വിമാനത്തിൽ വച്ച് നെഞ്ചുവേദനയനുഭവപ്പെട്ടതിനെ തുടർന്ന് അടിയന്തരമായി ദുബായിലിറക്കി ആശുപത്രിയിലേയ്ക്ക് കൊണ്ടുപോകുന്നതിനിടെ പ്രവാസി മലയാളിയ്ക്ക് ദാരുണാന്ത്യം. കുവൈത്തിൽ നിന്ന് കേരളത്തിലേയ്ക്ക് യാത്ര ചെയ്യവേ ആണ് ദുരന്തം പടികടന്ന് എത്തിയത്.

പത്തനംതിട്ട റാന്നി ചേത്തക്കൽ സ്വദേശി തോമസ് ചാക്കോ(56)യാണ് മരിച്ചത്. കുവൈത്തിൽ ജോലി ചെയ്യുന്ന തോമസ് കുവൈത്ത് എയർലൈൻസിൽ തിരുവനന്തപുരത്തേയ്ക്ക് പുറപ്പെട്ടതായിരുന്നു. വിമാനം പറന്നുതുടങ്ങി കുറച്ച് സമയമായപ്പോഴേയ്ക്കും നെഞ്ചുവേദന അനുഭവപ്പെട്ടു.

തുടർന്ന് വിമാനം ദുബായ് രാജ്യാന്തര വിമാനത്താവളത്തിൽ അടിയന്തരമായി ഇറക്കുകയായിരുന്നു. അപ്പോഴേയ്ക്കും ആംബുലൻസും മറ്റു സംവിധാനങ്ങളും ഒരുക്കി. ആംബുലൻസിൽ കയറ്റി യാത്ര തുടങ്ങുമ്പോഴേയ്ക്കും മരണം സംഭവിച്ചു. ദുബായ് പൊലീസ് മോർച്ചറിയിൽസൂക്ഷിച്ചിട്ടുള്ള മൃതദേഹം നടപടികൾക്ക് ശേഷം നാട്ടിലേയ്ക്ക് കൊണ്ടുപോകുമെന്ന് നടപടികൾക്ക് നേതൃത്വം നൽകുന്ന സാമൂഹിക പ്രവർത്തകൻ നസീർ വാടാനപ്പള്ളി പറഞ്ഞു.