ഡല്‍ഹി ചൗരിബസാര്‍ മെട്രോ സ്‌റ്റേഷന് സമീപം നിര്‍മാണത്തിലിരുന്ന മൂന്ന് നില കെട്ടിടം തകര്‍ന്നുവീണ് രണ്ടുപേര്‍ മരിച്ചു. ചന്ദര്‍പാല്‍ (60), വിജയ് കുമാര്‍ (33) എന്നിവരാണ് അപകടത്തില്‍ മരിച്ചത്. പരിക്കേറ്റ ഒരാളെ ആശുപത്രിയില്‍ പ്രവേശിപ്പിച്ചു. തകര്‍ന്നുവീണ കെട്ടിട അവശിഷ്ടങ്ങള്‍ക്കിടയില്‍ കൂടുതല്‍ ആളുകള്‍ കുടുങ്ങിക്കിടക്കുന്നുണ്ടോയെന്ന സംശയത്തില്‍ അഗ്‌നിശമന സേനയുടെയും പോലീസിന്റെയും നേതൃത്വത്തില്‍ രക്ഷാപ്രവര്‍ത്തനം തുടരുകയാണ്. വടക്കുകിഴക്കന്‍ ഡല്‍ഹിയില്‍ പഴയ വീടിന് മുകളില്‍ പുതിയ നില നിര്‍മിക്കുന്നതിനിടെ സ്ലാബ് തകര്‍ന്ന് രണ്ടുപേര്‍ മരിച്ച സംഭവത്തിന് തൊട്ടുപിന്നാലെയാണ് ചൗരിബസാറിലും സമാനമായ ദുരന്തമുണ്ടാകുന്നത്.