മുഖമൊക്കെ ഒന്ന് ഫേഷ്യല്‍ ചെയ്ത് സുന്ദരക്കുട്ടപ്പനാകണമെന്ന് തോന്നുന്നുണ്ടോ... പെട്ടെന്ന് തന്നെ വിയ്യൂര്‍ ജയിലിലേക്ക് എത്തിയാല്‍ മതി!ഞെട്ടി അല്ലേ? വിയ്യൂര്‍ ജയില്‍ എല്ലാവരേയും ഞെട്ടിച്ചു കൊണ്ടിരിക്കുന്ന സമയമാണ് ഇത്. വിപ്ലവകരമായ ഒരുപാട് മാറ്റങ്ങള്‍ക്ക് സാക്ഷ്യം വഹിച്ച വിയ്യൂര്‍ ജയിലില്‍ സൗന്ദര്യവിപ്ലവത്തിന്റെ കാഹളം മുഴക്കി ബ്യൂട്ടി പാര്‍ലര്‍ ആരംഭിക്കുകയാണ്. പുരുഷന്‍മാര്‍ക്കുള്ള ബ്യൂട്ടിപാര്‍ലറാണ് പ്രവര്‍ത്തനസജ്ജമായിരിക്കുന്നത്. ബ്യൂട്ടിപാര്‍ലര്‍ കെട്ടിടത്തിന്റെ പണികളെല്ലാം പൂര്‍ത്തിയായി. സെന്‍ട്രല്‍ ജയില്‍ പാര്‍ക്കിനകത്താണ് കെട്ടിടം പണിതിട്ടുള്ളത്. സര്‍ക്കാരിന്റെ ഉത്തരവ് കിട്ടിയാലുടന്‍ ബ്യൂട്ടിപാര്‍ലര്‍ പൊതുജനങ്ങള്‍ക്ക് തുറന്നുകൊടുക്കും.

എട്ടു തടവുകാരെ ബ്യൂട്ടിപാര്‍ലര്‍ നടത്തിപ്പിനു വേണ്ടി തെരഞ്ഞെടുത്ത് പരിശീലനം നല്‍കിവരുന്നുണ്ട്. കുറഞ്ഞ നിരക്കില്‍ മികച്ച സേവനം ലഭ്യമാക്കാനാണ് ലക്ഷ്യമിടുന്നത്. വിവിധ ഉത്പന്നങ്ങളുടെ വിപണനം വഴി സര്‍ക്കാരിന് കോടികളുടെ വരുമാനമാണ് വിയ്യൂര്‍ ജയില്‍ ഇപ്പോള്‍ ലഭ്യമാക്കുന്നത്. ജയില്‍ ചപ്പാത്തി, ബേക്കറി ഉത്പന്നങ്ങള്‍, വിവിധയിനം കറികള്‍, പച്ചക്കറികള്‍, മുട്ട, പാല്‍, വെട്ടുകല്ലുകള്‍, നെല്‍കൃഷി, കരകൗശല ഉത്പന്നങ്ങള്‍, ജയില്‍ വസ്ത്രങ്ങള്‍, സോപ്പുപൊടി, വാഷിംഗ് പൗഡറുകള്‍, കുപ്പിവെള്ളം തുടങ്ങി ജയില്‍ അന്തേവാസികളുടെ സഹകരണത്തോടെ വലിയൊരു ഇന്‍ഡസ്ട്രിയല്‍ പാര്‍ക്കു തന്നെ ജയിലിനകത്ത് പ്രവര്‍ത്തിക്കുന്നുണ്ടെന്ന് പറയാം.

അന്തേവാസികളുടെ ഗാനമേള ട്രൂപ്പും, വോളിബോള്‍ ടീമും, ശിങ്കാരി മേളം, പഞ്ചവാദ്യ സംഘം എന്നിവയും ജയിലിനകത്തുണ്ട്. ജയില്‍വാസം കഴിഞ്ഞ് പുറത്തിറങ്ങുന്‌പോള്‍ വീണ്ടും കുറ്റകൃത്യങ്ങളിലേക്ക് തിരിയാതെ സമൂഹത്തിന്റെ മുഖ്യധാരയില്‍ വരുമാനമുണ്ടാക്കുന്ന രീതിയില്‍ ജോലിചെയ്ത് പ്രവര്‍ത്തിക്കാന്‍കഴിയുംവിധം തടവുകാരെ വാര്‍ത്തെടുക്കുകയാണ് വിയ്യൂര്‍ ജയില്‍. ജയില്‍ പെട്രോള്‍ പമ്പാണ് വിയ്യൂര്‍ ജയിലില്‍ അന്തിമഘട്ടത്തിലെത്തിനില്‍ക്കുന്ന പുതിയ പ്രൊജക്ട്.