ആഢംബരപ്രിയരുടെ ഇഷ്ട നഗരമാണ് ദുബൈ. അതിനാൽ ഇവിടുത്തെ ഭീമമായ റെസ്റ്റോറന്റ് ബില്ല് എന്നും വാർത്തകളിൽ ഇടംപിടിക്കാറുണ്ട്. ഇപ്പോൾ, ദുബായ് ജുമൈറയിലെ ആഡംബര റെസ്റ്റോറന്റ് ഉടമ സമൂഹമാധ്യമത്തില്‍ പങ്കുവെച്ച ബില്ല് ചര്‍ച്ചയായിരിക്കുകയാണ്. ആരു കണ്ടാലും ഹെന്റമ്മോ എന്നു പറഞ്ഞുപോകുന്ന ഒരു ബില്ലാണിത്. ദുബായ് ജുമൈറയിലെ സാള്‍ട്ട് ബേ നുസ്‌റത്ത് സ്റ്റീക്ക് ഹൗസില്‍ ഭക്ഷണം കഴിച്ച ഉപഭോക്താവ് ജീവനക്കാര്‍ക്ക് പാരിതോഷികമായി നല്‍കിയത് 9,0000 ദിര്‍ഹം (20,36,375 രൂപ).

റെസ്റ്റോറന്റ് ഉടമ തന്നെ പങ്കുവെച്ച ഈ ബില്ല് സമൂഹമാധ്യമങ്ങളില്‍ ചര്‍ച്ചയായിരിക്കുകയാണ്. 'പണം വരും, പണം പോകും' എന്ന അടിക്കുറിപ്പോടെ ഇന്‍സ്റ്റാഗ്രാമില്‍ 5.3 കോടി ഫോളോവേഴ്‌സുള്ള തുര്‍ക്കി ഷെഫും റെസറ്റോറന്‍റ് ഉടമയും നടത്തിപ്പുകാരനുമായ നുസ്‌റത്ത് ഗോക്സെ ആണ് ബില്ലിന്റെ ചിത്രം പങ്കുവച്ചത്. ഭക്ഷണത്തിനായി 3,98,630 ദിര്‍ഹവും (90,19,288 രൂപ) ടിപ്പായി 9,0000 ദിര്‍ഹവും (20,36,375 രൂപ) നല്‍കിയതായി ബില്ലില്‍ കാണിക്കുന്നു.

ജനുവരി 20 ശനിയാഴ്ച രാത്രി 10:08 എന്ന സമയമാണ് ബില്ലില്‍ കാണിക്കുന്നത്. ഉപഭോക്താക്കളുടെ പേര് വിവരങ്ങള്‍ നല്‍കിയിട്ടില്ല. ബീഫ് കാര്‍പാസിയോ, സാലഡ്, ബക്ലാവ, ഫ്രഞ്ച് ഫ്രൈകള്‍, ഫ്രൂട്ട് പ്ലേറ്റര്‍ തുടങ്ങി വൈവിധ്യമാര്‍ന്ന വിഭവങ്ങളാണ് ആസ്വദിച്ചത്. ഒരു ഫിലറ്റ് മിഗ്‌നോണും മൂന്ന് സ്റ്റീക്കുകളും ഉള്‍പ്പെടെ സ്വര്‍ണം പൊതിഞ്ഞ മാംസത്തിന്റെ ആഡംബരഭക്ഷണവും അവര്‍ കഴിച്ചു.

ആള്‍ക്കഹോള്‍ അടങ്ങിയതും ഇല്ലാത്തതുമായ പാനീയങ്ങള്‍ക്കു വേണ്ടിയും ലക്ഷങ്ങള്‍ പൊടിച്ചു. പാനീയങ്ങളില്‍ നാല് പോണ്‍ സ്റ്റാര്‍ മാര്‍ട്ടിനിസിന് 480 ദിര്‍ഹം (10,860 രൂപ), രണ്ട് കുപ്പി പെട്രസ് 2009ന് 1,98,000 ദിര്‍ഹം (44,79,818 രൂപ), ഒരു കുപ്പി പെട്രസ് 2011ന് 65,000 ദിര്‍ഹം (14,70,647 രൂപ), അഞ്ച് ഡബിള്‍ ഗ്ലാസ് ലൂയിസ് XIII കോഗ്‌നാക്കിന് 27,500 ദിര്‍ഹം (6,22,197 രൂപ) എന്നിങ്ങനെയാണ് വില കാണിക്കുന്നത്.

ലക്ഷങ്ങള്‍ പട്ടിണികിടക്കുമ്പോള്‍ പണം ധൂര്‍ത്തടിക്കുന്നതിനെ പലരും വിമർശിച്ചു, ഏറ്റവും ഓവര്‍റേറ്റഡ്, ഓവര്‍പ്രൈസ്ഡ് റെസ്റ്റോറന്റ്, ബ്രെയിന്‍ഡെഡ് കണ്‍സ്യൂമറിസത്തിന്റെ പാരമ്യത എന്നും ചിലർ കുറിച്ചു.