സൗദി അറേബ്യയില്‍ നിന്ന് ഇന്ത്യയിലേക്ക് പുറപ്പെട്ട വിമാനത്തിൽ പെൺകുട്ടിയെ പീഡിപ്പിക്കാൻ ശ്രമിച്ച സംഭവത്തിൽ കൂടുതൽ വിവരങ്ങൾ പുറത്തുവരികയാണ്. എട്ടു വയസ്സുള്ള പെണ്‍കുട്ടിയെ പീഡിപ്പിച്ചെന്ന മാതാവിന്റെ പരാതിയില്‍ പ്രവാസി ഇന്ത്യക്കാരനെ യാത്രാ മദ്ധ്യേ കൊളംബോ വിമാനത്താവളത്തില്‍വച്ച് അറസ്റ്റ് ചെയ്യുകയായിരുന്നു. എന്നാൽ താൻ കുട്ടിയോട് മോശമായി പെരുമാറിയിട്ടില്ലെന്നും താൻ നിരപരാധിയാണെന്നുമാണ് ഇയാൾ പറയുന്നത്.

വിമാനത്തില്‍ വച്ച് പെണ്‍കുട്ടിയെ അമ്മയുടെ അഭ്യര്‍ത്ഥന പ്രകാരം പുതപ്പ് കൊണ്ട് മൂടുക മാത്രമാണ് ചെയ്തതെന്ന് പ്രതി വാദിച്ചു. വിമാനത്തില്‍ ഇടനാഴിയുടെ ഭാഗത്തെ സീറ്റിലാണ് താന്‍ ഇരുന്നത്. അതുകൊണ്ടുതന്നെ ഓവര്‍ഹെഡ് ക്യാബിന്‍ എളുപ്പത്തില്‍ തുറക്കാന്‍ സാധിക്കുമെന്നതിനാല്‍, അമ്മയുടെ അഭ്യര്‍ത്ഥന പ്രകാരം ഞാന്‍ പുതപ്പ് പുറത്തെടുത്ത് കുട്ടിയെ മൂടി. ഞാന്‍ ഒരു തെറ്റും ചെയ്തിട്ടില്ലെന്ന് കുറ്റാരോപിതനായ തെലങ്കാന സ്വദേശി തന്റെ കുടുംബത്തോട് ഫോണില്‍ പറഞ്ഞു.

നിരപരാധിത്വം തെളിയിക്കാന്‍ ഭര്‍ത്താവിനെ സഹായിക്കണമെന്ന് ഇയാളുടെ ഭാര്യ ഗംഗാലക്ഷ്മി അഭ്യര്‍ത്ഥിച്ചു. കുടുംബത്തിന്റെ ഏക ആശ്രയമാണ്. മെഡിക്കല്‍ റിപ്പോര്‍ട്ടുകളും മറ്റ് തെളിവുകളും നിരപരാധിയാണെന്ന് തെളിയിക്കുന്നതായും കുടുംബം പറഞ്ഞു.തെലങ്കാനയിലെ ജഗ്തിയാല്‍ ജില്ലക്കാരനായ 49 കാരനായ ഇദ്ദേഹം രണ്ട് കുട്ടികളുടെ പിതാവുമാണ്. റിയാദിലെ ഒരു പ്രമുഖ നിര്‍മാണ കമ്പനിയില്‍ കാർപെന്ററായി ജോലി ചെയ്യുകയാണ്.

ഡിസംബര്‍ 14നാണ് പീഡനക്കേസ് റിപ്പോര്‍ട്ട് ചെയ്യപ്പെട്ടത്. റിയാദില്‍ നിന്ന് ശ്രീലങ്ക വഴി ഹൈദരാബാദിലേക്കുള്ള ട്രാന്‍സിറ്റ് വിമാനത്തിലാണ് സംഭവം. ശ്രീലങ്കന്‍ സ്വദേശികളായ അമ്മയും മകളും സൗദി അറേബ്യയില്‍ ജോലിചെയ്യുന്ന കുട്ടിയുടെ പിതാവിനെ സന്ദര്‍ശിച്ച ശേഷം ശ്രീലങ്കയിലേക്ക് മടങ്ങുകയായിരുന്നു.പെണ്‍കുട്ടിയെ പീഡിപ്പിച്ചതായി മാതാവ് വിമാനത്തിലെ ക്യാബിന്‍ ക്രൂവിനെ വിവരം അറിയിക്കുകയായിരുന്നു.

കൊളംബോ ബണ്ഡാരനായകെ അന്താരാഷ്ട്ര വിമാനത്താവളത്തില്‍ എത്തിയപ്പോള്‍ പ്രതിയെ ക്യാബിന്‍ ക്രൂ ലോക്കല്‍ പോലീസിന് കൈമാറുകയാണുണ്ടായത്. പെണ്‍കുട്ടിയേയും പ്രതിയേയും സംശയിക്കുന്നയാളെയും നെഗോംബോ ജനറല്‍ ആശുപത്രിയില്‍ എത്തിച്ച് വൈദ്യപരിശോധനയ്ക്ക് വിധേയരാക്കിയിരുന്നു. കോടതിയില്‍ ഹാജരാക്കിയ പ്രതിയെ കൂടുതല്‍ അന്വേഷണത്തിനായി പോലീസ് കസ്റ്റഡിയില്‍ വിട്ടിരിക്കുകയാണ്.