ഒമാനിലെ മസ്‌കത്ത് ഗവര്‍ണറേറ്റിൽ വൻ തീപിടുത്തം. സീബ് സൂഖിലുണ്ടായ തീപിടിത്തത്തില്‍ 20 ഓളം കടകള്‍ കത്തിനശിച്ചതിൽ ഭൂരിഭാഗവും മലയാളികളുടേതാണെന്നാണ് വിവരം. ചൊവ്വാഴ്ച പുലര്‍ച്ചെ രണ്ട് മണിയോടെയായിരുന്നു സംഭവം. ആര്‍ക്കും പരുക്കേറ്റിട്ടില്ല. ആറ് മണിക്കൂര്‍ തുടര്‍ച്ചയായി തീ കത്തിയതോടെയാണ് സൂഖിന്റെ ഭൂരിഭാഗവും കത്തിനശിച്ചത്.

കടകള്‍ അടച്ചതിനാല്‍ കച്ചവടക്കാരും ഉപഭോക്താക്കളും ഇവിടെ ഇല്ലാതിരുന്നതിനാൽ ആളപായമൊന്നും റിപ്പോർട്ട് ചെയ്തിട്ടില്ല. അഗ്‌നിശനമ സേന തീ നിയന്ത്രണ വിധേയമാക്കി. നിരവധി കടകളും ഗോഡൗണുകളും വെയര്‍ഹൗസുകളും കത്തിനശിച്ചവയില്‍ പെടുന്നു. ലക്ഷക്കണക്കിന് റിയാലിന്റെ നാശനഷ്ടം കണക്കാക്കുന്നതായി കച്ചവടക്കാര്‍ പറഞ്ഞു. റമസാന്‍ വിപണി പ്രതീക്ഷിച്ച് ഇറക്കിയ സാധനങ്ങളെല്ലാം കത്തിനശിച്ചെന്നാണ് വിവരം.