കുവൈത്തിൽ നിന്ന് നാടുകടത്തപ്പെടുന്ന പ്രവാസികളുടെ എണ്ണം കൂടിവരുകയാണ്. രാജ്യത്തെ അനധികൃത തൊഴിലാളികളെ കണ്ടെത്തി നാടുകടത്തുന്നതിന്റെ ഭാഗമായി കഴിഞ്ഞ 11 ദിവസത്തിനിടെ നിയമലംഘകരായി കഴിഞ്ഞുവന്ന 1,470 പ്രവാസികളെ നാടുകടത്തി. തൊഴില്‍ നിയമം, താമസനിയമം തുടങ്ങിയ നിയമലംഘനങ്ങളുടെ പേരിലാണ് നടപടി. ഇന്ത്യക്കാര്‍ വിവിധ രാജ്യങ്ങളില്‍ നിന്നുള്ള പ്രവാസികള്‍ നാടുകടത്തപ്പെട്ടവരില്‍ ഉള്‍പ്പെടുന്നു. നിയമലംഘകരായി കഴിയുന്നവരെ കണ്ടെത്തുന്നതിന് രാജ്യത്തിന്റെ എല്ലാ ഭാഗത്തും പരിശോധന നടന്നുവരികയാണ്.

പിടിക്കപ്പെടുന്ന വിദേശികളെ യാത്രാരേഖകള്‍ ലഭ്യമാവുന്ന മുറയ്ക്ക് അതാത് രാജ്യങ്ങളിലേക്ക് തിരിച്ചയക്കുകയാണ് ചെയ്യുന്നത്. ഇങ്ങനെ തിരിച്ചയക്കപ്പെട്ടവര്‍ക്ക് പുതിയ വിസയില്‍ രാജ്യത്തേക്ക് പ്രവേശനമുണ്ടാവില്ല. രാജ്യത്തെ തൊഴില്‍മേഖല നിയമാനുസൃതമാക്കുന്നതിനും അനധികൃത തൊഴിലാളികളെ കണ്ടെത്തി നാടുകടത്താനും സുരക്ഷാ കാമ്പെയ്നുകള്‍ ആരംഭിക്കാന്‍ ഉപപ്രധാനമന്ത്രിയും ആഭ്യന്തര മന്ത്രിയുമായ ഷെയ്ഖ് തലാല്‍ അല്‍ ഖാലിദ് നിര്‍ദ്ദേശിച്ച പ്രകാരമാണ് നടപടി.

കഴിഞ്ഞ 10 ദിവസത്തിനിടെ റെസിഡന്‍സി, തൊഴില്‍ നിയമ ലംഘകരായ 700 പേരെ റെസിഡന്‍സി അഫയേഴ്‌സ് ഇന്‍വെസ്റ്റിഗേഷന്‍ ഡിപ്പാര്‍ട്ട്‌മെന്റ് കസ്റ്റഡിയിലെടുത്തിട്ടുണ്ട്. നിയമലംഘകരെ കണ്ടെത്തുന്നതിനും തുടര്‍നടപടികള്‍ സ്വീകരിക്കുന്നതിനുമായി കുവൈറ്റിലെ എല്ലാ മേഖലകളിലും സുരക്ഷാ പരിശോധനകള്‍ ശക്തമാക്കിയിരിക്കുകയാണ്. തൊഴില്‍ മന്ത്രാലയം ഉള്‍പ്പെടെയുള്ള വിവിധ വിഭാഗങ്ങളുടെ സഹകരണത്തോടെ ആഭ്യന്തര മന്ത്രാലയം വിവിധ മേഖലകളില്‍ യോജിച്ച നടപടി സ്വീകരിച്ചതായി സുരക്ഷാ വൃത്തങ്ങളെ ഉദ്ധരിച്ച് അറബ് ടൈംസ് റിപ്പോര്‍ട്ട് ചെയ്തു.

2023ല്‍ 42,850 പ്രവാസികളെയാണ് അവരുടെ രാജ്യങ്ങളിലേക്ക് നാടുകടത്തിയത്. ആദ്യമായാണ് ഒരുവര്‍ഷം ഇത്രയും പേരെ കുവൈറ്റ് നാടുകടത്തുന്നത്. ഏറ്റവും കൂടുതല്‍ പ്രവാസികളെ നാടുകടത്തിയ വര്‍ഷമാണ് കഴിഞ്ഞുപോയതെന്ന് പ്രാദേശിക മാധ്യമങ്ങള്‍ റിപ്പോര്‍ട് ചെയ്യുന്നു.സുരക്ഷാ നടപടികളും പരിശോധനകളും വര്‍ധിപ്പിച്ചതോടെ പിടിക്കപ്പെട്ടവരുടെ എണ്ണം ഉയരുകയായിരുന്നു.രാജ്യത്തിന്റെ നിയമങ്ങളും നിര്‍ദേശങ്ങളും ലംഘിച്ചതിനാല്‍ ഇവരില്‍ നിരവധി പേരെ കുവൈറ്റിലേക്ക് വീണ്ടും പ്രവേശിക്കുന്നതിന് വിലക്ക് ഏര്‍പ്പെടുത്തിയാണ് തിരിച്ചയച്ചത്.

തൊഴില്‍-താമസ നിയമങ്ങള്‍ക്ക് പുറമേ മയക്കുമരുന്ന് കേസുകള്‍, മോഷണം, മദ്യനിര്‍മാണം, പൊതുനിയമങ്ങള്‍ പാലിക്കാതിരിക്കല്‍ തുടങ്ങിയ നിയമലംഘനങ്ങളുടെ പേരില്‍ നാടുകടത്തപ്പെട്ടവരും ഇതില്‍ ഉള്‍പ്പെടുന്നു.2023 ജനുവരി ഒന്നു മുതല്‍ ഡിസംബര്‍ 31 വരെയുള്ള കാലയളവിലെ കണക്കുകള്‍ പ്രകാരം 17,701 സ്ത്രീകള്‍ ഉള്‍പ്പെടെ 42,850 വിദേശികളെയാണ് നാടുകടത്തിയത്.

അഡ്മിനിസ്‌ട്രേറ്റീവ് ഡീപോര്‍ട്ടേഷന്‍, ജുഡീഷ്യല്‍ ഡീപോര്‍ട്ടേഷന്‍ എന്നിങ്ങനെ രണ്ട് വിഭാഗങ്ങളില്‍ പെടുത്തിയാണ് നിയമലംഘകരെ നാടുകടത്തുന്നത്. കഴിഞ്ഞ വര്‍ഷം 582 പുരുഷന്മാരും 45 സ്ത്രീകളും ഉള്‍പ്പെടെ 627 പേര്‍ ജുഡീഷ്യല്‍ നാടുകടത്തലില്‍ ഉള്‍പ്പെട്ടു. 24,609 പുരുഷന്മാരും 17,656 സ്ത്രീകളും ഉള്‍പ്പെടുന്ന 42,265 പേര്‍ അഡ്മിനിസ്‌ട്രേറ്റീവ് നാടുകടത്തലിനും ശിക്ഷിക്കപ്പെട്ടു. ആഭ്യന്തര മന്ത്രിയുടെ ഉത്തരവിനു പിന്നാലെ റെയ്ഡുകള്‍ ശക്തമാക്കിയതും സുരക്ഷാ വിഭാഗങ്ങളുടെ സജീവമായ നടപടികളുമാണ് നാടുകടത്തലുകളുടെ എണ്ണത്തില്‍ ഗണ്യമായ വര്‍ധനവിന് കാരണം.