ഔദ്യോഗിക കണക്കനുസരിച്ച് ലോകത്ത് 195 രാജ്യങ്ങളാണ് നിലവിലുള്ളത്. വലുപ്പത്തില്‍ ഏഴാം സ്ഥാനവും ജനസംഖ്യയില്‍ രണ്ടാം സ്ഥാനവുമുള്ള നമ്മുടെ രാജ്യത്തിലെ ഒരു ഗ്രാമത്തിന്റെയത്രയും മാത്രം വലിപ്പമുള്ള നിരവധി രാജ്യങ്ങളുണ്ടന്ന് കേള്‍ക്കുമ്പോള്‍ ആശ്ചര്യം തോന്നുണ്ടാകുമല്ലേ? ആ കുഞ്ഞന്‍ രാജ്യങ്ങള്‍ ഏതൊക്കെയാണെന്നും അവ ലോകത്തിന്റെ ഏതു ഭാഗത്തായാണ് സ്ഥിതി ചെയ്യുന്നതെന്നും അറിയേണ്ടേ?

ഇരുപത്തിരണ്ടായിരത്തോളം ജനങ്ങള്‍ അധിവസിക്കുന്ന പലാവു എന്ന ഈ രാജ്യം ലോകത്തിലേറ്റവും പ്രായം കുറഞ്ഞ രാഷ്ട്രങ്ങളിലൊന്നാണ്. പസിഫിക് സമുദ്രത്തിന്റെ പടിഞ്ഞാറു ഭാഗത്തായാണ് പലാവു സ്ഥിതി ചെയ്യുന്നത്. 340 ദ്വീപുകളുടെ ഒരു കൂട്ടമാണ് ഈ ചെറുരാജ്യം. മൂവായിരം വര്‍ഷങ്ങള്‍ക്കു മുന്‍പ്, ഫിലിപ്പൈന്‍സില്‍ നിന്നും കുടിയേറിയവരാണ് ഇവിടുത്തെ താമസക്കാര്‍. വംശനാശ ഭീഷണി നേരിടുന്ന 130 സ്രാവുകള്‍ അധിവസിക്കുന്നുണ്ടിവിടെ. ഈ സമുദ്രത്തിലെ ഒരു പ്രധാന തടാകമാണ് ജെല്ലിഫിഷ് തടാകം. നിരവധി സുവര്‍ണ ജെല്ലിഫിഷുകളെയും ഇവിടെ കാണാവുന്നതാണ്.

രണ്ടായിരത്തില്‍ താഴെ ജനങ്ങള്‍ മാത്രം അധിവസിക്കുന്ന നിയുവെ എന്ന രാജ്യം ന്യൂസിലന്‍ഡിന്റെ വടക്കുകിഴക്കന്‍ ഭാഗത്താണ് സ്ഥിതി ചെയ്യുന്നത്. വിനോദസഞ്ചാരം അധികം പ്രോത്സാഹിപ്പിക്കാത്ത ഈ രാജ്യത്തെ ന്യൂസിലന്‍ഡിന്റെ അസോസിയേറ്റഡ് രാജ്യമായാണ് കണക്കാക്കുന്നത്. വിസ്തൃതിയും ജനസംഖ്യയും കണക്കിലെടുത്താല്‍ ലോകത്തിലെ ഏറ്റവും ചെറിയ രാജ്യങ്ങളുടെ പട്ടികയില്‍ പ്രഥമസ്ഥാനമുള്ള രാജ്യങ്ങളിലൊന്നാണ് നിയുവെ.

വെസ്റ്റ് ഇന്‍ഡീസ് ദ്വീപ സമൂഹത്തില്‍ ഉള്‍പ്പെടുന്ന ഒരു ദ്വീപ് രാഷ്ട്രമാണ് ഫെഡറേഷന്‍ ഓഫ് സെയ്ന്റ് ക്രിസ്റ്റഫര്‍ ആന്‍ഡ് നെവിസ് എന്ന് ഔദോഗികമായി അറിയപ്പെടുന്ന രാജ്യം. സെയ്ന്റ് കിറ്റ്‌സ്, നെവിസ് എന്ന ഇരുദ്വീപുകള്‍ ചേര്‍ന്നാണ് ഈ രാഷ്ട്രം രൂപീകരിക്കപ്പെട്ടിരിക്കുന്നത്. ഈ രണ്ടു ദ്വീപുകളിലും കൂടി അമ്പത്തയ്യായിരം ജനങ്ങള്‍ അധിവസിക്കുന്നുണ്ട്. 261 ചതുരശ്രകിലോമീറ്ററാണ് രാജ്യത്തിന്റെ വിസ്തൃതി.

