമുറിക്ക് 75,000 ദിർഹം, രണ്ട് കിടപ്പുമുറികൾ 1,11,000 ദിർഹം, മൂന്ന് ബെഡ്‌റൂം അപ്പാർട്ട്‌മെന്റുകൾക്ക് 1,70,000 ദിർഹം എന്നിങ്ങനെയാണ് ശരാശരി വാടക.