ഒരു നൂറ്റാണ്ടിന്റെ അനുഭവങ്ങള്‍ പേറുന്ന മറിയക്കുട്ടി ശ്രീമൂലനഗരം രാജഗിരി ക്രിസ്തുരാജ ഇടവകയിലെ ഏറ്റവും പ്രായം കൂടിയ വ്യക്തിയാണ്. 

ഇന്നും ആരോഗ്യവതി. 5 തലമുറകളുടെ അമരത്തിരിക്കുകയാണ്  ശ്രീമൂലനഗരം കൂനത്താന്‍ പരേതനായ പൗലോസിന്റെ ഭാര്യ മറിയക്കുട്ടി എന്ന 104- വയസ്സുകാരി.

സ്വന്തമായി കോഴികളെ വളര്‍ത്തുന്നു. കോഴിമുട്ട കൊടുത്തു വരുമാനമുണ്ടാക്കുന്നു. എന്നും രാവിലെ 4-ന് ഉണരും. 2 മണിക്കൂറോളം പ്രാര്‍ഥന. പിന്നെ അടുക്കളയിലേക്ക്. കറിക്ക് അരിഞ്ഞു കൊടുത്തും മറ്റും സഹായിക്കും.

വെറുതെയിരിക്കാതെ എന്തെങ്കിലും ചെയ്തുകൊണ്ടിരിക്കുക എന്നതാണു മറിയക്കുട്ടിയുടെ ആരോഗ്യ രഹസ്യം എന്നു മറ്റുള്ളവര്‍ വിലയിരുത്തുന്നു. ശ്രീമൂലനഗരം മൃഗാശുപത്രിയില്‍ 40 വയസ്സ് മുതല്‍ പാര്‍ട്ട് ടൈം ജോലിക്കാരിയായിരുന്നു മറിയക്കുട്ടി.

പുതിയ തലമുറയ്ക്ക് മറിയക്കുട്ടി പ്രിയങ്കരിയാണ്. കാരണം, ഒരുപാടു കഥകള്‍ പറയും. നാടന്‍പാട്ടുകളും ഭക്തിഗാനങ്ങളും പാടും.

യഥാര്‍ഥ വിരമിക്കല്‍ പ്രായമെത്തിയപ്പോള്‍, പെന്‍ഷന്‍ വേണ്ട ജീവിതകാലം മുഴുവന്‍ ജോലി ചെയ്‌തോളാമെന്ന് മറിയക്കുട്ടി എഴുതിക്കൊടുത്തു. വര്‍ഷങ്ങള്‍ക്കു ശേഷം മക്കളും പേരമക്കളും നിര്‍ബന്ധിച്ചിട്ടാണു 27 വര്‍ഷം മുന്‍പ് പെന്‍ഷന് എഴുതിക്കൊടുത്തത്. ഇപ്പോള്‍ 5000 രൂപ പെന്‍ഷന്‍ കിട്ടുന്നുണ്ടെന്നു വീട്ടുകാര്‍ പറയുമ്പോള്‍ മറിയക്കുട്ടി തിരുത്തും; '5000 അല്ല കുറച്ചു ചില്ലറയുമുണ്ട്'.

72 വര്‍ഷം മുന്‍പ് മറിയക്കുട്ടിയുടെ ഭര്‍ത്താവ് പൗലോസ് മരിച്ചതോടെ കുടുംബഭാരം മറിയക്കുട്ടിയുടെ തോളിലായി. 2 മക്കളാണു മറിയക്കുട്ടിക്ക്- ദേവസിയും അന്നംകുട്ടിയും. അന്നംകുട്ടി അവിവാഹിതയാണ്. 8 മക്കളുണ്ടായിരുന്നുവെന്നും മറ്റുള്ളവര്‍ ചെറുപ്പത്തില്‍ മരിച്ചെന്നും മറിയക്കുട്ടി പറയുന്നു. 73 വയസ്സുള്ള ദേവസിക്കു 4 മക്കള്‍.

അവര്‍ക്ക് എല്ലാവര്‍ക്കുമായി 9 മക്കള്‍. എറ്റവും പുതിയ തലമുറയില്‍ 2 കുട്ടികള്‍. ആഘോഷാവസരങ്ങളില്‍ എല്ലാവരും ഒരുമിച്ചുകൂടും. മറിയക്കുട്ടിയുടെ 100-ാം പിറന്നാള്‍ എല്ലാവരും ചേര്‍ന്ന് ആഘോഷമാക്കി.

104 വയസുള്ള മറിയക്കുട്ടി മകന്‍ ദേവസി, ദേവസിയുടെ മകള്‍ റെസ്സി, റെസ്സിയുടെ മകള്‍ ജോയ്‌സി, ജോയ്‌സിയുടെ മകന്‍  ക്രിസ് മാത്യു എന്നിവര്‍ക്കൊപ്പം...

എല്ലാ ഭക്ഷണവും മറിയക്കുട്ടി കഴിക്കും. സ്വന്തമായി കോഴി ഇടിച്ചു പിഴിഞ്ഞു കഷായം ഉണ്ടാക്കിക്കഴിക്കും. നെഹ്‌റുവിനെ കണ്ടിട്ടുണ്ടെന്നു മറിയക്കുട്ടി പറയുന്നു. ഇന്ദിരാഗാന്ധിയും കൂടെയുണ്ടായിരുന്നു. എന്നാല്‍ എവിടെവച്ചാണു കണ്ടതെന്നു വ്യക്തമായി ഓര്‍മ്മയില്ല. 15 വര്‍ഷം മുന്‍പു വേളാങ്കണ്ണിക്കു പോയതാണു മറിയക്കുട്ടിയുടെ ഓര്‍മയിലെ ദീര്‍ഘയാത്ര. വിവാഹം കഴിഞ്ഞുവന്ന പഴയ വീട്ടില്‍തന്നെയാണു ഇപ്പോഴും താമസം. കൈപ്ര വാഴപറമ്പില്‍ കുടുംബാംഗമാണു മറിയക്കുട്ടി 3 സഹോദരങ്ങള്‍. ഒരു സഹോദരി ജീവിച്ചിരുപ്പുണ്ട്.