തിരുവനന്തപുരം ശ്രീകാര്യത്ത് പാങ്ങപ്പാറയിൽ പ്ലസ് വൺ വിദ്യാർഥിയായ 17കാരൻ എം.ഡി. അഭിരാമിനെ ക്രൂരമായി കൊലപ്പെടുത്തിയ സംഭവത്തിൽ അന്വേഷണം കൂടുതൽ നിർണായക ഘട്ടത്തിലേക്ക്. ആദ്യം മൂന്ന് പേരുടെ അറസ്റ്റിൽ ഒതുങ്ങിയ കേസ് ഇപ്പോൾ നാലാമത്തെ ആളിലേക്കും നീണ്ടിരിക്കുകയാണ്. കൊലപാതകത്തിന് പിന്നിൽ വ്യക്തിവൈരാഗ്യവും പ്രണയബന്ധത്തിലെ തർക്കവുമാണെന്നാണ് അന്വേഷണത്തിൽ പുറത്തുവരുന്ന വിവരം. എന്നാൽ അഭിരാമിനെ തന്നെയായിരുന്നില്ല പ്രതികൾ ആദ്യം ലക്ഷ്യമിട്ടിരുന്നത് എന്നതാണ് കേസിലെ ഏറ്റവും ഞെട്ടിക്കുന്ന വഴിത്തിരിവ്.

അഭിരാമിന്റെ സുഹൃത്തിനെ കൊലപ്പെടുത്താനായിരുന്നു ഒന്നാം പ്രതിയായ 17കാരന്റെ പദ്ധതിയെന്നാണ് പൊലീസ് പറയുന്നത്. മുൻപ് പ്രണയബന്ധത്തിലുണ്ടായിരുന്ന പെൺകുട്ടി മറ്റൊരു യുവാവുമായി അടുപ്പത്തിലായതിലുള്ള വൈരാഗ്യമാണ് കൊലപാതകപദ്ധതിയിലേക്ക് നയിച്ചതെന്നാണ് അന്വേഷണത്തിലെ കണ്ടെത്തൽ. ഈ യുവാവിനെ ലക്ഷ്യമിട്ട പ്രതി, ഇയാളുടെ സുഹൃത്തായ അഭിരാമിനെ ഉപയോഗിച്ച് ആളൊഴിഞ്ഞ സ്ഥലത്തേക്ക് വിളിച്ചുവരുത്തി ഇരയെയും അവിടേക്ക് എത്തിക്കാനായിരുന്നു ശ്രമിച്ചത്. ഇതിനായി പെൺകുട്ടിയുടെ ഫോൺ ഉപയോഗിച്ചാണ് അഭിരാമിനെ ബന്ധപ്പെട്ടതെന്നാണ് വിവരം.

കൊലപാതകത്തിന് ഏതാനും ദിവസം മുമ്പുതന്നെ ഒന്നാം പ്രതി സുഹൃത്തിനെ കൊല്ലുന്നതിനെക്കുറിച്ച് സംസാരിച്ചിരുന്നതായും പെൺകുട്ടിയുമായി ഈ പദ്ധതി പങ്കുവെച്ചിരുന്നതായും പൊലീസ് കണ്ടെത്തിയിട്ടുണ്ട്. വാട്സാപ്പിലൂടെ മഴുവിന്റെ ചിത്രം അയച്ചതായും അന്വേഷണവിവരങ്ങളിലുണ്ട്. എന്നാൽ അഭിരാമിന്റെ സുഹൃത്ത് സ്ഥലത്തെത്തിയില്ല. ഇതോടെ അഭിരാമിനെത്തന്നെ പ്രതികൾ ആക്രമിക്കുകയായിരുന്നു എന്നാണ് പൊലീസിന്റെ പ്രാഥമിക നിഗമനം. അഭിരാമിനെ ഒരു മണിക്കൂറോളം ക്രൂരമായി മർദിച്ചെന്നാണ് പോസ്റ്റ്മോർട്ടവുമായി ബന്ധപ്പെട്ട് പുറത്തുവന്ന വിവരം. തല, കഴുത്ത്, കണ്ണ്, നെഞ്ച് എന്നിവിടങ്ങളിൽ പരുക്കുകളുണ്ടായിരുന്നു. കല്ലുകൊണ്ടും കൈകൊണ്ടും ബെൽറ്റ് ഉപയോഗിച്ചും ആക്രമിച്ച ശേഷം ശ്വാസംമുട്ടിച്ച് കൊലപ്പെടുത്തിയെന്നാണ് അന്വേഷണസംഘം വ്യക്തമാക്കുന്നത്. രക്ഷപ്പെടാൻ ശ്രമിച്ച അഭിരാമിനെ പിടിച്ചുനിർത്തി വീണ്ടും ആക്രമിച്ചെന്നും റിപ്പോർട്ടുകളുണ്ട്.

