36 വയസുകാരനായ വിയറ്റ്‌നാം സ്വദേശിയായ ഒരു ബിസിനസുകാരന്‍ കിലോ കണക്കിന് സ്വര്‍ണം ധരിച്ച് വാര്‍ത്തകളിലിടം നേടുകയാണ്.

ഇദ്ദേഹം എവിടെ പോയാലും ശരീരത്തില്‍ 13 കിലോഗ്രാം സ്വര്‍ണവുമുണ്ടാകും. അതിനാല്‍ തന്നെ ആരുമിത് കവരാതിരിക്കുവാനായി അഞ്ച് സുരക്ഷാ ഉദ്യോഗസ്ഥരെ കൂടെ കൂട്ടിയാണ് ഇദ്ദേഹത്തിന്റെ യാത്രകളെല്ലാം.

ഇദ്ദേഹം ആദ്യമായി വാര്‍ത്തകളില്‍ ഇടം നേടുന്നത് തന്റെ കൈവശമുള്ള സ്വര്‍ണത്തിന്റെ ശേഖരം എല്ലാവര്‍ക്കും മുന്‍പില്‍ പ്രദര്‍ശിപ്പിച്ചാണ്. ഇതേ തുടര്‍ന്ന് പ്രശസ്തനായ ഇദ്ദേഹം വളരെ കനമുള്ള സ്വര്‍ണമാലയും വളകളും മോതിരവും ധരിച്ച് ഇരിക്കുന്നതിന്റെ ചിത്രങ്ങള്‍ വിയറ്റ്‌നാമിലെ സോഷ്യല്‍മീഡിയയില്‍ വൈറലാകുകയായിരുന്നു.

ഇതോടെ ചൈനയിലും തായ്‌ലന്‍ഡിലും വരെ ഇദ്ദേഹത്തിന് ആരാധകരായി. കഴുത്തിലണിയുന്ന മാലയുടെ ഭാരം അഞ്ച് കിലോ ഗ്രാമാണ്. കൂടാതെ അഞ്ച് കിലോ ഗ്രാം വീതം ഭാരമുള്ള രണ്ട് വലിയ ബ്രേസ്ലെറ്റും 500 ഗ്രാം ഭാരമുള്ള നാല് മോതിരവും തന്റെ കൈവശമുണ്ടെന്നും ഇതിനെല്ലാം 550,000 ഡോളര്‍ വില വരുമെന്നും ഇദ്ദേഹം വ്യക്തമാക്കുന്നു.

അഞ്ച് വര്‍ഷങ്ങള്‍ക്ക് മുന്‍പാണ് സ്വര്‍ണത്തിനോടുള്ള തന്റെ സ്‌നേഹം ആരംഭിച്ചതെന്ന് അദ്ദേഹം പറയുന്നു. ഇത്രമാത്രം സ്വര്‍ണം സ്വന്തമാക്കിയാല്‍ എന്റെ നല്ല കാലം ആരംഭിക്കുമെന്ന് ഒരാള്‍ പറഞ്ഞതിനാലാണ് ഈ തീരുമാനം സ്വീകരിച്ചതെന്നും അദ്ദേഹം വ്യക്തമാക്കി. സ്വര്‍ണം ഉപയോഗിച്ച് നിര്‍മിച്ച തൊപ്പിയും ഷര്‍ട്ടും സ്വന്തമാക്കുകയെന്നതാണ് ഇദ്ദേഹത്തിന്റെ അടുത്ത ആഗ്രഹം.

ഇത്രമാത്രം സ്വര്‍ണം ധരിക്കുന്നത് ആദ്യമൊക്കെ വളരെ അലോസരമുണ്ടാക്കിയിരുന്നെങ്കിലും ഇപ്പോള്‍ ആ ശീലത്തോട് ഞാന്‍ യോജിച്ചെന്നും വളരെ വലിയ ഭാരമുള്ള സ്വര്‍ണമായിരുന്നതിനാല്‍ ആദ്യമൊക്കെ കഴുത്തിന് വേദന അനുഭവപ്പെട്ടിരുന്നതായും അദ്ദേഹം പറയുന്നു. ഇത്രയും അധികം സ്വര്‍ണം ധരിച്ച് നടക്കുന്നത് ഒട്ടും സുരക്ഷിതമല്ലെന്ന് തോന്നിയതിനാലാണ സുരക്ഷാ ഉദ്യോഗസ്ഥരെ നിയോഗിക്കുവാന്‍ തീരുമാനിച്ചത്.

ഇത്തരമൊരു പ്രവര്‍ത്തിയിലൂടെ ഇയാള്‍ വിയറ്റ്‌നാമില്‍ ഒരു സെലിബ്രിറ്റിയായി മാറിയിരിക്കുകയാണ്. മാത്രമല്ല സ്വര്‍ണം ധരിച്ച് പല സ്ഥലങ്ങളിലും എത്തുമ്പോള്‍ കാണാനായി ആളുകള്‍ തിക്കും തിരക്കുമുണ്ടാക്കുന്നുമുണ്ട്.