കരാട്ടെ സ്‌കൂളില്‍ കയറി പെണ്ണിനെ തട്ടിക്കൊണ്ടുപോകാന്‍ ശ്രമിച്ചയാളെ ഒടുവില്‍ സ്ട്രച്ചറില്‍ പുറത്തേക്കെടുത്തു. സംഭവം യുഎസിലെ നോര്‍ത്ത് കരോലിനയിലെ ഷാര്‍ലറ്റിലാണ്.

വ്യാഴാഴ്ച രാത്രി പെണ്‍കുട്ടിയെ കാറില്‍ കയറ്റിക്കൊണ്ടുപോകാനാണ് ഇയാള്‍ ശ്രമിച്ചത്.

പെണ്‍കുട്ടി കുതറിയോടി അടുത്തുള്ള ബുഷികെന്‍ കരാട്ടെ പരിശീലനകേന്ദ്രത്തില്‍ കയറുകയായിരുന്നു.

ഇവിടത്തെ പരിശീലകന്‍ റാണ്ടാല്‍ എഫ്രായിം അക്രമിയെ, സംസാരിച്ചു പിന്തിരിപ്പിക്കാന്‍ ശ്രമിച്ചെങ്കിലും നടന്നില്ല.

പെണ്‍കുട്ടിയാണെങ്കില്‍ ഇയാളെ അറിയില്ലെന്നും കൂടെ പോകാന്‍ തയാറല്ലെന്നും അറിയിച്ചു.

ഇതോടെ എഫ്രായിം അക്രമിയെ കരാട്ടെ കൊണ്ടു നേരിട്ടു. അധികം വൈകാതെ അക്രമി നിലംപരിശായി.

തുടര്‍ന്ന് പോലീസെത്തി ഇയാളെ ആശുപത്രിയിലാക്കിയെന്ന് സിഎന്‍എന്‍ റിപ്പോര്‍ട്ട് ചെയ്തു.