കൊലപാതകത്തിനുശേഷം മൃതദേഹം ചാക്കിൽ കെട്ടി പാങ്ങപ്പാറയിലെ ആളൊഴിഞ്ഞ പറമ്പിൽ ഉപേക്ഷിച്ചു. ഞായറാഴ്ച വീട്ടിൽനിന്ന് ഇറങ്ങിയ അഭിരാമിനെ കാണാതായതോടെ കുടുംബം പൊലീസിനെ സമീപിച്ചിരുന്നു. മൊബൈൽ ഫോൺ വിവരങ്ങളും ഇൻസ്റ്റഗ്രാം വഴിയുള്ള ആശയവിനിമയവും പരിശോധിച്ചതോടെയാണ് അന്വേഷണം നിർണായക വഴിത്തിരിവിലെത്തിയത്. പെൺകുട്ടിയുടെ ഫോൺ ഉപയോഗിച്ച് അഭിരാമിനെ സ്ഥലത്തെത്തിച്ചതും അന്വേഷണത്തിൽ കണ്ടെത്തി.

ഈ കേസിൽ ഒന്നാം പ്രതിയായ 17കാരനെ പൂജപ്പുരയിലെ ഒബ്സർവേഷൻ ഹോമിലേക്ക് മാറ്റി. കാപ്പ നിയമപ്രകാരം നടപടികൾ നേരിട്ടിരുന്ന ഉമർ മുഫ്തർ, മൂന്നാം പ്രതിയായ ആനന്ദ എന്നിവരെ റിമാൻഡ് ചെയ്തു. എന്നാൽ അന്വേഷണം ഇവിടെ അവസാനിക്കുന്നില്ല. ഉമറിന്റെ പെൺസുഹൃത്തായ ആക്കുളം സ്വദേശിനി ഐശ്വര്യയിലേക്കും പൊലീസ് അന്വേഷണം വ്യാപിപ്പിച്ചു. കൊലപാതകത്തെക്കുറിച്ച് ഇവർക്ക് അറിവുണ്ടായിരുന്നുവെന്നും പ്രതികളെ സഹായിച്ചുവെന്നുമാണ് പൊലീസിന്റെ കണ്ടെത്തൽ. ഉമറിനെ ചോദ്യം ചെയ്തതിൽനിന്നാണ് ഇവരുടെ പങ്കിനെക്കുറിച്ച് സൂചന ലഭിച്ചത്. പിന്നീട് ഐശ്വര്യയെ കസ്റ്റഡിയിലെടുത്ത് അറസ്റ്റ് രേഖപ്പെടുത്തി. ഇതോടെ കേസിൽ അറസ്റ്റിലായവരുടെ എണ്ണം നാലായി.

ഇതിനിടെ അന്വേഷണത്തെ വഴിതെറ്റിക്കാൻ പ്രതികൾ നടത്തിയ മറ്റൊരു നീക്കവും പൊലീസിനെ ഞെട്ടിച്ചിരിക്കുകയാണ്. കൊലപാതകം നടന്ന ദിവസം ഉമർ തന്റെ മൊബൈൽ ഫോൺ വീട്ടിൽവെച്ചാണ് പാങ്ങപ്പാറയിലെത്തിയതെന്നാണ് കണ്ടെത്തൽ. ഈ സമയത്ത് ഉമറിന്റെ കാമുകി ഐശ്വര്യ വീട്ടിലുണ്ടായിരുന്ന ഫോണിലേക്ക് തുടർച്ചയായി വിളിച്ചുകൊണ്ടിരുന്നു. ടവർ ലൊക്കേഷൻ പരിശോധിക്കുമ്പോൾ ഉമർ വീട്ടിലുണ്ടായിരുന്നുവെന്ന് വരുത്തിത്തീർക്കുകയായിരുന്നു ലക്ഷ്യമെന്നാണ് പൊലീസിന്റെ സംശയം. കൊലപാതകത്തിനുശേഷം വീട്ടിലെത്തിയ ഉമർ ഇൻസ്റ്റഗ്രാം വഴി ഐശ്വര്യയ്ക്ക് സന്ദേശം അയച്ചതായും അന്വേഷണത്തിൽ കണ്ടെത്തിയിട്ടുണ്ട്. അഭിരാമിനെ കൊന്നത് ഒന്നാം പ്രതിയാണെന്നും അവൻ അതിന്റെ ഫലം അനുഭവിക്കട്ടെയെന്നുമുള്ള തരത്തിലായിരുന്നു സന്ദേശമെന്നാണ് റിപ്പോർട്ട്. പ്രായപൂർത്തിയാകാത്ത ഒന്നാം പ്രതിയുടെ പേരിൽ മാത്രം കുറ്റം ചുമത്തി ശിക്ഷയുടെ തീവ്രത കുറയ്ക്കാനുള്ള നീക്കമായിരുന്നോ ഇതെന്നും പൊലീസ് പരിശോധിക്കുന്നുണ്ട്.

