ബുദ്ധസന്യാസികള്‍ ജീവജാലങ്ങളെ ഒരേ പരിഗണനയോടെ പരിപാലിക്കുന്നവരാണ് . തായ്ലാന്‍ഡില്‍ പുതുവര്‍ഷ ദിനത്തില്‍ പ്രാര്‍ത്ഥനയില്‍ ഏര്‍പ്പെട്ട് മന്ത്രോച്ചാരണത്തില്‍ ശ്രദ്ധിച്ചിരുന്ന സന്യാസിയുടെ മടിയില്‍ കയറിയിരുന്ന് സ്നേഹപ്രകടനം നടത്തിയ ഒരു പൂച്ചയുടെ ദൃശ്യങ്ങള്‍ സോഷ്യല്‍ ലോകത്തിന്റെ ശ്രദ്ധനേടുന്നു. അഞ്ചു മണിക്കൂറോളം നീണ്ട പ്രാര്‍ത്ഥനയില്‍ ഉടനീളം പൂച്ച ഈ സന്യാസിക്കൊപ്പം ഉണ്ടായിരുന്നു.

ദേഹത്ത് പിടിച്ചുകയറിയുള്ള സ്നേഹപ്രകടനം അതിരുകടന്നപ്പോള്‍ ബുദ്ധ ക്ഷേത്രത്തിലെ അന്തേവാസിയായ ഈ പൂച്ചയെ പതുക്കെ തട്ടിമാറ്റാന്‍ സന്യാസി ശ്രമിക്കുന്നുണ്ടെങ്കിലും പൂച്ച പിന്മാറുന്നില്ല. സന്യാസിയുടെ മടിയില്‍ കയറിയിരുന്നും നടന്നുമാണ് അവളുടെ സ്നേഹപ്രകടനം. ക്ഷേത്രത്തില്‍ പ്രാര്‍ത്ഥനയ്ക്കെത്തിയ നൊഫയോങ് സൂക്ഫാന്‍ എന്നയാളാണ് ഈ ദൃശ്യം പകര്‍ത്തി ഫെയ്സ്ബുക്കിലൂടെ പ്രചരിപ്പിച്ചത്. പിന്നീട് നിരവധി വാര്‍ത്താസൈറ്റുകള്‍ ഈ ദൃശ്യം ഏറ്റെടുത്തു.

താന്‍ പ്രാര്‍ത്ഥനാപുസ്തകം വായിക്കാന്‍ ശ്രമിക്കുകയായിരുന്നു. എന്നാല്‍ തന്റെ ശ്രദ്ധ മുഴുവന്‍ പൂച്ച കൊണ്ടുപോയി എന്ന് സന്യാസി പറയുന്നു.ബാങ്കോക്കിനു പുറത്തുള്ള വാറ്റ് ഉദോംറാങ്സിയിലെ ക്ഷേത്രത്തിലാണ് പൂച്ച ലോങ് പി കോംക്രിത് ടീചാകോടോ എന്ന സന്യാസിയുടെ ക്ഷമ പരീക്ഷിക്കുന്നത്. സമീപത്തിരിക്കുന്ന മുതിര്‍ന്ന സന്യാസി ഇടയ്ക്കിടെ ഇത് ശ്രദ്ധിക്കുന്നുമുണ്ട്.

തായ്ലാന്‍ഡിലെ ബുദ്ധക്ഷേത്രങ്ങളില്‍ പൂച്ചകള്‍ക്ക് യഥേഷ്ടം വിഹരിക്കാനുള്ള സ്വാതന്ത്ര്യം നല്‍കിയിട്ടുണ്ട്. വാറ്റ് ഉദോംറാങ്സിയിലെ ക്ഷേത്രത്തില്‍ ഒരു ഡസനിലേറെ പൂച്ചകളാണുള്ളത്. ക്ഷേത്രത്തിലെത്തുന്ന ഭക്തര്‍ ഇവര്‍ക്ക് ഭക്ഷണം നല്‍കുന്നുണ്ട്. അതുകൊണ്ടുതന്നെ തടിച്ചുകൊഴുത്താണ് അവയിരിക്കുന്നതെന്നും സന്യാസി പറയുന്നു.