യുഎഇയിൽ താമസകെട്ടിടത്തിന് തീപിടിച്ച് 2 മരണം. പ്രവാസിയും 11 വയസ്സുള്ള മകളുമാണ് ശ്വാസംമുട്ടി മരിച്ചത്. ഇദ്ദേഹത്തിന്റെ ഭാര്യയും മറ്റ് രണ്ടു കുട്ടികളും ആശുപത്രിയില്‍ ചികില്‍സയിലാണ്. ഇവരെല്ലാം പാകിസ്ഥാൻ സ്വദേശികളാണ്. ഇന്ന് പുലര്‍ച്ചെയാണ് ഷാര്‍ജ മുവൈലെ ഏരിയയിലെ മൂന്ന്  നിലകളുള്ള ഒരു അപ്പാര്‍ട്ട്മെന്റ് കെട്ടിടത്തില്‍ തീപിടിത്തമുണ്ടായത്. മൂന്നാം നിലയിലുള്ള അപ്പാര്‍ട്ട്മെന്റിലാണ് തീപിടുത്തമുണ്ടായതെന്ന് ഷാര്‍ജ സിവില്‍ ഡിഫന്‍സ് ഡയറക്ടര്‍ ജനറല്‍ ബ്രിഗേഡിയര്‍ സമി ഖമീസ് അല്‍ നഖ്ബി പറഞ്ഞു.

പാക് പൗരന്റെ ഭാര്യ ഗുരുതരമായി പരിക്കേറ്റ് അല്‍ ഖാസിമി ആശുപത്രിയിലെ ഐസിയുവില്‍ ചികിത്സിൽ കഴിയുകയാണ്. ദമ്പതികളുടെ ഒമ്പത് വയസ്സുള്ള പെണ്‍കുട്ടിയും അഞ്ച് വയസ്സുള്ള ആണ്‍കുട്ടിയും ആശുപത്രിയില്‍ സുഖം പ്രാപിച്ചുവരുന്നതായും അധികൃതര്‍ അറിയിച്ചു.താമസക്കാരെ ഉടന്‍ ഒഴിപ്പിച്ചാണ് രക്ഷാപ്രവര്‍ത്തനം ആരംഭിച്ചത്.

പുലര്‍ച്ചെ 2.08 ഓടെയാണ് തീപിടിത്തമുണ്ടായതെന്നും 2.12ഓടെ അഗ്‌നിശമന സേനാംഗങ്ങള്‍ സ്ഥലത്തെത്തിയെന്നും ബ്രിഗേഡിയര്‍ അല്‍ നഖ്ബി പറഞ്ഞു. തീപിടിത്തത്തിന്റെ കാരണം വ്യക്തമല്ല. ഫോറന്‍സിക് സംഘം പരിശോധനയ്ക്കായി സ്ഥലം ഏറ്റെടുത്തു. ഫോറന്‍സിക് പരിശോധനയ്ക്കും സിവില്‍ ഡിഫന്‍സിന്റെ സുരക്ഷാ നടപടികള്‍ക്കും ശേഷമാണ് താമസക്കാര്‍ക്ക് തിരികെ കെട്ടിടത്തില്‍ പ്രവേശനം അനുവദിക്കുക.