ഉമറിന് രണ്ട് മൊബൈൽ ഫോണുകളുണ്ടെന്നാണ് അന്വേഷണസംഘത്തിന് ലഭിച്ച വിവരം. ഇതിൽ നിർണായകമായ വീഡിയോകളും മറ്റ് ഡിജിറ്റൽ തെളിവുകളും ഉണ്ടായിരുന്നുവെന്നാണ് കരുതുന്നത്. ഇവ നശിപ്പിച്ചിട്ടുണ്ടാകാമെന്ന സംശയത്തിൽ ഫോണുകൾ കേന്ദ്രീകരിച്ചും പരിശോധന തുടരുകയാണ്. കൊലപാതകത്തിന് തൊട്ടുമുമ്പുള്ള ദിവസങ്ങളിൽ അഭിരാമും മറ്റു ചില കുട്ടികളും തമ്മിലുണ്ടായ വാക്കേറ്റത്തിന്റെ ദൃശ്യങ്ങളും പൊലീസിന് ലഭിച്ചിട്ടുണ്ട്. ഈ ദൃശ്യങ്ങളിലുള്ള കുട്ടികളെ കണ്ടെത്തി മൊഴിയെടുക്കാനും അന്വേഷണസംഘം നീക്കം നടത്തുന്നുണ്ട്. അതേസമയം, അഭിരാമിന്റെ സുഹൃത്തിനെക്കുറിച്ചും ഇയാളുമായുള്ള ഒന്നാം പ്രതിയുടെ വൈരാഗ്യത്തെക്കുറിച്ചും കൂടുതൽ വിവരങ്ങൾ ശേഖരിക്കുകയാണ് പൊലീസ്.

ഒരു പ്രണയബന്ധത്തിലെ തർക്കം, മറ്റൊരാളെ കൊലപ്പെടുത്താനുള്ള ആസൂത്രണം, അതിനായി ഒരു കൗമാരക്കാരനെ കെണിയിൽപ്പെടുത്തൽ, ഒടുവിൽ ആസൂത്രണത്തിന്റെ ഇരയായി മാറിയ അഭിരാം... ഈ സംഭവത്തിലെ ഓരോ വിവരങ്ങളും പുറത്തുവരുമ്പോൾ ഉയരുന്നത് വലിയ ചോദ്യങ്ങളാണ്. കൗമാരക്കാരുടെ വ്യക്തിബന്ധങ്ങളിലെ തർക്കങ്ങൾ എത്രത്തോളം അപകടകരമായ അക്രമങ്ങളിലേക്ക് വളരുന്നു എന്നതിന്റെ ഭീതിപ്പെടുത്തുന്ന ഉദാഹരണമായി മാറുകയാണ് ഈ കൊലപാതകം. സോഷ്യൽ മീഡിയ വഴിയുള്ള സൗഹൃദങ്ങളും പ്രണയബന്ധങ്ങളും ദുരുപയോഗം ചെയ്യപ്പെടുമ്പോൾ കുട്ടികൾ നേരിടുന്ന അപകടങ്ങളും ഗൗരവത്തോടെ കാണേണ്ടതുണ്ട്. അഭിരാമിന്റെ കൊലപാതകത്തിൽ കൂടുതൽ പേർക്ക് പങ്കുണ്ടോ, കൊലപാതകത്തിന് പിന്നിലെ കൃത്യമായ ആസൂത്രണം എന്തായിരുന്നു, തെളിവുകൾ നശിപ്പിക്കാൻ ആരൊക്കെ ശ്രമിച്ചു തുടങ്ങിയ ചോദ്യങ്ങൾക്കുള്ള ഉത്തരങ്ങളാണ് ഇനി അന്വേഷണത്തിലൂടെ പുറത്തുവരേണ്ടത്.