പതിനൊന്നായിരത്തോളം ജനങ്ങള്‍ മാത്രം താമസിക്കുന്ന ചെറുദ്വീപുകളുടെ കൂട്ടമായ രാജ്യമാണ് ടുവാലു. പസിഫിക് മഹാസമുദ്രത്തിലാണ് ഈ രാജ്യത്തിന്റെ സ്ഥാനം. ഈ രാജ്യത്തിലെ അമ്പതു ശതമാനത്തോളം ജനങ്ങളും താമസിക്കുന്നത് ഫുണാഫുറ്റി എന്ന തലസ്ഥാന നഗരിയിലാണ്. .tv എന്ന ഡൊമെയ്ന്‍ നെയിം ആണ് ഈ രാജ്യത്തിന്റെ പ്രധാന വരുമാന സ്രോതസ്സ്. രാജ്യത്തിന്റെ ബഡ്ജറ്റിലേക്കു ദശലക്ഷങ്ങളാണ് ഈ ഡൊമെയ്ന്‍ നെയിം സംഭാവന ചെയ്യുന്നത്. 26 ചതുരശ്ര കിലോമീറ്റര്‍ മാത്രമാണ് ഈ കുഞ്ഞന്‍ രാജ്യത്തിന്റെ വലുപ്പം.

ചെറുരാജ്യങ്ങളുടെ പട്ടികയില്‍ മൂന്നാം സ്ഥാനമുള്ള രാജ്യമാണ് നൗറു. പസിഫിക്കിന്റെ മധ്യഭാഗത്തായാണ് നൗറു സ്ഥിതി ചെയ്യുന്നത്. ഔദ്യോഗികമായി ഒരു തലസ്ഥാനമോ പൊതുഗതാഗത സൗകര്യങ്ങളോ ഈ നാട്ടിനില്ല. ആകെ 25 കിലോമീറ്റര്‍ മാത്രമാണ് ഈ രാജ്യത്ത് റോഡുകളുള്ളത്. സ്വകാര്യ വാഹനങ്ങള്‍ മാത്രമേ നിരത്തില്‍ കാണുവാന്‍ കഴിയുകയുള്ളു. പതിമൂവായിരം ജനങ്ങള്‍ താമസിക്കുന്ന ഈ ചെറുരാജ്യത്തിന്റെ വിസ്തീര്‍ണ്ണം 21 ചതുരശ്ര കിലോമീറ്റര്‍ മാത്രമാണ്.

ദി പ്രിന്‍സിപ്പാലിറ്റി ഓഫ് സെബോര്‍ഗ എന്നത് 320 ജനങ്ങള്‍ മാത്രം താമസിക്കുന്ന, കുഞ്ഞന്‍ രാജ്യമാണിത്. 14 ചതുരശ്ര കിലോമീറ്റര്‍ മാത്രമാണ് രാജ്യത്തിന്റെ വലുപ്പം. ഇംപീരിയ എന്ന രാജ്യത്തിന്റെ വടക്കുപടിഞ്ഞാറന്‍ ഭാഗത്താണ് ഈ കുഞ്ഞുരാജ്യത്തിന്റെ സ്ഥാനം. മാര്‍സെല്ലോ എന്ന രാജാവാണ് രാഷ്ട്രത്തിന്റെ ഭരണാധികാരി. ചെറു രാജ്യമെന്നു കരുതി നിസാരവല്‍ക്കരിക്കണ്ടേ. മൂന്നുപേരടങ്ങുന്ന ഒരു സേന- പ്രതിരോധ മന്ത്രിയും രണ്ട് അതിര്‍ത്തി കാവല്‍ക്കാരും സ്വന്തമായുള്ള രാജ്യം കൂടിയാണിത്.

ദി റിപ്പബ്ലിക്ക് ഓഫ് മോളോസിയ യു എസ് എ യുടെ അധീനതയിലുള്ള ഒരു രാജ്യമാണ്. വെറും 34 പേര്‍ മാത്രമാണ് ഇവിടുത്തെ ജനസംഖ്യ. 1962 ല്‍ കെവിന്‍ ബോ എന്ന വ്യക്തിയാണ് ഈ രാജ്യം സ്ഥാപിച്ചത്. ദി റിപ്പബ്ലിക്ക് ഓഫ് മോളോസിയയെ സംബന്ധിച്ച ഏറ്റവും കൗതുകകരമായ വസ്തുത,ഈ കുഞ്ഞന്‍ രാജ്യത്തിന് സ്വന്തമായി ദേശീയ ഗാനവും ദേശീയ ചിഹ്നവും എല്ലാമുണ്ടെന്നത് തന്നെയാണ്.

110 ഏക്കര്‍ വിസ്തൃതിയുള്ള വത്തിക്കാന്‍ സിറ്റി രാജ്യത്തിന്റെ ജനസംഖ്യ വെറും 1000 മാത്രമാണ്. ജനസംഖ്യയിലും വിസ്തൃതിയിലും ഏറ്റവും ചെറിയ രാജ്യമെന്നറിയപ്പെടുന്നത് വത്തിക്കാന്‍ സിറ്റിയാണ്. 300 മീറ്റര്‍ മാത്രം നീളമുള്ള ഏറ്റവും ചെറിയ റെയില്‍വേ ശൃംഖല ഈ രാജ്യത്തിന് സ്വന്തമായുണ്ട്.